Hannie Caulder

Filmdaten
Plattdüütsch Titel:	—
Originaltitel:	Hannie Caulder
Düütsch Titel:	In einem Sattel mit dem Tod
Produkschoonsland:	Großbritannien
Johr vun’t Rutkamen:	1971
Läng:	85 Minuten
Originalspraak:	Engelsch
Öllersfreegaav in Düütschland:	FSK 18
Filmkru
Speelbaas:	Burt Kennedy
Dreihbook:	Peter Cooper Burt Kennedy (as Z.X. Jones)
Produkschoon:	Patrick Curtis
Musik:	Ken Thorne
Kamera:	Edward Scaife
Snitt:	Jim Connock
Dorstellers
Raquel Welch: Hannie Caulder Ernest Borgnine: Emmett Clemens Jack Elam: Frank Clemens Strother Martin: Rufus Clemens Robert Culp: Thomas Luther Price Christopher Lee: Bailey Steven Boyd: Revolvermann Diana Dors: Madame Sam Adams: Brian Lightburn Aldo Sambrell: Mexikaansch Captein

Hannie Caulder (dt. Titel: In einem Sattel mit dem Tod) is de Titel vun en britschen Italowestern ut dat Johr 1971. De Hööftrull speelt Raquel Welch. Speelbaas weer de US-Amerikaner Burt Kennedy.

Inholt

De dree Clemens-Bröder Emmett, Frank un Rufus leegt sik jümmers to in de Wull. As de dree tohopen en Bank utroven wüllt, geiht dat scheef un se mööt vör de mexikaanschen federales utneihn. Se kamt bit na en WEesselstatschoon för Peerd, woneem Jim Caulder sien Deenst maakt. As he nafraagt, wat de dree wüllt, warrt he ahn Grund vun Rufus afknallt, de jümmers gau mit sien Gewehr bi de Hand is. Eh se wieterrieden doot, vergaht se sik all dree noch an Caulder sien hübsche Fro Hannie un bööt dorna de Statschoon an.

’N beten later duukt de Koppgeldjager Price an de Statschoon op, de hier frisch Water opfüllen will. Hannie sleiht em daal, üm mit sien Peerd un sien Wapens uttobüxen, lett dat aver denn doch blieven. An de Steed seggt se frömmen Rieder, dat he ehr dat Scheten bibringen schall. Eerst verseggt he ehr dat, man as he höört, wat ehr passeert is, gifft he na. He lehrt ehr, woans se mit Scheetwapen ümgahn mutt. ümdat se torüchbetahlen kann, wat ehr andoon worrn is. Liekers versöcht he jümmer wedder, ehr vun ehrn Plaan aftobringen.

Tosamen maakt se sik op’n Weg na den Gewehrmaker Baileys, de an de mexikaanschen Küst leevt. De schall för Hannie en Revolver maken. De Twüschentiet nütt de junge Fro, üm sik vun Price dat Scheten bibringen to laten. As mexikaansche Banditen na Bailey sien Goot kamt kummt dat to en Gefecht. To’n eersten mol schütt Hannie op en Minschen. Se mutt dorbi faststellen, dat dat nich so licht is, en Minsch doodtoscheten, as se dacht hett.

Na maakt se sik op de Söök na de Clemens-Bröder un riedt torüch in de Vereenigten Staaten. Dor kamt se in en lütte Stadt ünner, woneem de dree Bröder noch den glieken Dag indrapen doot. As Price versöcht, sik dat Koppgeld för Frank Clemens to verdenen warrt he vun den sien beiden Bröder överrascht, de jüst ut’n Saloon kamt. Emett smitt en Worpmess op Price un besehrt em so swoor, dat he doran doodblifft.

De Bröder blieft in de Stadt un ahnt nix. Nu aver, is Hannie an de Reeg, jem ahn Nasehn allns torüch to betahlen. As eersten geiht se op Frank daal. As vörher al in Mexiko, tögert se aver, as dat dorüm geiht, Frank doot to scheten. So kann de Bandit ehr noch dör en Schööt an de Schuller striepen, eh he doodblifft. As se inköpen will, warrt se vun Rufus överrascht. De troet ehr aver nix to un betahlt sien Verdoon mit sien Leven. Vör de Stadt kummt dat to’n Showdown mit Emmett Clemens. En frömmen Mann in swarte Kledaasch, de al bi Bailey en Oog op Hannie smeten harr, reddt ehr dorbi dat Leven. Opletzt kummt dat to’n Duell twüschen Hannie un Emmett, dat se winnen deit. In de Slussszeen ritt se an de Siet vun den Frömmen in Swart weg.

Kritik

• dvd-palace.de: Die Produktion der „Tigon British Film Productions“, die sich vor allem im Horror- und Exploitationbereich mit Filmen wie „Der Hexenjäger“ einen Namen gemacht hatten, versammelt hier eine erlesene Darstellerriege für einen … Western im schmutzigen Italo-Stil. (…) Die Inszenierung von „In einem Sattel mit dem Tod“ kommt zackig und kurzweilig daher, erfreut den Genre-Fan mit rustikalen, schnörkellosen Schießereien und lässt auch den Humor nicht … außen vor. Dieser wirkt aber … etwas dezplaziert (sic!), da der Film eigentlich sehr ernst und manchmal auch brutal ist. Gedreht wurde durchweg im spanischen Almería…

• Joe Hembus in’t Western-Lexikon: Der Film dreht sich in der Hauptsache um Raquel Welchs Poncho (wenn es ans Ziehen geht, muß sie ihn immer erst hochschlagen), um ihre Körperlichkeit ("Sie würde was darum geben, ein Mann zu sein."- "Sie wird es nie schaffen.") und um den Sieg der Emanzipation.

Anners wat

Dat Leed Life’s never peaceful warrt, so as ok dat Titelleed, vun Bobby Hanna sungen.

Weblenken

• Hannie Caulder in de Internet Movie Database (engelsch)