Timm Thaler (1979)

Vun Wikipedia
Daten vun de Reeg
Plattdüütsche Titel:
Düütsche Titel: Timm Thaler
Originaltitel: Timm Thaler
Produkschoonsland: Düütschland
Produkschoonsjohr(en): 1979
Produzent(en):

Bernd Burgemeister
Dieter Graber
Karl Heinz Mannchen
Joachim G. Staab

Episodenläng: 25 Minuuten
Episodentall: 13 in 1 Staffel
Originalspraak:

Hoochdüütsch

Musik:

Christian Bruhn

Titelleed:

Timm’s Theme

Genre:

Kinner- un Jöögdreeg

Eerst Sennen (D): 25. Dezember 1979
op ZDF
Dorsteller

Timm Thaler oder Das verkaufte Lachen (op plattdüütsch: „Timm Thaler oder dat verköffte Lachen“) is en düütsche Feernsehreeg, de de Speelbaas Sigi Rothemund maakt hett. Se weer 1979 de eerste Wiehnachtsreeg in’t ZDF un besteiht ut 13 Folgen vun je 25 Minuuten Speeltiet. Vorlaag för de Reeg weer de Roman Timm Thaler vun James Krüss, man de Inholt is in de Reeg wat anners dorstellt. Dat Dreihbook to de Reeg weer vun Justus Pfaue un Peter M. Thouet schreven, de Musik weer vun den spoodrieken Komponist Christian Bruhn. De Reeg weer bi’t eerste Utstrahlen en wohren Stratenfeger[1] un hett Thomas Ohrner in de Hööftrull to’n Kinnerstar maakt.

Inholt[ännern | Bornkood ännern]

De junge Schöler Timm Thaler is bi all Lüüd geern sehn. Wat he ok jümmer utfreten deit, keeneen kann em lang böös wesen, vunwegen dat he en so hartlich Lachen hett, dat jeedeen mitlachen mutt. De geheemnisvulle Baron de Lefouet (in de Romanvörlaag Lefeut schreven as Ananym för Teufel, Plattdüütsch: „Düvel“) dorgegen is en düsteren, wunnerlichen Gewarfsmann, mit den aver nümms mehr hanneln will, vunwegen dat he so eernst un unsympathisch is. De slechte Siet vun de Welt hett he al in sien Besitt oder ünner sien Kontroll, man de Baron will ok de annere Hälft ünner sien Kontroll bringen. Över sien jüst so wunnerlichen Macker, Anatol, nimmt he Kuntakt op to Timm un maakt em en Anbott, em dat lachen aftoköpen. Üm Timm lichter to övertügen, lett he den Fleger vun Timm sien Vadder afstörten – he hett neemlich snaaksche Kräft, de he insetten deit, wenn he de Welt to sien Willen ännern will. Dör de Truer över den Verlust vun sien Vadder, kann de Baron em üm den Finger wickeln. Se maakt en Verdrag, dat de Baron Timm sien Lachen kriggt. In’n Gegentog winnt Timm vun nu an jede Wett. En Bedingen gifft dat aver: He dröff doröver nich snacken.

Eerst gefallt Timm dat, dat he sik nu jeden Kraam wünschen kann, solang he man blots een finnt, de mit em wedden deit. Disse ne’e Gaav sett he nu ok glieks in, üm dat Geld för sien Steefmudder tosamentowinnen, dat se to’n Afbetahlen vun’t Huus bruukt. Nu, dat he nich mehr lachen kann möögt em de Mitschölers aver nich mehr lieden un Timm warrt jümmer eensomer. He stellt fast, dat sien Lachen en weertvullen Schatt weer, den he sik torüchhalen will. Wegen de Bedingen nicht doröver to snacken is he op sik sülvst stellt. Intwüschen bruukt de Baron dat Lachen, üm sien Gewarfsgegner to övertügen un hett dormit Spood ahn Enn.

Timm ritt vun tohuus ut un maakt sik op de Söök na dat snaaksche Land Aravanadi, woneem de Baron sien Sitt hett. As blinnen Passageer verstickt he sik op en Schipp, dat dorhen föhren deit. He warrt opdeckt un schall an den Baron övergeven warrn, kriggt aver unvermodens Hülp vun de Nunn Agatha un den Smutje Heinrich. Man, de Baron hett jümmers en Oog op Timm un versöcht allens, em ünner sien Kontroll to bringen. Wegen en Wett maakt he em sogors to’n rieksten Jungen vun de Welt, un sett em to sien Universalarven in. Na un na versöcht de Baron Timm to sien Nafolger to maken un em in de Welt vun’t wrede Gewarf intowiesen un lehrt em, annere Lüüd gegenöver gnadenlos to wesen.

Aver ok Süster Agatha un Heinrich laat nich locker, Timm vun’n Baron lostomaken. Man, Timm sütt keen Weg, woans he sien Verdrag mit den Baron oplösen kann un föögt sik allmählich in sien Laag. He fangt sogors an, Ideen to entwickeln, woans man mit eenfack Water Hannel drieven kann. As he dorto na Hamborg reisen mutt, versökt sien Frünnen noch mol, em ut de Hannen vun’n Baron to redden. Opletzt kummt Timm doch noch vun sülvst op de Lösung, woans he den Baron uttricksen kann: He slutt en Wett af, dat he sien Lachen wedder torüch kriegen deit. Un vunwegen dat Timm keen Wett verleren kann, hett sien Noot mit een mol en Enn un he is wedder de fröhliche Jung, de he vörher wesen is.

Utteken[ännern | Bornkood ännern]

De Feernsehreeg is mit een Pries uttekent worrn: 1980 kreeg Thomas Ohrner den Bambi as Best Jungdorsteller.

Vergliek mit de Literatur-Vörlaag[ännern | Bornkood ännern]

Anners as in den Roman, hett Timm in de Feernsehreeg keen Steefbroder, de em trietsen deit. Ok sien Steefmudder versteiht sik in’n Roman nich mit Timm. In’t Book drapt sik de Baron un Timm sien Vadder dat eerste mol op de Peer-Rennbahn. In de Feernsehreeg sünd Peerrennen för den Vadder blots en verlustriek Hobby, so dat dat Drapen dor op’n Flaaghaven stattfinnt, woneem he vun Beroops wegen mit Sportflegers to doon hett.

Den Baron sien düsteren Macker, Anatol, de jümmer an de Siet vun’n Baron to sehn is, gifft dat so in’t Book ok nich. Dor is dat de jüst so dämoonsche as sellschopswennte Genuesen Signor Grandizzi. Ok is de Havenmeester Rickert in’n Roman blots en lütten Anstellten. An Steed vun de Kreschimir in’t Book, steiht Timm op dat Schipp in de Reeg de resolute Nunn Süster Agatha bi. Se hett Hülp vun den slichten Smutje Heinrich, de in’t Original de kloke Stüermann Jonny is. In de Feernsehreeg duukt jüst so as in’t Book de Oorinwahner, Selek Bei, op. In’n Film is dat aver en eenfacken Harder un Gewarfspartner vun’n Baron, de Timm Ratslääg geven deit, wiel he in’n Roman en Dubbelagent is.

Dorto kamt wietere Ünnerscheden in enkelte Szenen as dat Vördringen vun Aghata bit na’n Sitt vun’n Baron – wat in’t Book nich so dorstellt warrt, oder tosätzliche Hülpers, as de Abbé un de Bischop op de Siet vun Agatha un de 1. Offizeer Voges un de Poststedenbesitter op de Siet vun’n Baron. Un vör allen duert de Irrfohrt vun timm in’t Original mehr as veer Johr, wat in’n Film op wenige Weken oder Maanden kört worrn is, üm nich noch annere Schauspelers to bruken, wenn Timm öller warrt.

Dreihöörd[ännern | Bornkood ännern]

En vun de wichtigsten Dreihöörd weer Mirador del Río as ok de Jameos del Agua op dat spaansche Eiland Lanzarote. Dat is en Utsichtspunkt, de vun den Künstler César Manrique herricht worrn is. De Mirador del Río is in’n Film de Sitt vun den Baron de Lefouet. De Szenen an’n Swimmingpool vun’n Baron un Deelen vun’n Goorn weern tosätzlich in’n Jameos del Agua dreiht. Dreiht weer bito in’t Restaurant „La Era“ in Yaiza, Arrecife un in’n Natschonalpark Timanfaya

De Stadtszenen sünd in Hamborg dreiht worrn. De Anfangsszeen mit Timm op’t Skateboard weer in de Straat Eichholz blangen de Landungsbrüchen dreiht, de Szeen mit de Auto-Tombola is an de Eck Mönckebergstraat/Spitalerstraat an’n Gerhard-Hauptmann-Platz maakt worrn. Dat Op’nannerdrapen vun Anatol un Timm an de U-Bahn is an’n U- un S-Bahnhoff St. Pauli-Landungsbrüchen an’n Hamborger Haven enststahn. De Flaagschool weer op’n Flaaghaven Hartenholm fööftig Kilometer nöördlich vun Hamborg dreiht, de Szeen as em för een Dag dat Lachen leht warrt, is vör den ollen Terminal 2 entstahn, de intwüschen afreten worrn is.

Timm sien School is in’n Film dat Christianeum, wat an en School-T-Shirt to sehn is, dat he bi’n Sport-Ünnerricht an hett. Dat is ok in Wohrheit en bekannt staatlich Gymnasium in Hamborg. Dat Drapen vun de Gewarfslüüd, de vun’n Baron köfft worrn sünd, is in de Lobby vun’t Hotels Vier Jahreszeiten opnahmen worrn. De Firmensitt vun’n Baron in Hamborg weer dat dormolige Huus vun de Hamborger Elektrizitäts-Warken. De Slussfolgen speelt in’t Radisson-SAS-Hotel an’n Congress-Centrum Hamburg (CCH). De letzte Szeen, in de Timm sien Lachen torüchkriggt, is an de Waterkunst twüschen dat Amtsgericht Hamborg un den hüütigen Johannes-Brahms-Platz (dormals Karl-Muck-Platz) dreiht worrn.

Publikatschonen[ännern | Bornkood ännern]

Timm Thaler weer dat eerste mol wiel de Wihenachtstiet 1979 bit to’n 5. Januar 1980 in’t ZDF utstrahlt unlater mehrmols as Sössdeelers in 1-stünnige Folgen wedderholt. Mit disse Feernsehreeg füng bi’t ZDF de Reeg vun de spoodrieken Wiehnachtsmehrdeelers an, de de Aventüerveerdeeler aflööst hebbt. De Geschicht vun

Timm Thaler is in Düütschland vun en Millionenpublikum verfolgt worrn, later geev dat aver ok en synchroniseerte Faten, de ünner den Titel The Legend Of Tim Tyler vun de britische BBC utstrahlt worrn is.[1] In’t Johr 2002 is op Grundlaag vun den Roman ok noch en 26-deelige Animatschoonsreeg ünner den glieken Tiel entstahn.

To de Reeg gifft dat ok en Höörspeel, dat op de Original-Toonsporen baseert un op dree LPs oder dree MCs rutkamen is. Op DVD is de Feernsehreeg in’t Johr 2003 vun de Music und Media GmbH & Co. KG opleggt worrn.

Borns[ännern | Bornkood ännern]

  1. a b vgl. Michael Reufsteck un Stefan Niggemeier in Das Fernsehlexikon, November 2005, ISBN 978-3442301249

Weblenken[ännern | Bornkood ännern]