Gallon Jug

Vun Wikipedia
Zur Navigation springen Zur Suche springen

Gallon Jug is en Farm in’n Distrikt Orange Walk von Belize.

Geografie[ännern | Bornkood ännern]

Gallon Jug liggt merrn in’n Oorwoold. Spanish Lookout in’n Süden is en beten över 20 Kilometer weg, Tres Leguas/Blumenthal in’n Noorden un Indian Creek in’n Noordoosten 35 Kilometer un dat Rebeed von Lagoon Bank in’n Süüdoosten knapp 30 Kilometer. In’n Westen is de Grenz von Guatemala teihn Kilometer wied weg. Na Westen to gifft dat aver in Belize un ok in Guatemala gorkeen Öörd.

Na Noorden to liggt de Laguna Seca un de Rio Bravo, de över Booth’s River in’n Hondo River münnt.

Dat Land, dat to Gallon Jug höört, reckt in’n Noorden bet an de Rio Bravo Conservation Area.

Historie[ännern | Bornkood ännern]

Gallon Jug geiht trügg op de British Honduras Company (na 1878 Belize Estate and Produce Company, BEPCO), de dor siet de Tied üm 1850 op üm un bi 4000 km² Plantaaschen- un Forstweertschop bedreven hett. Von’n Oorwoold weren 12 km² rund üm Gallon Jug för Feller un Weiden raadt. In’n Oorwoold hebbt se Hartholt (vör allen Mahagoni) slahn un Chicle wunnen. Von de Johren 1920 af an hett dat för en Tied ok en Smallspooriesenbahn von Gallon Jug na Hill Bank geven, över de de Woren na’n New River aftransporteert worrn sünd. 1984 hett Barry Mansfield Bowen dat Ünnernehmen opköfft.[1] En Deel von dat Land is von dat Programme for Belize köfft worrn, üm de Rio Bravo Conservation Area intorichten. To Gallon Jug höört nu noch 526 km².

Bowen hett ünner annern in’n Dezember 1988 de Chan Chich Lodge apenmaakt, de an en lüttjere Maya-Ruinensteed anleggt worrn is un Touristen den Oorwoold wiest.[1]

Vondaag warrt op de Farm vör allen Kaffe, Kakao un Mais anboot un Vehtucht bedreven.

Infrastruktur un Weertschop[ännern | Bornkood ännern]

För de Kinner von de Farmarbeiders gifft dat mit de Casey Community School en egen Grundschool.

Verkehr[ännern | Bornkood ännern]

De Oort is över den lüttjen Flegerplatz Chan Chich Airstrip (oder ok Gallon Jug Airstrip) an de Butenwelt anslaten. Dat gifft ok en Pist, de in’n Noorden na Blumenthal föhrt un in’n Süden na La Gracia. Op düsse Pist sünd aver ok bi good Weder Gelännwagens nödig, üm dor vörantokamen. De Pist föhrt dör Privaatland, so dat Verlööv von’n Besitter nödig is, üm dor hentokamen.

Footnoten[ännern | Bornkood ännern]

  1. a b Chan Chich Lodge


Koordinaten:17° 34′ N, 89° 3′ W