Friedrich Huth (1777–1864)

Johann Friedrich Andreas Huth (in England kennt as Frederick Huth; * 29. Oktober 1777 in Stood; † 14. Januar 1864 in London) weer en engelschen Banker mit düütsche Wuddeln in dat Königriek Hannover.

Huth is 1777 as Söhn von Marie Amalie, borene Thee (1749–1812), un Johann Friedrich Gabriel Huth (1751–1800) in Stood boren, aver in Harsfeld opwussen. De Vader weer Musketier in dat 12. Infanterieregiment von dat Kurförstendom Bruunswiek-Lümborg un hett in Harsfeld denn as Snieder arbeidt. Huth hett later en Lehr as Koopmann in Hamborg maakt, bi en spaansche Firma ut La Coruña ünner Leid von Juan Antonio Urbieta. Ok de Hannelsakademie Hamborg hett he besöcht. Later hett he ok direkt in La Coruña arbeidt. 1805 hett he sik as Im- un Export-Koopmann sülvstännig maakt un is 1809 na England översiedelt. He hett dor in London de Firma Frederick Huth & Co hatt, de toeerst in’n Im- un Export aktiv weer, över de Tied aver ok to en Hannelsbank worrn is.

In’n Juni 1819 is Huth engelschen Staatsbörger worrn.

Huth hett an’n 11. Januar 1806 in La Coruña Manuela Felipa Lorenza Mayfren (10. Januar 1785–13. September 1856) freet. De beiden harrn de Kinner Charles Frederick (7. November 1806–11. März 1895), Fernando (16. Oktober 1808–28. August 1826), Amelia (7. Oktober 1810–10. Dezember 1887), Johanna (7. Oktober 1810–Oktober 1896), Louisa Francesca (10. September 1812–13. Mai 1849), Manuella (27. März 1814–10. September 1887), Henry (30. Juli 1815–11. Dezember 1878), Ann (20. Januar 1817–2. Januar 1879), Maria (20. Januar 1817–2. April 1868), Edward (30. Mai 1819–26. April 1844) un Louis (22. März 1821–12. Dezember 1905).

Huth is 1864 doodbleven un op’n Karkhoff von Kensal Green begraven worrn.

In Harsfeld sünd vondaag na em de Friedrich-Huth-Straat un de Friedrich-Huth-Bökeree nöömt.

Literatur

• Andrew John Murray: Home from the Hill. A biography of Frederick Huth. 'Napoleon of the City'. London 1970, ISBN 0241019168