Schoolsystem in Belize
För dat Schoolsystem in Belize is na’n Education Act de Staat tostännig. De Opsicht över de Bildungsinstituschonen in Belize hett dat Ministerium för Bildung.
Organisatschoon
[ännern | Bornkood ännern]An de Sied von’n Bildungsminister steiht en Chief Education Officer. Tosätzlich warrt de Minister dör en Natschonalen Raad för Bildung (National Council for Education) beraden, de sik ut Chief Education Officer (oder en Vertreder), en Vertreder von de Grundscholen, en Vertreder von de Sekundärscholen, en Vertreder von de Schoolmeestergewerkschaften, bet to fiev Vertreders von de Bildungsinstituschonen un Vertreders von de Öllern, Ünnernehmens un de Sellschop tohoopsett.
En ganze Reeg von Scholen, besünners mank de Grundscholen, warrt von de verscheden Kunfessionen bedreven. De Scholen hebbt aver na § 24 von’n Education Act de Plicht, all Schölers optonehmen, egaal wat för en Religion de hebbt. Stand Schooljohr 2011/2012 weren von de 295 Grundscholen to de Tied 115 röömsch-kathoolsch, 20 von de Söventen-Dags-Adventisten, 17 anglikaansch, 16 methodistisch un 16 mennonietsch.[1] Von’n Rest weren 54 von de Regeren bedreven, 17 privaat un 40 sünd von annere Gruppen bedreven worrn.[1] In dat sülve Schooljohr weren von 53 Sekundärscholen 17 von de Regeren bedreven, 11 röömsch-kathoolsch, 7 privaat, 5 von de Söventen-Dags-Adventisten, 2 von de Nazareners, 2 baptistisch, 1 anglikaansch, 1 methodistisch, 1 von de Assemblies of God, 1 presbyteriaansch, 1 evangelikaal un 4 sünd von de Lüüd bedreven worrn, de in dat Rebeed leevt.[1]
Schoolformen
[ännern | Bornkood ännern]Dat gifft
- Vörscholen (för Kinner in en Öller von 3 bet 5)
- Grundscholen (för Kinner in en Öller von 5 bet 14)
- High Schools (14 bet 18)
- Junior Colleges
- Universitäten
| Typ | Tall | Schoolmeesters | Schölers | |
|---|---|---|---|---|
| 1 | Vörschool | 227 | 432 | 7485 |
| 2 | Grundschool | 311 | 3439 | 65.993 |
| 3 | Sekundärschool | 62 | 1444 | 22.313 |
| 4 | Junior College | 11 | 283 | 4447 |
| 5 | Universität | 2 | 451 | 5383 |
De Vörschool is freewillig. En Schoolplicht in de Grundscholen besteiht för Kinner in en Öller von 5 bet 14. Na de Grundschool köönt de Schölers op de High School wieder lehren.
High Schools
[ännern | Bornkood ännern]De High Schools sünd Sekundärscholen för Schölers in en Öller von 14 bet 19. Deelwies warrt se ok Community College nöömt (to’n Bispeel Corozal Community College un Toledo Community College). Wichtige High Schools sünd St. John’s College un St. Catherine Academy in Belize-Stadt.
Junior Colleges
[ännern | Bornkood ännern]Na de High School besteiht de Mööglichkeit op dat Junior College en Associate Degree to maken, wat en vergliekboren Weert as de eersten twee Johr an en Universität hett.
Junior Colleges sünd na US-amerikaansch Vörbild billt.
Dat gifft:
- Belize Adventist Junior College
- Centro Escolar Mexico Junior College (von Mexiko ünnerstütt)
- Corozal Junior College
- Independence Junior College
- John Paul II Junior College
- Muffles Junior College
- Sacred Heart Junior College
- San Pedro Junior College
- Stann Creek Ecumenical Junior College
- St. John’s College
- Wesley Junior College
Universitäten
[ännern | Bornkood ännern]För de Universität Belize gifft dat mit’n University of Belize Act en egen Gesettsgrundlaag. De Universität is in dat Johr 2000 grünnt worrn, as sik en Reeg Institutschonen tohoopslaten hebbt.
De private Galen University is 2003 grünnt worrn. De Central America Health Sciences University is ok privaat un 1996 grünnt worrn. De Universität richt sik stark an Studenten ut dat Butenland.
De University of the West Indies bedrifft en Campus in Belize-Stadt.
Historie
[ännern | Bornkood ännern]As fröhere brietsche Kolonie (Brietsch-Honduras) is Belize deelwies präägt von dat brietsche Schoolsystem. Grootbritannien hett Beamtenposten mit Briten besett un keen groten Weert dor op leggt, en höger Bildungssystem in de Kolonien von Westindien intorichten. Eerst 1948 is mit de University of the West Indies in Jamaika en Universität in de brietsche Karibik grünnt worrn.
Al in dat 19. Johrhunnert sünd dör US-amerikaansche Jesuiten-Missionare Elementen von dat amerikaansche Schoolsystem na Brietsch-Honduras kamen. Ok in dat 20. Johrhunnert hett sik Brietsch-Honduras/Belize stark an dat amerikaansche System orienteert as dat System jümmer mehr moderniseert worrn is.
1966 hebbt dat eerste Maal Schölers in Belize en Junior College afslaten, nadem dat St. John’s College düsse Schoolform anbaden harr. Dat Junior College is inföhrt worrn, üm junge Lüüd mit en Associate Degree op en Universitätsstudium vörtobereiden. Vele Studenten ut Belize sünd denn mit düsse Afslüss op Universitäten in de USA wesselt.
1979 is mit dat Belize College of Arts, Science, and Technology de eerste Hoochschool in Belize inricht worrn, de in dat Johr 2000 in de Universität Belize opgahn is.
Footnoten
[ännern | Bornkood ännern]- ↑ a b c Education Statistical Digest 2011/2012, Ministerium för Bildung
- ↑ Education Statistics at a Glance 2018/2019, Ministerium för Bildung
Weblenken
[ännern | Bornkood ännern]- Education Act (engelsch)
- University of Belize Act (engelsch)
- Ministerium för Bildung (engelsch)