Ondřej Moravec

Vun Wikipedia
Zur Navigation springen Zur Suche springen

Ondřej Moravec (* 9. Juni 1984 in Ústí nad Orlicí) is en tschechisch Biathlet.

Ondřej Moravec vun den SKP Jablonec fung 1999 mit den Biathlonsport an. Siet 2004 hörrt de vun Vlastimil Vávra traineert Letohrader Sportlehrer to den tschechischen Natschonalkader. 2001 is he eerstmals ahn grötteren Spood bi de Juniorenweltmeesterschapen in Chanty-Mansijsk antreeden. Een Johr later bi de glieker Veranstaltung in Ridnaun wunn he Sülver mit de Staffel un Bronze in Sprint un Verfolgung. Bi de Europameesterschapen in Kontiolahti in dat sülvig Johr weer Platz 10 in‘ Sprint dat best Ergevnis. Dornah folgten veer Insätze in‘ Europacup. De beid letzten, 2003 in Forni Avoltri, hett he as Fievt in‘ Sprint un Dart in de Verfolgung afslooten. Wegen de good Ergevnisse is he in den Weltcup uprückt un wurr bi sien Debüt in Ruhpolding 56. In‘ Sprint. Bi de Juniorenweltmeesterschapen 2003 in Kościelisko wurr he Dart in dat Eenzel, in de Verfolgung un mit de Staffel un verpass as Veert in‘ Sprint blots knapp en veerte Medaille.

2003 is he noch eenmal spoodriek in Forni Avoltri antreeden, ditmal bi de Europameesterschapen. Hier wunn he de Titel in‘ Eenzel un mit de Staffel. 2004 is he nochmal bi de Juniorenweltmeesterschapen in Haute Maurienne antreeden un wunn Sülver mit de Staffel. De Europameesterschapen in Minsk wurrn weer düchtig spoodriek för hüm. Moravec wunn Gold in‘ Sprint un in de Verfolgung, keem in’t Eenzel up Platz 4 un reck mit de Staffel Platz 5. To Anfang vun de Saison 2004/05 wunn Moravec en Sprint un en Verfolgung in Obertilliach. Dormit harr he sück weer för den Weltcup qualifizeert. Dor kunn he in Ruhpolding as 29. In‘ Sprint un 24. in de Verfolgung eerstmals Biathlon-Weltcup-Punkte sammeln. De Saison hett he bi de Europameesterschapen in Nowosibirsk afslooten, wo he Gold in de Verfolgung un Sülver in‘ Sprint wunn un in dat Eenzel un mit de Staffel den veerten Platz recken dee. In de Weltcup-Gesamtwertung leeg he an’t Enn‘ up Platz 83. De folgende Saison fung he weer un letztmals in‘ Europacup in Langdorf an. Hier wunn he sowohl den Sprint as ok de Verfolgung. Bi sien letzt Juniorenweltmeesterschapen in Kontiolahti wunn he nochmal Sülver in’t Eenzel. Siet de Saison 2005/06 is Moravec blots noch in‘ Weltcup antreeden. In disse Saison keem he an’t Enn‘ up Platz 52, de Folgesaison blots up Platz 56. Höchtpunkt in sien Karriere weer denn bit dorhen de Deelnahm an de Olympisch Spelen 2006 vun Turin. Hier keem he in‘ Sprint up Rang 34 un in de Verfolgung up Rang Rang 41 un wurr mit de Staffel up Platz 6 rin. De Biathlon-Weltmeesterschapen 2007 in Antholz weern sien eerste Biathlon-Weltmeesterschaften. Mit de tschechisch Mixed-Staffel keem he dor as best Ergevnis up Rang 8.

In de Biathlon-Saison 2007/08 keem he up Platz 45 in de Gesamtwertung un mit de Staffel bi de Biathlon-Weltmeesterschapen 2008 ditmal up Platz 7. Ok de Folgesaison broch hüm nich den Dörbröök.

Moravec nehm ok ahn Spood an de Olympisch Winterspelen 2010 deel. Sien best Resultat dor weer Platz 67 in‘ Sprint. In den Gesamtweltcup vun de Saison full he up den 66. Platz torüch.

Ok de Saison 2010/11 leep nich to good för Moravec. Platz 14 in’ Sprint vun Ruhpolding bleev in dat Johr sien best Ergevnis. In de Gesamtwertung keem he so up Platz 51. Bi de Biathlon-Weltmeesterschapen 2011 keem he mit de tschechisch Staffel up den 10. Platz.

In de Saison 2011/12 schaff Moravec sien lang verwacht Dörbröök, ofschons de Start in de Saison ok allens anners as tofräestellend verleep. To dat Enn‘ kunn he sück aber stark verbetern, mehrfack keem he ünner de best 20 in’t Teel. An dat Enn‘ vun de Saison reck he mit 28 sien best Weltcup-Platzeeren. Bi de Biathlon-Weltmeesterschapen 2012 keem he mit de tschechisch Staffel up Platz 9 und mit de Mixed-Staffel up Platz 8.

In de Saison 2012/13 kunn he sück nochmals stiegern. So keem he bi dat Verfolgungsrennen in Pokljuka mit Platz eerstmals up dat Podest, wat he mit Platz 3 in der Verfolgung vun Oberhof noch mal schaffen dee. Dat un anner good Ergevnisse brochen hüm an dat Enn‘ vun de Saison up Platz 12 in den Gesamtweltcup, as ok jewiels up Platz 5 in den Eenzelweltcup und Massenstartweltcup. Mit de Mixed-Staffel wunn he bi de Biathlon-Weltmeesterschapen 2013 denn mit Bronze ok sien eerst Medaille bi en Weltmeesterschap.

Ok de 2013/14 broch hüm weer twee Podestplatzeeren in un insgesamt reck he Platz 14 in den Gesamtweltcup. In den Massenstartweltcup keem he up Platz 9. Moravec nehm denn ok an de Olympisch Spelen 2014 vun Sotschi deel, de bannig spoodriek för hüm verleepen. Tonächst wunn he de Sülvermedaille in‘ de Verfolgung achter Martin Fourcade aber vör Jean-Guillaume Béatrix, dorup geev dat de Bronzemedaille in‘ Massenstart (achter Emil Hegle Svendsen un Martin Fourcade) un to’n Sluss wunn he mit de tschechisch Mixed-Staffel, in de Besetten Veronika Vítková, Gabriela Soukalová un Jaroslav Soukup, de Sülvermedaille.

Endgültig in de Weltspitze ankommen weer he in de Saison 2014/15. Platz 6 in den Gesamtweltcup entstunnen ut mehreren Top Ten-Platzeeren, dorvan dree Podestplätze. In den Massenstartweltcup reck he sogor Platz 5. Bi de Biathlon-Weltmeesterschapen 2015 in Kontiolahti keem he in‘ Sprint up den 9. Platz, reck in den ansluuten Verfolger de de glieker Platzeeren, hett aber bi dat Eenzelrennen de Bronzemedaille achter Martin Fourcade un Emil Hegle Svendsen haalt. In Massenstart wunn he de Sülvermedaille achter Jakov Fak aber vör Tarje Bø. Sien Medaillensatz komplett hett he mit de Goldmedaille mit de Mixed Staffel an de Siet vun Veronika Vítková, Gabriela Soukalová un Michal Šlesingr.

Weniger good verleep de Folgesaison, in de he blots een Podestplatz recken dee un in de Gesamtwertung Platz 25 belegg. Bi de Biathlon-Weltmeesterschapen 2016 in Oslo keem he blots mit de tschechisch Staffel up den 6. Platz. In de Mixed-Staffel wurr he nich insett.

Beter leep weer de Saison 2016/17, as he in de Gesamtwertung den 12. Platz belegg un i’n Eenzel-Weltcup den Gesamtrang 10. Bi de Biathlon-Weltmeesterschapen 2017 keem he in’t Eenzel up den 2. Platz achter den Amerikaner Lowell Bailey un vör Martin Fourcade.

In de Saison 2017/2018 keem he in de Gesamtwertung vun den Biathlon-Weltcup up Platz 27, reck aber in’n Eenzelweltcup immerhen den 5. Platz. Bi de Olympisch Winterspelen kemm he mit de tschechisch Staffel up den 9. Platz un mit de Mixed-Staffel up den 8. Platz. In’t Eenzel reck he Platz 12.

De Folgesaison hett he as 30. In den Gesamt-Weltcup afslooten; sien best Eenzelergevnis in disse Saison weer en Platz 8. Bi de Biathlon-Weltmeesterschapen vun dat Johr keem he mit de tschechisch Staffel up den 4. Platz,mit de Mixed-Staffel up Platz 6 un mit de Single-Mixed-Staffel an de Siet vun Eva Puskarčíková up den negenten Platz.

Ondřej Moravec bedrifft ok Sömmerbiathlon un wurr dor mehrfack Weltmeester.

Weblenken[ännern | Bornkood ännern]

Commons-logo.svg Ondřej Moravec. Mehr Biller, Videos oder Audiodateien to’t Thema gifft dat bi Wikimedia Commons.