Herman Jex
Herman Jex (* 25. Dezember 1923 in Belize-Stadt) is en Politiker ut Brietsch-Honduras (PUP, HIP).
Leven
[ännern | Bornkood ännern]Jex is 1923 as tweet Kind von Eugenie Jex Mapp un den Polizeibeamten Henry Jex in Belize-Stadt boren un weer op de Holy Redeemer Boys' School in Belize-Stadt.[1][2] He weer Mechaniker, Boxer un Farmer un hett von 1945 bet 1952 för de Belize Estate and Produce Company arbeidt.[1] Later weer he Boinschenör.[2]
Jex weer in de People’s United Party (PUP) un de General Workers’ Union (GWU) aktiv un is 1952 Viez-Präsident un 1953 Präsident von de GWU worrn.[1]
Bi de Parlamentswahl in Brietsch-Honduras 1954 weer he Kannedaat för de PUP in’n Wahlkreis Belize-Land un hett de Wahl mit 51,8 % von de Stimmen gegen den unafhängigen Fred Hunter un M. B. L. Wilson von de NP wunnen.
Dormit weer he von 1954 bet 1957 Maat von de Legislativversammlung.[1] He weer in düsse Tied Member for Public Utilities (Vörlöper von dat Amt as Minister för Apentliche Versorgung).[2]
1956 hett binnen de PUP de Flögel ünner George Cadle Price de Bavenhand kregen un Price hett den Parteivörsitt von Leigh Richardson övernahmen. Dorüm sünd Jex un en Reeg annere Maten von’n Richardson/Goldson-Flögel ut de PUP rut un hebbt an’n 4. Oktober 1956 de Honduran Independence Party (HIP) grünnt.
Bi de Wahl 1957 weer Jex Kannedaat för de HIP in’n Wahlkreis Belize-Land un hett 19,2 % von de Stimmen kregen. Dormit is he achter Louis Sylvestre von de PUP un vör Lindsay Burns von de NP op’n tweten Platz kamen.
In dat Johr 1966 is Jex na Jamaika tagen un hett dor bet 1970 arbeidt.[2] 1970 is he na New York in de USA tagen, wo al en Deel von de Familie leven dee.[2] In en Öller von 60 is he na Atlanta tagen.[2]
