Good Freeschluunbarg
Dat Good Freeschluunbarg (hoochdüütsch Gut Freschluneberg) weer en Eddelgood in dat Dörp Freeschluunbarg (vondaag Oortschop Luunst in de Gemeen Beverst, Landkreis Cuxhoben, Neddersassen).
Historie
[ännern | Bornkood ännern]Dat Good hett de Familie von Luunbarg tohöört.[1] De eerste Besitter, de dör de Oorkunnen nawiest is, weer 1579 Heineke von Luunbarg.[1] Üm 1600 rüm hett Heineke en neet Goodshuus boot.[1]
As Johann von Luunbarg 1641 doodbleven is, is dat Good an de Dochter Elisabeth Wolbrich von Luunbarg gahn, de Caspar Heinrich von Krough freet hett.[1]
An Stillfreedag 1725 is dat Goodshuus bi en Gewidder afbrennt.[1] De Familie von Krough is dorüm to Sabine Maria von Krough ehren Süstersöhn Hans von der Wisch in Beverstermöhlen tagen.[1] Dorför is de Süstersöhn Caspar Heinrich von der Wisch op dat Good Freeschluunbarg tagen, de dat later arvt hett.[1] Caspar Heinrich sien Grootsöhn, de ok Caspar Heinrich heten hett, müss dat Good 1837 denn aver verköpen.[1] Köper weer för 40.000 Rieksdaler de Oberst Hinrich Karl von Rettberg ut Stood, de dat Good dör den Verwalter Peter Roes hett bewirtschaften laten.[1] Sien Söhn Wilhelm von Rettberg hett dat Good an’n 1. September för 27.500 Rieksdaler verköfft an Johann Friedrich Müller ut de Familie Müller, de ok de Watermöhl in Hu’e bedreven hett.[1]
Dat Goodshuus weer to de Tied 192 Foot (55,68 m) lang un 45 Foot breed (13 m) un dormit een von de gröttsten Neddersassenhüüs in de Provinz Hannover.[1] Dat is an’n 17. Juli 1895 afbrennt.[2] Noch in dat sülvige Johr is dat Goodshuus nee boot worrn na Plaans von’n Geestmünner Bomeester Georg Hoffmeyer.[2]
As Besitter Georg Müller 1922 doodbleven is, weren siene Kinner noch nich grootjohrig.[1] Dorüm hett Heinrich Müller von Good Wachholt de Verwaltung von’n Hoff övernahmen.[1] 1926 kunn denn Heinz Müller den Hoff övernehmen.[1]
De Familie Müller hett op’n Hoff Melkkeih hollen.[1] 2003 is de Hoff utsiedelt na buten dat Dörp.[1] De ole Hoffsteed von dat Good hett 2006 de Familie Wulf köfft, de dor nu Welsh-Ponys tüchten deit.[1]
Goodsherrn
[ännern | Bornkood ännern]- –1609: Heineke von Luunbarg
- 1609–: Christoffer von Luunbarg
- –1641: Johann von Luunbarg
- –1697: Caspar Heinrich von Krough
- 1697–1718: Elisabeth Wolbrich von Krough
- 1718–: Christoph von Krough
- –1773: Caspar Heinrich von der Wisch
- 1773–: Eibe Siade Johannes von der Wisch
- –1837: Caspar Heinrich von der Wisch
- 1837–1844: Hinrich Karl von Rettberg
- 1844–1847: Wilhelm von Rettberg
- 1847–: Johann Friedrich Müller
- –1922: Georg Müller
- 1926–1962: Heinz Müller
- 1962–: Georg Müller
Verwaltungsgeschicht
[ännern | Bornkood ännern]Dat Good hett vör 1851 to de Huusvaagdie Bexhöv in dat Gericht Beverst tohöört, von 1851 bet 1859 to dat Amt Beverst un denn von 1859 bet 1885 to dat Amt Leh. Na 1885 weer dat in’n Kreis Geestmünn.
Dat Good weer fröher Deel von de Gemeen Freeschluunbarg, de 1968 mit Westerbeverst to de Gemeen Luunst tohoopleggt worrn is. To’n 1. November 2011 is de Samtgemeen Beverst to de Eenheitsgemeen Beverst tohoopleggt worrn. Sietdem billt Luunst en Oortschop binnen de Gemeen.
Inwahnertall
[ännern | Bornkood ännern]| Johr | Inwahners |
|---|---|
| 1848[3] | 9 Lüüd, 1 Huus |
Religion
[ännern | Bornkood ännern]Dat Good is evangeelsch-luthersch präägt un höört to dat Kaspel von de Fabian-un-Sebastian-Kark in Beverst.
Footnoten
[ännern | Bornkood ännern]- ↑ a b c d e f g h i j k l m n o p q Mathilde Müller: Geschichte des Rittergutes Freschluneberg und seiner Besitzer
- ↑ a b Rittergut Freschluneberg
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 149
Koordinaten:53° 26′ N, 8° 44′ O