Brennblaas

En Brennblaas oder Brennketel (engelsch: pot still) is en Hollfatt för de Destillatschoon vun nedderalkoholische un dröve Fletigkeiten mit 5 bit 15 Vol% to klore Spirituosen as to’n Bispeel Whisky oder Kunjak. Dorbi warrt de Destillatschoon as Brennen betekent. De Ketel warrt tomeist ut Kopper maakt.

Brennafloop[ännern | Bornkood ännern]

De Fletigkeit in de Brennblaas warrt so hitt maakt, dat de verschedenen Alkoholen un Aromastoffen verdampen doot. Je na Dicht vun den Stoff blifft de Damp siet un kondenseert an de Ketelwand, so dat he wedder in de Blaas torüchlopen deit, oder he geiht över den tyypschen Knick, kondenseert eerst dor un löpt denn in en Opfangfatt (to’n Bispeel en Spirit Safe). Dat Destillat, dat dorbi rutkummt, warrt faken dör mehrere Brenndörgäng na’nanner starker maakt. To’n Bispeel warrt schottische Whiskys tweefack un irische Whiskyes dreefack destilleert. Na den eersten Dörloop hett dat Destillat ruchweg 25 bit 35 Vol%. Vördem en Whisky in’n Fatt affüllt warrt, hett dat Destillat tomeist en Gehalt vun üm un bi 70 Vol%.

Bi eenige Brennblasen gifft dat in’n Hals ’n lütt Finster. So kann de Brennmeester kieken, dat de Fletigkeit, de mitünner schümen kann, nich to wiet hoochkaakt. Dat kann aver blots passeren, wenn in de Fletigkeit noch noog Proteinen binnen sünd. In den tweeten Dörloop warrt se dorüm nich bruukt.

Ut technische Sicht hett de Brennblaas en poor Nadelen. To’n Bispeel kann de Destillatschoon nich duersom aflopen, man de Blaas mutt för jeden Dörloop nee opfüllt un ophitt warrn. Dör den sieten Torüchloop is ok dat Frakschoneren, also wo scharp twüschen den Torüchloop un dat Destillat scheedt warrt, nich sünners goot. Dorüm mutt twee- oder dreemol brennt warrn, dat de Spirituoos rein un stark nooch warrt. Bi Meeschen vun hoge Gööd is dat aver ok wedder en Vördeel, vunwegen dat vele Bestanddelen, de den Smack utmaken doot, in’t Destillat blieft. För hoochweertige Spirituosen as Single-Malt-Whisky warrt dorüm ok hüüt noch de klass’sche Brennblaas bruukt.

Form[ännern | Bornkood ännern]

Brennblasen künnt vun de Form as ok vun de Grött her bannig ünnerscheedlich wesen. Gemeen hebbt se aver all den kugeligen, wuchtigen Foot, vun den na baven en ünnerscheedliche langen Hals afgeiht. Hals un Foot sünd dör en tosätzlichen Wulst oder dör en Taille vun’nanner scheedt. De Hals sülvst warrt na abaven hen jümmer dranger un knickt opletzt üm mehr as 90° na ünnen weg.

Rechtsfragen[ännern | Bornkood ännern]

Dat Bedrieven vun en Brenneree is blots na de Brennereeornen mööglich. Dat is en Anlaag to dat Brannwienmonopol. Na § 46 vun’t Brannwienmonopolgesett^[1] in Verbinnen mit § 227 vun de Brennereeornen sünd private Lüüd dorvun free, Brennblasen bi’n Toll antomellen, solang se en Hööchstvolumen vun 0,5 l nich överstiegen doot. Dat befreet aver nich togliek ok vun de Brannwienstüer. Wo hooch de Stüer is, kann bi’t tostännige Hööfttollamt nafraagt warrn.