Larve

Vun Wikipedia
Larve vun en Blaugröne Mosaikjumfer

Larve (vun lat. larva Pl. larvae) betekent in de Zoologie en Twuschenform up den Weg vun dat Ei hen to dat adulte Deert. Se finnt sik bi Deerter, de dör en Metamorphose dörgaht. An un for sik weer Larve de Utdruck for en Schabellenkopp oder for en Gespenst.

De wichtigsten Deertergruppen mit en Statschoon as Larve sünd de Insekten un de Amphibien. De Larven vun Poggen weert Pielepoggen oder Steertpoggen nömmt, bi Bandwörmer heet de Larven Finnen. Bi Insekten gifft dat Budden (oder Maden) un Rupen. Ok bi allerhand Fisch, de Eier leggen doot, gifft dat een oder twee Statschonen as Larve.

Larven verscheelt sik in Leven un Utsehn faken bannig vun dat adulte Deert. So leevt de Larven vun Steekmuggen un Goldpeer in't Water, man dat adulte Deert leevt an Land oder fluggt dör de Luft. Wenn de Larven nich anners utseht, as de Olen (bloß lüttjer), weert se Nymphe nömmt.

De Tied as Larve kann bi de wecken Aarden den gröttsten Deel vun dat Leven utmaken. So leevt de Maibudde twee bit fiev Johre unner de Eer, de adulte Maikäver hett avers bloß en poor Weken. Extrem sütt dat ut bi de Maiflegen. Wenn se umwannelt wurrn sünd to de adulte Flege, leevt se man bloß noch en poor Stunnen. Fudderhen gifft dat ok Aarden, dor könnt al de Larven sik vermehren un verwannelt sik gor nich eerst in en adulte Form. Dor warrt denn vun Neotenie snackt, as bi den Axolotl ut Mexiko.

Literatur[ännern | Bornkood ännern]

  • Detlef Bückmann: Über den Verlauf und die Auslösung von Verhaltensänderungen und Umfärbungen erwachsener Schmetterlingsraupen. In: Biologisches Zentralblatt. Bd. 72, Heft 5/6, 1953, S. 276–311.

Weblinks[ännern | Bornkood ännern]

Larven. Mehr Biller, Videos oder Audiodateien to’t Thema gifft dat bi Wikimedia Commons.