Grootflunken

Vun Wikipedia
Zur Navigation springen Zur Suche springen
Grootflunken; Modderflegen
Allerhand Grootflunken
Systematik
Stamm: Liddfööt (Arthopoda)
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten (Insecta)
Ünnerklass: Fleeginsekten (Pterygota)
Böverornen: Neeflunken (Neoptera)

ahn Rang: Nettflunken-Insekten
Ornen: Grootflunken (Megaloptera)
Wetenschoplich Naam
Neuropteroidea
Latreille, 1802

De Grootflunken (Megaloptera), ok Modderflegen nömmt, sünd en Ornen mank de Insekten. Ehre neegsten Verwandten sünd de Nettflunken (Neuroptera) un de Kamelhalsflegen (Raphidioptera).. Vun 328 Aarden, de bitherto beschreven wurrn sünd (Stand 2008), leevt in Westeuropa bloß man sess. In’t ööstliche Europa kaamt dor noch fiev Aarden to.[1]. Dat Lief is bi de Deerter twuschen 23 un 35 Millimeters lang, man de Aart Acanthocorydalus kolbei kann bit hen to 70 mms lang weern un de Flunken bit hen to 160 mms wiet ut’neen spannen.

Kennteken[ännern | Bornkood ännern]

De Grootflunken hefft en tämlich weeke Huud un sünd man wat lange Insekten. De Föhlspriete sünd lang mit allerhand Le’e, all vun desülvige Form. De Facettenogen sünd middelgroot, bi de Familie Sialidae fehlt de Lüttogen (Ocelli). Vör- un Achterflunken sünd um un bi liek groot un seht ok meist liek ut. Up de Flunken sünd düütlich Adern to sehn, de as en Nett over jem henlopen doot. Wenn de Flunken nich bruukt weert, weert se as en Dack over’t Lief tosamenfoolt. De meisten Aarden könnt nich good flegen un sünd ok nich lang in’e Luft unnerwegens. Bi de wecken Aarden ut de Unnerfamilie Corydalinae ut Noordamerika (Corydalus) un Asien (Acanthacorydalis) sünd de Mundwarktüge wat langer, un laat na Sabels. De Grund is unbekannt, denn de Deerter freet nix. So warrt annahmen, dat harr wat mit sexuelle Selektschoon to doon. Wenn de Deerter utwussen sünd, leevt se mank de Planten an’t Över vun de Waters, wo se vördem al as Larven in leevt harrn. Se drinkt bloß en beten un freet nix. Leven doot se nich veel langer, as man knapp een Week. Paaren doot se sik up’e Eer. De Seken leggt 300-900 (af un to mol bit hen to 2.000) Eier an allens, wat hart un nich wiet vun’t Water af is, u.a. an Reit, man ok an Holt oder Steen. Wenn de Budden just utkrapen sünd, laat se sik in’t Water fallen un leevt dor de eerste Tied vun ehr Leven in.

Budden[ännern | Bornkood ännern]

Budde vun Sialis lutaria.

All Budden leevt as Rövers in’t Water un freet allerhand Leevwesen, de se dor andrepen doot, as de Budden vun annere Insekten oder Ringelwörmer. Dat duert een oder twee Johre, bit se sik verpoppen doot un dat Water verlaat. In kole Bargseen kann dat ok dree Johre duern, bi de wecken Chauliodinae in Waters, de to Tieden utdrögen doot, kann dat ok bit hen to fiev Johre duern. Negenmol treckt se bi dat Utgreien ehre Huud ut.

Systematik vun de Grootflunken[ännern | Bornkood ännern]

De Aarden weert in twee Gruppen updeelt:

  • Fam. Corydalidae. Amerika, Süüdoostasien, Süüdafrika un Australien (bloß Chauliodinae).
    • Unnerfam. Corydalinae. 131 Aarden.
    • Unnerfam. Chauliodinae. 116 Aarden.
  • Fam. Sialidae. 81 Aarden. Sunnerlich in nöördliche un middelste Breden in Noordamerika, Europa, Noordasien.

In de Gemarken vun de Europääsche Union sünd bitherto düsse Aarden funnen wurrn:

De Unnerfamilien vun de Corydalidae weert vun de wecken Taxonomen as egenstännige Familien ankeken. Bi en Studie up Grundlaag vun de DNA in de Mitochondern is rutkamen, datt sik dat bi de Grootflunken um en Monophylie hanneln deit. [2]. De Sustergruppen vun de Grootflunken sünd de Nettflunken (Neuroptera).

Fossile Belege[ännern | Bornkood ännern]

Fossile Belege sünd man roor. De ollsten stammt ut dat bövere Perm, annere finnt sik in Barnsteen ut dat Eozän oder Mesozoikum (Bövere Kried).[3][4]

Kiek ok bi[ännern | Bornkood ännern]

Belege[ännern | Bornkood ännern]

  1. T. S. Vshivkova: Sialidae (Megaloptera) of Europe and the Caucasus. In: Entomological review. 64(2) 1985, S. 86–98.
  2. Yuyu Wang, Xingyue Liu,Shaun L. Winterton, Ding Yang (2012): The First Mitochondrial Genome for the Fishfly Subfamily Chauliodinae and Implications for the Higher Phylogeny of Megaloptera. PLoS ONE 7(10): e47302.
  3. Weitschat & Wichard: Atlas der Pflanzen und Tiere im Baltischen Bernstein. München 1998.
  4. Müller: Lehrbuch der Paläozoologie. Band II, Teil 3, Jena 1978.

Literatur[ännern | Bornkood ännern]

  • Matthew R. Cover, Vincent H. Resh: Global diversity of dobsonflies, fishflies, and alderflies (Megaloptera; Insecta) and spongillaflies, nevrorthids, and osmylids (Neuroptera; Insecta) in freshwater. In: Hydrobiologia. 595 (2008): S. 409–417.
  • J. M. Elliott: British freshwater Megaloptera and Neuroptera. A key with ecological notes. In: Freshwater Biological Association Biological Publication. No. 54 (1996), ISBN 0-900386-56-8
  • Johann Gepp: Erforschungsstand der Neuropteren-Larven der Erde (mit einem Schlüssel zur Larvaldiagnose der Familien, einer Übersicht von 340 beschriebenen Larven und 600 Literaturzitaten). In: J. Gepp, H. Aspöck, H. Hölzel (Rutg.): Progress in World's Neuropterology. Graz 1984, S. 183–239.

Weblenken[ännern | Bornkood ännern]

Commons-logo.svg Grootflunken. Mehr Biller, Videos oder Audiodateien to’t Thema gifft dat bi Wikimedia Commons.