Horst Frank (Schauspeler)

Vun Wikipedia
Horst Frank

Horst Bernhard Wilhelm Frank (* 28. Mai 1929 in Lübeck; † 25. Mai 1999 in Heidelbarg) weer en düütschen Schauspeler un Synchroonsnacker de vun sien tyypsche, deepe Stimm bekannt weer. He hett ok vele Höörspeelprodukschonen maakt.

Leven un Wark[ännern | Bornkood ännern]

Frank hett de Realschool besöcht un füng dorna en koopmännsche Lehr an, de aver dör sien Militärdeenst an’t Enn vun’n Tweten Weltkrieg ünnerbroken worrn is. As de Krieg to Enn weer, müss he tosehn, woans he över de Runnen keem, un hett sik mit verschedene Arbeiten över Water hollen. So weer Nachtwächter un ok Schaufinsterdekorateur. Opletzt güng he to’n Schauspeelünnerricht an de Musikhoochschool Hamborg. Na sien Utbilln harr he Engagements an verschedene Theaters. Eerst weer he an’t Stadttheater Lübeck, woneem he boren weer, later harr he denn Verdrääg in Bonn, Basel, Baden-Baden un Wupperdaal.

Mit de Tiet is Frank to en bedüdenen düütschen Schauspeler worrn. In de 1950er Johren hett he in mehrere Kinofilmen mitspeelt. Sien Rullenfack weer vör allen de pessimistische, melancholische Charakter – dorop weer he al na sien eersten Kinofilm Der Stern von Afrika (1957) fastleggt. Blangen dissen hett he noch in annere Kriegsfilmen mitspeelt, in den he vergliekbore Rullen speelt hett. Bito pass he vun’n Tyyp her aver ok op de Rull vun’n Driftverbreker. 1958 speel he to’n Bispeel in Das Mädchen vom Moorhof as ok in den Krimi Der Greifer beidmolen en gresigen Möörder. Dat Rullenfack vun’n legen Kerl hett he lang bibehollen.

Ok in düütsche Feernsehprodukschonen hett hett Frank faken mitspeelt, ünner annern in de ZDF-Krimiregen as Der Kommissar, Derrick oder Der Alte. In de 1970er Johren weer he in een Hööftrull vun de Jöögd- un Kinnerreeg Timm Thaler to sehn, in de he ok wedder den legen Kerl speelt hett. Aver ok in vele annere Feernsehregen un Feernsehfilmen weer Frank dorbi. Alltohopen hett he an mehr as 160 Film- un Feernsehprodukschonen Andeel hatt.

Sien Stimm hett he ok för Höörspelen insett. To’n Bispeel weer he vun 1979 an fakener mol in de Reeg Die drei ??? as (Hööft)kommissar Reynolds to hören. Bi Europa hett he ok noch annere rullen snackt, as Kaptein Nemo in de Europa-Faten vun Vingt mille lieues sous les mers (dt.: 20.000 Meilen unter dem Meer) vun Jules Verne. Faken weer he ok in de Rull as Verteller to hören. As Synchroonsnacker hett Frank ünner annern Laurence Harvey un Jack Palance sien Stimm geven.

Horst Frank hett mehrere Johren in Frankriek, Italien un Tansania leevt un weer mehrmols verheiraat. Ut sien eersten Eh hett he een Söhn. In’t Johr 1961 weer he vör en knapp Johr mit de Schauspelersche Chariklia Baxevanos verheiraat, mit de he en Dochter harr. Vun 1961 bit 1963 harr he en egene Farm in Tanganjika, woneem he Kafee un Grööntüüch anplant hett. He müss aver ut politische Grünnen wedder torüch. He sülvst meen, he harr sik in Afrika sülvst op de Proov stellen wullt, üm to sehn, wat he noch to wat anners döögt.[1]

In’t Johr 1989 hett Frank den Gedichtsband Wenn ich im Spiegel mich beschau publizeert un sik dormit as Lyriker versöcht. Eenige Gedichten dorut hett he ok för dat Musikalbum Lampenfieber opnahmen. 1981 al harr he siene Memoiren ünner den Titel Leben heißt Leben publizeert.

Sien veerte Eh hett Frank 1979 mit de Schauspelersche Brigitte Kollecker slaten. Frank is 1999 wenige Daag vör sien 70. Geboortsdag an Bregenblöden doodbleven. He is op den Karkhoff Ohlsdörp bisett worrn.[2]

Filmografie (Utwahl)[ännern | Bornkood ännern]

Johr Titel
1955 Die Puppen von Poshansk, Feernsehn
1957 Der Stern von Afrika
1958 Der Greifer
1958 Das Mädchen Rosemarie
1958 Das Mädchen vom Moorhof
1959 Hunde, wollt ihr ewig leben
1959 Lupi nell’abisso
dt:: Wölfe in der Tiefe
1959 Die Nackte und der Satan
1960 La chatte sort ses griffes
dt:: Die Katze zeigt die Krallen
1961 Treibjagd auf ein Leben
1961 Unser Haus in Kamerun
1962 Zwischen Schanghai und St. Pauli
1963 Die weiße Spinne
1964 Weiße Fracht für Hongkong
1964 Die Goldsucher von Arkansas
1965 Das Geheimnis der drei Dschunken
1966 Um Null Uhr schnappt die Falle zu
1967 The Vengeance of Fu Manchu
dt:: Die Rache des Dr. Fu Man Chu
1967 Eine Handvoll Helden
1968 Preparati la bara!
dt:: Django – Sein Haß ist tödlich
1969 Die Engel von St. Pauli
1971 Und Jimmy ging zum Regenbogen
1971 Der scharfe Heinrich
1971 Fluchtweg St. Pauli – Großalarm für die Davidswache
1972 Il grande duello
dt.: Drei Vaterunser für vier Halunken
1975 Das Amulett des Todes, Feernsehn
1976 Albino
1977 Das Gesetz des Clans
1977 Operation Ganymed
1979 Wie Rauch und Staub, Feernsehn
1979 Timm Thaler, Feernsehreeg
1980 Das Traumhaus
1981 Flächenbrand, Feernsehn
1983 Mandara, Feernsehreeg
1994 Elbflorenz, Feernsehreeg
1988-97 Tatort, Feernsehfolgen
1998 Die Menschen sind kalt
1989-1999 Großstadtrevier, Feernsehfolgen

Diskografie (Utwahl)[ännern | Bornkood ännern]

Singles
  • 1979: Meine Zeit mit dir / Für dich
  • 1980: Wo sind die Mädchen / Ein kleines Stück von mir
Alben
  • 1989: Lampenfieber

Weblenken[ännern | Bornkood ännern]

Borns[ännern | Bornkood ännern]

  1. Noordbayerische Kurier vun’n 27. Mai 1999
  2. knerger.de: Dat Graff vun Horst Frank