Kings of the Sun
| Filmdaten | |
|---|---|
| Plattdüütsch Titel: | — |
| Originaltitel: | Kings of the Sun |
| Düütsch Titel: | Könige der Sonne |
| Produkschoonsland: | USA |
| Johr vun’t Rutkamen: | 1963 |
| Läng: | 107 Minuten |
| Originalspraak: | Engelsch |
| Öllersfreegaav in Düütschland: | FSK 12 |
| Filmkru | |
| Speelbaas: | J. Lee Thompson |
| Dreihbook: | Elliott Arnold James R. Webb |
| Produkschoon: | Lewis J. Rachmil |
| Musik: | Elmer Bernstein |
| Kamera: | Joseph MacDonald |
| Snitt: | William Reynolds |
| Kledaasch: | Norma Koch |
| Dorstellers | |
| |
Kings of the Sun (op platt so veel as „Königen vun de Sünn“; dt. Titel: Könige der Sonne) is de Titel vun en US-amerikaanschen Monumental- un Aventüerfilm ut dat Johr 1963. Speelbaas weer J. Lee Thompson. De Ooropföhren vun den Film weer an’n 18. Dezember 1963, in Düütschland is he al twee Daag later in de Kinos kamen.
Inholt
[ännern | Bornkood ännern]De Film fangt mit en Dorstellen vun de Maya-Kultur an, vör allen op den religiösen Bruuk Minschenopper to bringen, üm dat de Gödder tofreden stellt warrt. De Geschicht geiht dormit los, dat en Volk ut’n Westen ünner dat Regeer vun den König Hunac Ceel kummt, de de Königrieken vun de Maya een na’n annern innehmen deit. Vun wegen dat se Iesenwapen hebbt, künnt de Maya gegen jem mit jemehr Holtswerter nich an. Un so kamt se een Dag ok in dat Riek Chichén Itzá. De König vun de Maya warrt bi de Slacht doodslahn un so warrt sien Söhn Balam de ne’e Anföhrer. Gegen den Willen vun den Hoochpriester Ah Min föhrt Balam sien Volk na de Küst. Man de Kriegers vun Hunac Ceel sett jem na un dwingt de Mayas so, över de See uttoneihn.
Na eenige Tiet kamt se so in Noordamerika an, woneem se sik in Freden daallaten wüllt. Tosamen boet sik dat Volk en nee Dörp torecht, un Balam versöcht dorbi ok glieks, mit Deelen vun den ollen Bruuk, vör allen de Minschenopperee, to breken. De Priesters sünd dormit natürlich gor nich inverstahn. Dat Rebeet, woneem de Maya jemehr ne’e Wahnsteed boet hebbt, liggt aver in de Neeg vun en Indianerstamm ünner dat Regeer vun den Hööftling Black Eagle. Bi’t utspioneern dröpt Black Eagle op en Grupp vun Maya un grippt jem an. So kummt dat to en Kamp twüschen em un Balam. De Indianer warrt aver vun Balam sien Lüüd fangen nahmen. Na den Willen vun de Priesters schall Black Eagle för de Gödder oppert warrn, man dorto mutt Ixchel, de Bruut vun Balam, em eerst wedder gesund plegen, vun wegen dat en Kreger em meist afsteken hett. Wohrhaftig verkiekt sik Black Eagle in de smucke Ixchel. Vun wegen dat Balam nix mehr vun dit barbaarsche Bruukdom vun’t Minschenopper weten will, kann he hinnern, dat de Indianer wohrhaftig oppert warrt.
Balam lett Black Eagle free un seggt, dat he Freden mit de Indianers söcht. Ofschoonst de kulturellen Ünnerscheden jem noch ’n Tiet lang in’n Weg staht, warrt se opletzt Frünnen mitenanner. Se besluut nu, dat jemehr Völker in Freden blangen’nanner leven schüllt un künnt dorvun ok jemehr Völker övertügen. In de Twüschentiet sünd Hunac Ceel un sien Lüüd ok bit ne Noordamerika kamen. Jemehr Teel is, dat Volk vun Balam tonichten to maken. Se griept dat Dörp vun de Maya an, man mit de Help vun den Indianerstamm warrt se ditmol torüchslahn. An’t Enn kummt dat to’n Kamp twüschen Hunac Ceel un Balam. Black Eagle reddt sien ne’en Fründ dat Leven, man dorbi warrt he sülvst swoor drapen un blifft dood. De Angriepers aver warrt verdreven.
Kritiken
[ännern | Bornkood ännern]- Dat Lexikon vun’n internatschonalen Film hett den Film as „pseudohistoorsche Ünnerholen, mit groten materiellen Opwand, man ahn Anspröök inszeneert“[1] beschreven.
- De Tietschrift Variety loov de „starke Autorität“ vun’n Hööftdorsteller Brynner. De Regie warrt as „sprunghaft un achteranlopen“ betekent, man de Kampszenen weern mit veel „Swung un Fantasie“ ümsett[2].
- De New York Times seeg den helen Film negativ: „J. Lee Thompson, der Regisseur der im letzten Jahr den ahnungslosen Kinobesuchern zur Weihnachtszeit "Taras Bulba" unterschob, schlug wieder zu“[3].
Anners wat
[ännern | Bornkood ännern]De Film is vun de Mirisch Corporation vullstännig in Mexiko dreiht worrn. Dreihöörd weern de Tempelanlaag Chichén Itzá op dat Halfeiland Yucatán, de Stadt Mazatlán an’n Pazifik as ok de Churubusu-Studios in Mexiko-Stadt.
As Verteller is in de Originalfaten vun den Film James Coburn to hören. In de düütsche Synchronisatschoon weer dat Gert Günther Hoffmann.
Weblenken
[ännern | Bornkood ännern]- Kings of the Sun in de Internet Movie Database (engelsch)