Floridaaante

Vun Wikipedia
Floridaaant(e)
Floridaaanten
Systematik
Ünnerstamm: Warveldeerten (Vertebrata)
Klass: Vagels (Aves)
Ornen: Gösevagels (Anseriformes)
Familie: Aantenvagels (Anatidae)
Ünnerfamilie: Echte Aanten (Anatinae)
Tribus: Swemmaanten
Geslecht: Aanten an sik
Oort: Floridaaant(e)
Wetenschoplich Naam
Anas formosa
Ridgway, 1874

De Floridaaante (Anas fulvigula) is en Aantenvagel, de to de Aanten an sik torekent warrt. In de Literatur weert normolerwiese twee Unneraarden angeven, man dor hefft sik de Forschers jummers noch over in’e Plünnen. In Gefohr is de Aart dör de Graue Aante, de vun Minschen na Florida henbrocht wurrn is. Se warrt dor to’n Deel as Smuckvagel holen, man ok utsett for de Jagd. Se is nah verwandt mit de Floridaaante un krüüzt sik bannig fix mit ehr.[1]

Kennteken[ännern | Bornkood ännern]

Bi de Floridaaante verscheelt sik Waart un Aaante nich groot. Se sleiht na dat Seken vun de Graue Aante. Se warrt bi 55 cm lang.

Wo se vorkamen deit[ännern | Bornkood ännern]

Bi de Floridaaante gifft dat twee Populatschonen. Een leevt an de Küst vun den Golf vun Mexiko twuschen Alabama un Tamaulipas in Mexiko. De wecken Ornithologen seht ehr as egen Unneraard an mit den Naam Anas fulvigula maculosa. Buten de Brödeltied kaamt ok enkelte Aanten vun düsse Populatschoon wieter na Süden hen bit na Veracruz. De tweete Populatschoon besteiht ut Standvagels in Florida. De wecken Ornithologen rekent ehr to de Normolform Anas fulvigula fulvigula. Hen un wenn wannert se na Norden to bit hen na den US- Bundsstaat Georgia.

Wie se leven deit[ännern | Bornkood ännern]

De Floridaaante leevt in Sööt- un ok in Brackwater. Se sünd to finnen in Dieke, Brööke, gröttere Veehdobben, Feller, wo de Floot overhen geiht un Ackers, wo Ries up anboot warrt. Ok up Eilannen vor de Küsten siedelt se, wenn dat mööglich is.

Wat se freten deit[ännern | Bornkood ännern]

Twuschen September- un Februarmaand bruukt Floridaaanten 43 % vun ehre Tied up Söök na Freten.[2] Meist weert Planten freten. Dor höört Saat vun Gras un Seggen mit to, man ok allerhand Deele vun Waterplanten. Ok Deerter weert vertehrt, as Mollusken, Insekten, Kreeftdeerter un Fische. Je na Saison könnt Fische ok den gröttsten Deel vun dat Freten utmaken. Dat gellt sunnerlich for de Tied, wo de Vagels rusen doot.

Normolform vun de Floridaaante
Seken vun de Graue Aante. Hier hett de Flunkenspegel en witten Suum.

Wie se sik vermehren deit[ännern | Bornkood ännern]

De Floridaaante leevt in serielle Monogamie. Dat Paar kummt for dree bit sess Maande tosamen. Dat geiht los in’n Augustmaand; in’n Septembermaand sünd bi 71 Przent vun all Seken al verpaart, in Januarmaand sünd dat al 96 Perzent un in Februarmaand hefft sik de lesten Floridaaanten to Paare tohopenfunnen.[3] De eersten Nester weert vun Januar af an boot. Dat geiht wieter bit in’n Augustmaand, man de meisten Nester weert in’n März un April anleggt. Se weert up’n Bodden twuschen dichte Planten boot. Dat könnt bit hen to dree Nester up en Hektar liggen. De Aanten leggt seven bit veertein Eier; in’n Döörsnitt sünd dat 10,4 Eier. 95 bit 96 Perzent vun de Eier sünd befrucht‘.[4] Bröden deit bloß man dat Seken. In’n Döörsnitt bruukt se 26 Dage, bit de Lüttjen utkruupt. Vun Enne Juli af an kaamt de Heken in lüttje Swarms to’n Rusen tohopen. Wenn se ehr Nest verlehrt, fangt Floridaaanten nochmol an mit dat Bröden. Dat kann in een Saison bit to fiev Mol passeern.[5] Flegen könnt de Lüttjen mit 45 bit 56 Dage, vun den 63. bit 70. Dag af an könnt se ok langere Törns flegen. De ollste Floridaaante in Freeheit is 13 Johre oold wurrn, meist leevt se lang nich so lang. Waarten vun de Floridaaante, de dat bit to’n Flegen schafft hefft, könnt dor up reken, datt se bi 2,5 Johre to’n Leven hefft. Bi de Seken is dat nich ganz so veel, vunwegen datt se in de Brödeltied fökener grepen un upfreten weert. Se könnt up 1,4 Johre reken.[6]

Systematik[ännern | Bornkood ännern]

DNA-Verglieke hefft wiest, datt de Floridaaante an’n meisten mit de Amerikaansche Swatte Aaante verwandt is. Mit de Graue Aante steiht se en beten wieter ut’neen. Dat weer langen anners dacht wurrn. Bi DNA-Verglieke is ok rutkamen, datt de beiden Populatschonen vun düsse Aart sik geneetsch verschelen doot. Dat liggt dor an, datt se man bloß lüttjere Gemarken besiedelt un nich veel wannern doot.[7] De Floridaaante kann sik mit de Amerikaansche Swatte Aante un ok mit de Graue Aante krüzen un de Kinner könnt sik denn ok vermehren.

Belege[ännern | Bornkood ännern]

  1. Kear, S. 520
  2. Kear, S. 519
  3. Kear, S. 519
  4. Kear, S. 520
  5. Kear, S. 520
  6. Kear, S. 520
  7. McCracken, Kevin G.; Johnson, William P. & Sheldon, Frederick H. (2001): Molecular population genetics, phylogeography, and conservation biology of the mottled duck (Anas fulvigula). Conservation Genetics 2(2): 87–102. doi:10.1023/A:1011858312115 PDF fulltext

Literatur[ännern | Bornkood ännern]

  • Janet Kear (Rutg.): Ducks, Geese and Swans. Oxford University Press, 2005, ISBN 0198546459
  • Hartmut Kolbe: Die Entenvögel der Welt. Ulmer Verlag, 1999, ISBN 3-8001-7442-1
  • Christopher S. Smith: Field Guide to Upland Birds and Waterfowl. Wilderness Adventure Press, Belgrade (Montana) 2000, ISBN 1-885106-20-3

Kiek ok bi[ännern | Bornkood ännern]