Kark Ohlers
De Kark in Ohlers is dat Karkengebüüd von dat evangeelsch-luthersche Kaspel Ohlers (Karkenkreis Buxthu). Se steiht an de Stoder Straat 33 (L 124).
Historie
[ännern | Bornkood ännern]Över de eerste Kark is nix bekannt. In’n Dörtigjohrigen Krieg is de Kark toschannen richt worrn. De Vörgänger von de hüdige Kark in Ohlers is 1656 ut de Resten von ehren Vörgänger boot worrn. Üm 1860 weer disse Kark ok wedder verfullen un to lütt, nadem Ohlers temlich wussen weer. Von 1862 bet 1865 is dorüm na Plaans von Edwin Oppler en ne’e Kark in’n Stil von de Neegotik boot worrn. Oppler weer Jood un dat weer de eenzige Kark, de he boot hett. He hett ans veel Synagogen boot. Dat Gebüüd ut Backsteen hett een Schipp un veer Jück. Dat gifft en Choor un en 28 Meter hogen Westtoorn. De Kösten weren 9370 Daler.[1] Grote Spennen kemen ünner annern von’n Koopmann Friedrich Huth (300 Daler), von’n Patroon von de Kark, Graaf Eduard von Kielmansegg von Good Wiegersen (750 Daler) un von’n hannöverschen König Georg V. (500 Daler).[1] Den König siene Fro Marie hett de Buntglas-Finstern för den Altorruum stift.[1] De König un Kroonprinz Ernst August weren ok bi de Inwiehung von de Kark an’n 12. November 1865 dorbi.[1]
De Buntglas-Finstern sünd 1944 dör Bummensplinter deelwies tweigahn un dor sünd ne’e Finstern insett worrn.
De Toornklock is 1909 inboot worrn.
Dat Altorbild wiest Jesu Geboort, Krüzigung un Opstahn. De Künstler Bergmann ut Hannover hett dat Bild 1865 de Kark schenkt.
De öllste Klock weer von 1639 un hett bet 1909 in’n Toorn hungen. Se hett 580 Pund wagen un harr de Inschrift Anno 1639 gegossen durch M. Pawal in Lüneburg. In dat Johr hett de Kark twee ne’e Klocken kregen, de 1045 kg un 623 kg wagen hebbt. Von de twee Klocken is een 1916 in’n Eersten un een in’n Tweten Weltkrieg insmölt worrn. De Klock, de 1916 insmölt worrn is, warrt 1934 ersett. Dat hüdige Klockenwark mit veer Klocken hett de Kark 1959 kregen.
Örgel
[ännern | Bornkood ännern]De Örgel von 1865 is von Johann Hinrich Röver boot worrn. De Prospektpiepen ut Tinn müssen 1916 in’n Eersten Weltkrieg afgeven warrn. Eerst 1927 sünd ne’e Piepen inboot worrn. In dat Johr hett de Örgel ok en Motoor kregen, dat keen Balgenpedder mehr nödig weer.
Dör dat Böten von de Kark hett sik de Örgel vertagen un hett ehren Klang verännert. 1970 is de Örgel dorüm verköfft worrn un steiht nu in de Lambertus-Kark in Karktimk. Ohlers hett en ne’e Örgel kregen, de von Hermann Eule Orgelbau Bautzen boot worrn is. De Örgel hett twee Manuals un 16 Registers.[2]
Pastoorn
[ännern | Bornkood ännern]- 1760–: Martin Kratzsch
- ~1890: Arfken
- 1932–1961: Haar
- 1963–1975: Baden
- 1. Februar 1976–1984: G. Ostermeier
- 1. Juli 1984–Juni 1995: Willi Kalmbach
- Juli 1995–November 2009: Jürgen Riepshoff
- September 2010–: Detlef Beneke
Kaspel
[ännern | Bornkood ännern]To dat Kaspel Ohlers höört de Öörd Ohlers, Ottendörp, Klethen, Bokel, Ohrenswohl, Wangersen, Lütt Wangersen, Hogenhusen un Ohrensmoor.
De Naverkaspels sünd Bargst in’n Noordwesten, Harsfeld in’n Noordoosten, Obbens in’n Oosten, Zittens in’n Süüdoosten, Heeßel in’n Süüdwesten un Sürsen in’n Westen.
Footnoten
[ännern | Bornkood ännern]- ↑ a b c d Ahlerstedter Kirche steht seit 150 Jahren im Ort, Stader Tageblatt von’n 1. Juli 2015
- ↑ http://www.orgel-information.de/Deutschland/A/af-aj/Ahlerstedt_Ev.html
Weblenken
[ännern | Bornkood ännern]- Websteed von de Karkengemeen Ohlers (hoochdüütsch)
Koordinaten:53° 24′ N, 9° 27′ O