Edradour

Vun Wikipedia
Zur Navigation springen Zur Suche springen
Edradour
Edradour.jpg

Brenneree Edradour (2006)

Land Schottland
Region Highlands
Tyyp Malt
Status aktiv
Besitter Andrew Symington (Signatory)
Grünnt 1825
Grünner Buerslüüd
Waterborn Mhoulin Moor
Washstill(s) 1 × 4.218 l
Spiritstill(s) 1 × 2.179 l
Produkschoonsvolumen 90.000 l
Websteed www.edradour.com

Edradour is en Whisky-Brenneree in en lütt Daal in’n Oosten vun den Oort Pitlochry in Schottland. De Destille is de lüttste Whisky-Brenneree vun Schottland. Vun de Arbeiters warrt in de Week blots twölf Fatten mit 600 Gallonen (üm un bi 2.720 Liter) Destillat herstellt. In’t Johr gifft dat blots 90.000 l oder ruchweg 250.000 Buddels. De Brenneree warrt ok veel vun Touristen besöcht: Jeed Johr kamt ruchweg 100.000 Besökers, so dat tosätzlich meist 20 Lüüd as Frömmenföhrers anstellt sünd. In de schottischen Denkmollisten is dat Brenneree-Huus in de Kategorie B inordent[1].

Naam[ännern | Bornkood ännern]

Dat is nich vullstännig kloor, woneem de Naam Edradour herkummt. Mööglich sünd twee verschedene Phrasen ut de schottisch-gäälschen Spraak. Dat eerste is Edred Dhobhar („De Stroom vun’n König Edred“), dat annere Eadar Dhà Dhobhar („Twüschen twee Strööm“). Dat tweete warrt ok in gäälsche Koorten as Oortsbeteken wiest un dorüm bi Touristen-Föhren as Oorsprung vun den Brenneree-Naam annahmen.

Historie[ännern | Bornkood ännern]

De Destille Edradour is wohrschienlich al 1825 vun en Genossenschop vun Buern grünnt worrn, üm den Egenbruuk to decken. Offiziell grünnt weer de Benneree 1837; to disse Tiet stünn de Naam to’n eersten mol in en Oorkunn. 1841 is de Genossenschop in John McGlashan & Co. ümnöömt worrn, as de Produkschoon nu för den Markt lopen de.

In’t Johr 1933 is Edradour vun William Whiteley & Co. övernahmen worrn, en Dochterünnernehmen vun de US-amerikaansche Grupp J.G. Turney & Sons. Dormit is Edradour Deel vun’t King Ransom worrn. 1982 is de Brenneree denn an Campbell Distillers Ltd. gahn, de to den Snaps-Kunzern Pernod Ricard höört. De eerste Single-Malt-Whisky ut de Destille is 1986 affüllt worrn. An’n 22. Juli 2002 is Edradour an den unafhangigen schottischen Affüller Signatory wieter verköfft worrn.

De Brenneree hett en egen Besöker-Zentrum, dat aver siet Januar 2010 blots noch gegen Intritt besichtigt warrn kann. Dorför drööft de Besökers aver dat Glas vun de Whiskyproov behollen.

Produkschoon[ännern | Bornkood ännern]

Brennblasen vun de Destille

Edradour tellt to de Whisky-Region Highlands. Ehr Water betütt se ut en Born an’n Mhoulin Moor. De Destille hett en Meeschfatt (mash tun) vun 1,25 t un twee Gäärfatten (wash backs) ut Douglasienholt vun jeedeen 5.000 l. Brennt warrt de Whisky in een Wash still vun 4.218 l un een Spirit still vun 2.179 l.

De Smack vun den Whisky is verscheden un hangt af vun den vörhigen Bruuk vun dat Lagerfatt. Vun’n Grundsatz her is Edradour en bannig kräftigen Whisky, de aver mit Noten vun Karamell ok ’n beten sööt smeckt.

Kiek ok[ännern | Bornkood ännern]

Literatur[ännern | Bornkood ännern]

  • Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
  • Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Borns[ännern | Bornkood ännern]

  1. Indrag in de schottischen Denkmollisten

Weblenken[ännern | Bornkood ännern]

Commons-logo.svg Edradour. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:56° 42′ N, 3° 42′ W