Karkenkreis Oosterholt

De evangeelsch-luthersche Karkenkreis Oosterholt-Scharmbeek is en Karkenkreis in Neddersassen. He höört bi’t Sprengel Stood von de Evangeelsch-luthersche Landskark Hannover. To’n Karkenkreis Oosterholt-Scharmbeek höört üm un bi 60.000 Liddmaten in 20 Kaspels. Supperndentin is siet 2004 Jutta Rühlemann. De Karkenkreis hett sien Seet in Oosterholt-Scharmbeek.

Geografie

De Karkenkreis Oosterholt-Scharmbeek liggt in’n Noorden von Neddersassen. Dat Rebeed höört to’n Landkreis Oosterholt.

De Karkenkreis Oosterholt-Scharmbeek grenzt in’n Noordoosten an’n Karkenkreis Bremervöör-Zeven, in’n Süüdoosten an’n Karkenkreis Rodenborg un den Karkenkreis Veern, in’n Süüdwesten an dat Rebeed von de Breemsche Evangeelsche Kark, in’n Westen an’n Karkenkreis Wersermasch von de Evangeelsch-luthersche Kark in Ollnborg un in’n Noordwesten an’n Karkenkreis Wersermünn.

De Karkenkreis hett sik 1948 billt, as de ole Supperndentur von’n Karkenkreis Lesum na Oosterholt leggt worrn is. An’n 1. Januar 1949 sünd de Gemenen Aumund, Blomendal, Grohn un Lesum na de Breemsche Evangeelsche Kark wesselt. To’n Karkenkreis Oosterholt hebbt denn blots noch de Kaspels Brook, Hambargen, Meyenborg, Oosterholt, Hu’e, Scharmbeek un Swonewebel tohöört.

An’n 1. Januar 1970 is de Karkenkreis Leendaal mit’n Karkenkreis Oosterholt tohoopleggt worrn.