Brenneree

Vun Wikipedia
Zur Navigation springen Zur Suche springen
Wienbrenneree Dujardin in Uerdingen
De Whiskybrenneree Edradour in de schottischen Highlands
Modell vun de Jägermeister-Brenneree in Wulfenbüttel

In Brenneree oder ok Destilleree (kort ok Destille) warrt Snaps mit hogen Alkoholandeel herstellt. Grundlaag dorför sünd Stoffen, de eerstmol wenig Alkohol bargt. Dat Hoochkunzentreren vun’n Alkohol löpt na dat Prinzip vun de Destillatschoon. De Vörgang sülvst warrt ok as Brennen betekent. De Beteken Brenneree steiht vör dat Huus, woneem dat Brennen maakt warrt, jüst so aver ok för dat Ünnernehmen sülvst.

Verfohren[ännern | Bornkood ännern]

In en Brenneree warrt normale5rwies nich blots brennt, man all enkelte Schreden vun de Snapsprodukschoon dörföhrt. Dat geiht los mit dat Inköpen un Lagern vun de Rauhstoffen un dat Kontrolleren vun de Gööd. De Utgangsstoffen warrt denn to Meesch verarbeit, un de Sucker in de Meesch warrt to Alkohol vergäärt. Denn eerst folgt dat egentliche Brennen. Dat Destillat warrt dorna to’n Riepen inlagert. Toletzt warrt de Snaps denn filtreert, op en drinkboren Alkoholandeel verdünnt, affüllt un opletzt verdreven.

De Bedrief vun en Brenneree warrt na de Brennereeornen[1] regelt.

Stüerrecht[ännern | Bornkood ännern]

Snaps warrt in Düütschland mit de Brannwienstüer beleggt. Woveel de Produkschoon bestüert warrt, warrt je na Anlaag ünnerscheedlichen bestimmt. De Struktur un de Verdelen vun de Brennrechten hebbt starke histoorsche Wörteln. Bi de ruchweg 29.000 düütschen Affinnbrennereen, de dat vör allen in Süüd- un Süüdwestdüütschland gifft, Warrt de Stüerlast na de Mengde vun de Rauhstoffen berekent un na de Alkoholmengde, de dorüt aftoleiden is. De Mengde is dorbi op 300 Liter reinen Alkohol jeed Johr begrenzt. As Stoffbesitters warrt Lüüd betekent, de bit to 50 Liter Alkohol ut egen tüügt Aaft in Affinnbrennereen brennen laten drööft. Dat Recht bruukt jeed Johr twüschen 100.000 bit 200.000 Lüüd. Bi de Verslussbrennereen, de in de Mengde nich begrenzt sünd, warrt dorgegen de wohrhaftige Alkoholmengde bestüürt.[2]

Brennereen, de ahn Verlööf Snaps maken doot un dorför ok keen Stüern betahlt, warrt Swartbrennereen nöömt. Se warrt vun de Behörden wegen Stüerbedrugg verfolgt.

Rauhstoffen un Produkten[ännern | Bornkood ännern]

In Brennereen warrt en grote Tall verschedene Rauhstoffen verarbeit, de Sucker oder Stärk bargt. Dorbi kunzentreert sik een Ünnernehmen faken aver op dat Verarbeiten vun blots een Rauhstoff oder en Grupp vun Rauhstoffen, ut de sünnere Produkten wunnen warrt. Ünner de Bedrieven, de Snaps för den direkten Verbruuk as Geneetmiddel maken doot, gifft dat to’n Bispeel Kantüffelbrennereen, Aaftbrennenereen, Whisky- un Absinthdistillereen.

Bi Bedrieven, de Agraralkohol (Ethylalkohol mit Oorsprung in de Landweertschop) produzeert, is dat Endprodukt tomeist Ethanol mit tomnidst 96 % Reinheit ahn Röök un Smack. De gröttste Deel vun den weltwiet produzeerten Agraralkohol warrt ünner de Beteken Bioethanol as Biokraftstoff verbruukt. Blangen dat Wieterverarbeiden to Snaps as Likör oder Wodka warrt Agraralkohol ok bi de Produkschoon vun Heelmiddels, Kosmetikartikels, Reinigers, Desinfekschoons- un Frostschuulmiddels, as ok för Lack un Farven bruukt. In Düütschland warrt en groten Deel vun Agraralkohol vun lütte landweertschoppliche Brennereen produzeert. De Produkschoon vun Bioethanol as Kraftstoff warrt dorgegen tomeist in industrielle Grootanlagen maakt. Man, ok dor gifft dat regionale Strukturen mit landweertschoppliche Brennereen.[3][4]

Borns[ännern | Bornkood ännern]

  1. bundesrecht.juris.de, Brennereeornen (Anlaag to de Brannwienmonopoolverornen), afropen an’n 30. November 2007
  2. Bundsministerium för Nehren un Landweertschap: Lütt- un Aaftbrennereen in Düütschland, afropen an’n 24. Februar 2010
  3. E85 Regionol, Afropen an’n 24. Februar 2010
  4. Bundsministerium för Nehren un Landweertschap: Agraralkohol, afropen an’n 24. Februar 2010

Weblenken[ännern | Bornkood ännern]

Commons-logo.svg Brenneree. Mehr Biller, Videos oder Audiodateien to’t Thema gifft dat bi Wikimedia Commons.