Lagavulin (Brenneree)
| Lagavulin | |
|---|---|
 Infohrt to de Brenneree Lagavulin (Foto: Alasdair MacNeill) | |
| Land | Schottland |
| Region | Islay |
| Tyyp | Malt |
| Status | aktiv |
| Besitter | Diageo |
| Grünnt | 1816 |
| Grünner | John Johnston |
| Waterborn | Loch Sholum, Lochan Sholum |
| Washstill(s) | 2 × 12.300 l |
| Spiritstill(s) | 2 × 12.900 l |
| Produkschoonsvolumen | 2.250.000 l |
Lagavulin (so veel as „de Kuhl bi de Möhl“) is en Whisky-Brenneree in Lagavulin op dat Eiland Islay in Schottland. Se produzeert verschedene Single Malt Whiskys, dorünner ok een vun de ölven so nöömten Classic Malts.
Historie
[ännern | Bornkood ännern]An den Standoort vun de hüütigen Brenneree an de Lagavulin Bay is al siet 1742 Whisky herstellt worrn. De eerste Destille, de ok na Gesett Verlööf harr, Whisky to brennen, is aver eerst 1816 dör John Johnston grünnt worrn. Een Johr later keem mit Ardmore en wietere Destille dorto, de vun Archibald Campbell grünnt weer. De hett aver nix mit de Brenneree Ardmore in Kennethmont to doon un dröff nich mit ehr verwesselt warrn. As de Ardmore Brenneree ok in den Besitt vun John Johnston övergahn is, weern de beiden 1837 to de hüütigen Brenneree Lagavulin tosamenleggt.
1927 is de Destille an de Distillers Company Limited (DCL) gahn, de dat operative Gewarf 1930 an ehr Dochterünnernehmen Scotish Malt Distillers (SMD) överdragen hett. Op dat glieke Rebeet geev dat twüschen 1908 un 1960 ok noch de Brenneree Malt Mill vun Peter Mackie. In de ehr Molteree is vundaag dat Besökerzentrum vun Lagavulin ünnerbröcht. In verleden Tieten weer de Destille mehrere mole stillleggt: 1918, 1941 bit 1945 un 1952 bit 1953.
Produkschoon
[ännern | Bornkood ännern]
De Brenneree Lagavulin höört to dat schottische Whiskyrebeet Islay. Dat Water för de Produkschoon stammt ut de beiden Seen Loch Sholum un Lochan Sholum, de sik an de Häng vun den 347 m hogen Barg Beinn Sholum befinnt. Dat Molt warrt nich mehr in de Destille sülvst herstellt, man ut de Molteree vun de Brenneree Port Ellen betogen. De Destille Lagavulin hett en Meeschfatt (mash tun) vun 4,32 t ut Eddelstahl un teihn Gäärfatten (wash backs) to 21.300 l ut Pinienholt. Brennt warrt in twee wash stills to 12.300 l un twee spirit stills to 12.900 l, de mit Damp hitt maakt warrt. Dat Destillat warrt vör’t Affüllen in de so nöömten hogsheads (250-Liter-Fatten) to’n Riepen mit Water op 63,4 Prozent verdünnt.
Dat gifft kuum en annere Destille, de mit en so lütte Utwahl vun Produkten so en groten Spood hett as Lagavulin. Lange Tiet geev dat blots den 16-johrigen Whisky to köpen. Dat is bito ok de Whisky, de as Classic Malt vermarkt warrt. Eerst vör en poor Johren is en tweete regelmatig Affüllen dorto kamen. Intwüschen gifft dat noch en poor annere Originalaffüllen vun de Brenneree. Unafhangige Affüllen vun disse Whisky sünd bannig roor. Wenn doch mol en Fatt an en anneren Affüller gahn schüll, mutt de aver en annern Naam bruken, vunwegen dat de Naam Lagavulin blots vun de Brenneree sülvst bruukt warrn dröff.
Kiek ok
[ännern | Bornkood ännern]Weblenken
[ännern | Bornkood ännern]
Koordinaten:55° 38′ N, 6° 8′ W