Susan Dunklee

Susan Dunklee (* 13. Februar 1986 in Barton) is en US-amerikaansch Biathletin, Skilanglöperin un Lichtathletin.

Susan Dunklee is de Dochter vun Stan Dunklee un Nichte vun Everett Dunklee, beid fröhere Olympiadeelnehmer in' Skilangloop för de USA. Se hett bit 2008 dat Dartmouth College besöcht, wo se Ökologie studeert hett. Se bedreev tonächst Skilangloop un Lichtathletik. In de Lichtathletik bedreev se Söbenkamp un verpass hier eenmal knapp de Deelnahm an de US-Meesterschapen. Spoodrieker weer se bi den Skilangloop, wo se för dat Dartmouth ski team antreeden is. 2002 hett se hör eerst FIS-Rennen bestreeden, in' Januar 2004 nehm se ahn Spood an hör eerst US-Meesterschapen deel. In' Dezember vun dat sülvig Johr reck se bi NorAm-Cup-Rennen in Presque Isle Podestplätze. In' Februar 2006 wunn se in Stowe hör eenzig FIS-Rennen över 5 Kilometer in' klassischen Stil. Wiel se aber den internatschonalen Dörbröök denn doch nich schaffen dee, is se 2008 to'n Biathlon wesselt.

Dunklee leevt un traineert siet Juni 2008 in dat US Olympic Training Center in Lake Placid. Hör Trainer is James Upham. In' Biathlon harr se gau Spood. In' Biathlon-NorAm-Cup 2008/09 leep se up de tweet Wettkampstatschoon in Itasca achter Carolyn Bramante in en Sprint up den tweeten Platz. Dree wiedere Top-Ten-Platzeeren gevv dat in de Saison noch, dorünner de eerste Sieg bi en Sprint in Fort Kent to'n Afsluss vun de Rennserie. Wiel dat togliek ok de US-Meesterschap weer, wunn Dunklee ok dissen Titel. In de Verfolgung verpass se as Veertplatzeerte knapp en wiedere Medaille, in' Massenstart keem se up den sössten Platz un in de Gesamtwertung vun den Nor-Am-Cup reck dat för Platz 4. De good Ergvnisse hemm hör denn en Nomineeren för den IBU-Cup 2008/09 inbrocht, wo se in Altenberg hör Debüt geev. In de Serie hett se veer Rennen bestreeden un leep dorbi immer in de Punkteränge. In de Folgesaison reck se as Teihntplatzeere in en Sprint in Altenberg hör eerst Top-Ten-Ergevnis un togliek hör bit dorhen best Platzeeren in de Rennserie.

Ok de Saison 2009/10 broch, besünners in Noordamerika, wiedere Erfolge. In den Biathlon-NorAm-Cup 2009/10 wunn Dunklee dree Rennen un keem eenmal up den darten Platz. In de Gesamtwertung keem se up den 2. Platz achter Claude Godbout vör Tracy Barnes. Nahdem se bi de Nordamerikaansch Meesterschapen 2010 in Fort Kent in Sprint und Verfolgung jewiels den letzten Platz schafft harr, kunn se den afsluuten Massenstart aber up hör Naam schrieven. Wiels dat to glieker Tiet ok de US-Meesterschapen 2010 weern, wurr Dunklee dordör eben ok Landsmeesterin in disse Disziplin. Se hett ok an de Biathlon-Europameesterschapen 2010 in Otepää deelnommen un reck de Ränge 37 in' Eenzel, 17 in' Sprint, 39 in de Verfolgung un 9 mit Annelies Cook, Laura Spector un Hannah Dreissigacker as Slusslöperin vun de Staffel. Ok een Johr later is Dunklee in Ridnaun bi de EM antreeden, wo se 15. vun dat Eenzel, 42. vun den Sprint un 19. in dat Verfolgungsrennen wurr.

To'n Uptakt vun de Saison 2011/12 geev se in Östersund hör Debüt in' Biathlon-Weltcup. In dat eerst Rennen, en Eenzel, verpasse se as 45. noch de Punkteränge. Twee Daag later wunn se as 28. in en Sprintrennen aber hör eerst Weltcuppunkte. In Antholz kunn se hör Bestleistung in en Sprintrennen tonächst bit up Rang 17 verbeetern, wat en vun de best Leistungen vun en amerikaansch Biathletin vun de letzt beid Johrteihnten weer. Bi de Weltmeesterschapen in Ruhpolding keem se in' Eenzel unverwacht up Platz 5. De endgültige Dörbröök in de Weltspitze gelung hör in de Saison 2013/14. Dunklee hett dor veer eenstellige Platzeeren reckt un leep to dat Saisonfinale an' Holmenkollen in Oslo as Dart eerstmals up dat Podium. An' Enn' vun de Saison stunn se up Rang 23 in de Gesamtweltcupwertung.

Ahn herutragen Eenzelleistungen (Platz 6 weer de best Platzeeren), keem se in de Saison 2014/15 in den Gesamtweltcup aber doch noch up Platz 17. Bi de Biathlon-Weltmeesterschapen 2015 keem se mit de amerikaansch Mixed-Staffel up den 8. Platz.

In de Saison 2015/16 kunn se in' Sprint vun Presque Isle mit en tweeten Rang hör Karrierebestleistung nochmals verbeetern. An‘ Enn reck se Platz 14 in den Gesamtweltcup. Bi de Biathlon-Weltmeesterschapen 2016 keem se in‘ Sprint up den 8. Platz un in de doran ansluuten Verfolgung kunn se sück up Platz 10 hollen. Den Platz reck se ok an de Siet vun Lowell Bailey, Sean Doherty und Hannah Dreissigacker in de Mixed-Staffel.