Edgar Bessen

Edgar Bessen (* 11. November 1933 in Hamborg; † 2. Februar 2012 ok dor) weer en düütsch Schauspeler. Sien Gebortsnaam „Behsen“ hett he sück mal standesamtlich ännern laaten.

Leven und Wark

Bessen hett eerst Discher lehrt un is denn up de Schauspeelschool vun Hildburg Frese in Hamborg gahn. Dornah kreeg he 1960 en Engagement an dat Hamborger Ohnsorg-Theater, dat bit 1979 sien könstlerisch Heimat wurr. Dör sien tallriek Rullen besünners as Partner vun Heidi Mahler as ok völ Gastspelen un Feernsehupnahmen vun dat Theater up de NDR is he ok bundswiet en groot Publikum bekannt wurrn. Bi’t Ohnsorg-Theater weer he een vun de Publikumslieblinge un kunn in völ Stücken sien kummediantsch Talent wiesen. Man kennt hü mut Stücken as Opa wird verkauft (1961) mit Henry Vahl, Heinz Lanker un Karl-Heinz Kreienbaum, Tratsch im Treppenhaus (1962) mit Erna Raupach-Petersen, Henry Vahl un Gisela Wessel, Vater Philipp (1963) mit Henry Vahl, Heidi Kabel un Gisela Wessel, Kein Auskommen mit dem Einkommen (1966) mit Otto Lüthje, Heidi Kabel un Heidi Mahler, Die Kartenlegerin (1968) mit Heidi Kabel, Otto Lüthje un Willy Millowitsch, Mein Mann, der fährt zur See (1971) mit Christa Wehling, Herma Koehn, Werner Riepel un Ernst Grabbe oder Wenn der Hahn kräht (1976) mit Karl-Heinz Kreienbaum, Hilde Sicks un Uwe Dallmeier un De Etappenhas (1978) mit Fritz Hollenbeck. Dorto schreev he för en Inszenierung vun dat Ohnsorg-Theater dat Stück Heiratsswindel, dat 1979 in’ NDR överdragen wurr.

Af 1979 hett Edgar Bessen 4 Jahre lang as free Schauspeler arbeit; he speel in disse Tiet an dat Ernst Deutsch Theater, an de Hamborger Kammerspelen un de Landsböhn Sleswig. 1984 un 1985 hörr he to dat Ensemble vun dat Düütsch Schauspeelhuus. Dornah speel he an dat Hamborger Theater im Zimmer, an dat Frankforter Theater am Turm un an dat Theater am Kurfürstendamm in Berlin. Sien nächst Statschoon weer denn 1990 dat Thalia-Theater in Hamborg, dornah keemen de Kummedie Winterhuder Fährhuus, dat Ernst Deutsch Theater un dat Altonaer Theater.

He speel u. a. den Brabantino in Shakespeares Othello, den Manes in Hölderlins Empedokles, den Feldhauptmann in Brechts Mutter Courage und ihre Kinder oder den Pastor Kimball in de Dreigroschenoper. In dat Johr 2000 kunn he sien 40-johrig Böhnenjubiläum fieren.

Af de 1970er Johren is Bessen ok faken in’t Feernsehn uptreden, so in de Serien Dem Täter auf der Spur, Tatort, St. Pauli Landungsbrücken un Achtung Zoll. Anfang vun de 1980er Johren övernehm he bit 1996 in 18 Folgen neben Uwe Friedrichsen de Rull vun de Tollfahnder Globig in de NDR-Krimi-Rieg Schwarz-Rot-Gold. 1985 un 1987 speel he in twalf Folgen vun de Feernsehreeg Ein Fall für TKKG den Kommissar Glockner.

Anner Feernsehuptreden weern in Hafenkrankenhaus mit Anneli Granget (1968), in de ZDF-Mehrdeeler Timm Thaler as Havenmeester Rickert (1979), in de Mehrdeeler Konsul Möllers Erben (1983) Die Bertinis (1989) un Die Staatskanzlei vun Heinrich Breloer (1989), in de Serien Tante Tilly, Die Männer vom K3, Blankenese (1994), Ein Mann steht seine Frau (1997) un in Der Kleine Dachschaden (1998) in Die Manns – Ein Jahrhundertroman (2001) vun Heinrich Breloer und in de Krimifolg Das Duo – Totes Erbe (2002) bi TKKG-der Club der Detektive nochmal de Rull as Kommisar Glockner (1997-2003).

Ok in Kinofilms hett he mitspeelt, so in de Films Klein Erna auf dem Jungfernstieg (1969) mit Heidi Kabel, de Kummedie Liebling, sei nicht albern! (1970), in Die Verrohung des Franz Blum (1974) vun Franz Hauff in Im Herzen des Hurrican (1980) vun Hark Bohm as ok in de Dokumentarfilm Hundert Jahre Brecht (1997) vun Ottokar Runze.

Dorneben arbeit he ok för den Höörfunk un hollt Lesungen. Wiederhenn is he ok Speelbaas in nedderdüütsch Hörspelen, de vun Radio Bremen produzeert wurrn. Frünnen vun Hörspeelen is he ok dör sien Sprekerrull as "Kommissar Glockner" in de Hörspeelrieg TKKG bekannt (af Folg 39).

To sien 70. Geburtsdag hett he 2003 de Biermann-Ratjen-Medaille vun de Free un Hansestadt Hamborg kreegen. Bessen weer siet April 2005 Ehrenlidmaat vun de Hamborger Volksböhn.

He is Unkelsegger to de Schauspeler Henry Vahl un Bruno Vahl-Berg.

Filmografie (Utwahl)

Johr	Titel
1962	De dolle Deern, Feernsehn
1964	Die Kartenlegerin oder Die Welt will betrogen sein, Feernsehn
1964	Wilhelmsburger Freitag
1965	Das schlechte Gewissen, Feernsehn
1967	Der Winkeladvokat, Feernsehn
1968	Die Kartenlegerin, Feernsehn
1969	Klein Erna auf dem Jungfernstieg
1971	Jonny der Dritte, Feernsehn
1974	Der schönste Mann von der Reeperbahn, Feernsehn
1975	Schließfach 763, Feernsehn
1979	Mit Gefühl und Wellenschlag, Feernsehn
1979	Timm Thaler, Feernsehfolgen
1980	Im Herzen des Hurrican
1981	Landluft, Feernsehn
1984	Montagsgeschichten, Feernsehn
1986	Tante Tilly, Feernsehreeg
1988	Ein Kuckuck im Nest, Feernsehn
1989	Die Staatskanzlei, Feernsehn
1973-93	Tatort, Feernsehfolgen
1982-95	Schwarz Rot Gold
1998	Hundert Jahre Brecht
1991-2000	Großstadtrevier, Feernsehfolgen

Weblenken

• Edgar Bessen in de Internet Movie Database (engelsch)
• DNB-Katalog
• Personennaamdatei