Ardmore (Brenneree)

Vun Wikipedia
Zur Navigation springen Zur Suche springen
Ardmore
Ardmore Distillery - geograph.org.uk - 27437.jpg

De Brenneree Ardmore (Foto: Greg Stringham)

Land Schottland
Region Highlands
Tyyp Malt
Status aktiv
Besitter Beam Global Spirits & Wine
Grünnt 1898
Grünner Adam Teacher
Waterborn Born an’n Knockandy Hill
Washstill(s) 4 x 15.000 l
Spiritstill(s) 4 x 15.000 l
Produkschoonsvolumen 5.200.000 l
Websteed www.ardmorewhisky.com

Ardmore is en Whisky-Brenneree bi Kennethmont, Aberdeenshire, Schottland. De Bowarken vun de Brenneree sünd in de schottischen Denkmollisten in de Kategorie B inordent.[1]

Historie[ännern | Bornkood ännern]

De Destille an’n Oortsrand vun Kennethmont is 1898 vun Adam Teacher grünnt worrn. 1955 is de Tall vun de Brennblasen vun twee op veer un 1974 denn op acht vergröttert worrn. 1976 is dat Ünnernehmen vun de Allied Breweries övernahmen worrn, de de Molteree dicht maakt hebbt. Allied Breweries is vun Hiram Walker övernahmen worrn un kregg denn den Naam Allied Distillers. Na 1993 güng de Firma an Pedro Domecq un de Naam weer in Allied Domecq ännert. An’n 5. Juli 2005 is dat Ünnernehmen denn an den Kunzern Pernod Ricard gahn. Man, üm de Oplagen vun’t Kartellamt natokamen müss dat Ünnernehmen de Ardmore-Brenneree wedder afgeven, so dat nu Beam Global Spirits & Wine, en Dochter vun de Fortune Brands, ne’e Besitter vun de Destille worrn is[2][3]. In’n Januar 2014 is bekannt wornn, dat Beam Global vun den japaanschen Kunzern Suntory övernahmen warrn schall. Dormit geiht denn ok Ardmore in den Besitt vun de Japaners över[4]. Bit ruchweg in’t Johr 2000 weern de Brennblasen noch direkt mit Kahlfüür hitt maakt.

Vun 1817 bit 1835 geev dat al mol en Destille mit den glieken Naam. Se leeg op dat Eiland Islay un weer vun Archibald Campbell grünnt. De Produkschoon weer vun 1821 bit 1823 ünnerbroken. 1837 is se mit de Brenneree Lagavulin tosamenleggt worrn. Mit de hüütige Ardmore-Benneree hett se aver nix to doon.

Produkschoon[ännern | Bornkood ännern]

Ardmore-Brenneree

Ardmore tellt to dat schottische Whiskyrebeet Highlands. Ehr Water nimmt se vun de Borns an’n Knockandy Hill. In de Brenneree gifft dat en Meeschfatt ut Eddelstahl vun 12,5 t un veerteihn Gäärfatten ut Douglasienholt to 90.000 l. Brennt warrt mit veer wash stills to 15.000 l un veer spirit stills vun de glieken Grött. Intwüschen warrt de Brennblasen mit Damp hitt maakt. De gröttste Deel vun den Whisky ut de Destille warrt för de Produkschoon vun Blend-Whiskys bruukt. Dat meiste geiht an Blend Teacher’s.

Kiek ok[ännern | Bornkood ännern]

Borns[ännern | Bornkood ännern]

  1. Indrag in de schottischen Denkmollisten
  2. Misako Udo: The Scottish Whisky Distilleries. Black & White Publishing, Edinburgh 2006. ISBN 1-845-02130-4
  3. Ingvar Ronde: Malt Whisky Yearbook 2008. MagDig Media Ltd., Shrewsbury 2007. ISBN 0-955-26072-8
  4. https://whic.de/blog/japaner-uebernehmen-laphroaig-und-ardmore/

Weblenken[ännern | Bornkood ännern]

Commons-logo.svg Ardmore. Mehr Biller, Videos oder Audiodateien to’t Thema gifft dat bi Wikimedia Commons.


Koordinaten:57° 21′ N, 2° 45′ W