Edward Flowers
Edward Dugal Flowers (* 12. September 1931; † 14. Dezember 2012 in Belize-Stadt) weer en Politiker ut Belize (HIP, NIP, UDP).
Leven[ännern | Bornkood ännern]
Flowers is 1931 as Söhn von Susan Elizabeth, borene Wade, un den Proviantmeester Richard Alexander Flowers boren.[1] He weer op de Ebenezer Primary School.[1] He hett för de Belize Estate Company arbeidt[2] un weer anstellt bi en Schippsverseker.[1]
Flowers hett an’n 30. Juni 1960 siene Fro Myrtle Cressida, borene Bailey, freet.[2][1] De beiden harrn dree Kinner.[2]
He is an’n 14. Dezember 2012 in dat Karl Heusner Memorial Hospital in Belize-Stadt doodbleven.[2] Sien Truurfier weer an’n 18. Dezember in de All Saints Church in Belize-Stadt.[2]
Politik[ännern | Bornkood ännern]
1956 hett he to de Mitgrünners von de Honduran Independence Party (HIP) tohöört, de al 1958 in de National Independence Party (NIP) opgahn is.[1] Flowers is ünner Parteibaas Philip Goldson 1962 tweten Viez-Parteibaas von de NIP worrn un 1965 Viez-Parteibaas.[1]
Bi de Stadtraadswahlen 1962, 1965 un 1969 in Belize-Stadt weer he Kannedaat för de NIP, is aver nich wählt worrn.[3]
Bi de Parlamentswahl in Belize 1961 weer he Kannedaat för de NIP in’n Wahlkreis Collet, kunn sik aver mit 43,9 % von de Stimmen nich gegen Albert Cattouse von de PUP dörsetten. Ok bi de Wahl 1965 (48,8 % von de Stimmen gegen Cattouse) un Wahl 1969 (48,0 % von de Stimmen gegen Vernon Harrison Courtenay von de PUP) hett he beide Maal wedder knapp verloren.
Flowers weer na de Wahl 1965 Schaddenminister för Binnensaken un Gesundheit in dat Schaddenkabinett von de UDP-Oppositschoon.[1]
As de NIP sik 1973 mit annere Gruppen to de United Democratic Party (UDP) tohoopslaten hett, is Flowers Maat von düsse Partei worrn.
He weer von’n 16. Juli 1993 bet 13. Juli 1998 Präsident von’n Senaat ünner Premierminister Manuel Esquivel.
Ehren[ännern | Bornkood ännern]
To Neejohr 1996 is he Officer of the Order of the British Empire worrn.