Denise Herrmann

Vun Wikipedia
Zur Navigation springen Zur Suche springen
Denise Herrmann (2018)

Denise Herrmann (* 20. Dezember 1988 in Schlema) is en düütsch Biathletin un Skilanglöperin. Bi de Biathlon-WM 2019 in Östersund wurr se Weltmeesterin in de Verfolgung. Herrmann is Sportsuldatin in de Bundswehr-Sportfördergrupp in dat sassisch Frankenberg, leevt in Ruhpolding un traineert an den dortigen Stüttpunkt in de Chiemgau-Arena.

Karriere[ännern | Bornkood ännern]

Skilangloop[ännern | Bornkood ännern]

Anfänge[ännern | Bornkood ännern]

Herrmann keem dör hör Vader Lutz, en ehmalgen Handballspeler in de DDR-Böverliga, to’n Skilangloop. Mit acht Johren nehm se eerstmals an Wettkämpen deel, veer Johr later wessel se up dat Skigymnasium in dat 35 Kilometer van den Heimatoort Bockau entfernt Oberwiesenthal, wo se all siet Anfang van hör Loopbahn bi den WSC Erzgebirge traineeren dee. Af 2004 nehm se an internatschonalen Juniorenrennen deel. 2007 nehm se all an Junioren-Weltmeesterschapen deel un wunn in’n Klassiksprint de Bronzemedaille achter Astrid Jacobsen un Charlotte Kalla.

Dopingsparr un eerste Weltcupinsätze[ännern | Bornkood ännern]

In‘n November 2007 wurr van den Düütsch Skiverband (DSV) för een Johr spaart, wiel se nah de Innahm van en Hostensaft positiv up Clenbuterol test wurrn weer un dormit gegen de Dopingrichtlien verstött harr.[1] Nah de Sparr nehm se in’n Harvst 2008 weer an internatschonalen Wettkämpen deel, bi de se sück wiederhen spoodriek dorstellen kunn un dorher in’n Februar 2009 eerstmals in’n Weltcup keem. In dat italieensch Valdidentro keem se up den 37. Platz bi 64 Deelnehmer. In de Folgesaison wurr se mehr in den Weltcup insett un hett ok eerste Weltcuppunkte sammelt.

Glieks to Anfang van de Saison 2010/11 gelungen Herrmann wiedere Erfolge: Tonächst truck se bi den Heimweltcup in Düsseldörp to’n eersten Mal in dat Halffinale van en Sprint in, wo se woll dör en Stört utscheeden is, aber trotzdem Rang 12 beleggen dee. Bi de Uptakt van de Tour de Ski: Dor keem se in den Prolog as best Düütsche up Platz 7 un leet dorbi ünner annern de mehrmalige Weltcupsiegerin Petra Majdič un de amteeren Sprintweltmeesterin Arianna Follis achter sück.

Eerste Podiumsplatzeerungen un Olympiadeelnahm[ännern | Bornkood ännern]

Herrmann bi den Langloopweltcup in Kanada, 2012

Hör eersten Podestplatz in’n Weltcup kunn Denise Herrmann in de Saison 2012/13 an‘n 7. Dezember bi den Teamsprint mit Hanna Kolb in Québec recken. Hör bit dorhen best Eenzelresultat in‘n Langloop-Weltcup reck se an’n 15. Dezember 2012 bi den Sprint in Canmore, bi den se up den veerten Platz keem. In de Gesamtwertung van den Weltcup keem se an’n Enn’n up den 13. Rang.

To’n Anfang van de Saison 2013/14 reck se mit den darten Platz in’n Sprint in Davos un in‘n Teamsprint in Asiago twee wiedere Podest-Platzeeren. Dat sülvige gelung hör ok bi de Sprintrennen in Szklarska Poręba un Toblach. Bi hör eerst Olympiadeelnahm 2014 in Sotschi keem se in’n Sprint up den 8. Platz un gemeensam mit Stefanie Böhler in’n Teamsprint up Platz 4. Mit de Staffel wunn se denn aber de Bronzemedaille. Dorför kreegen de beid 2014 vun den Bundspräsidenten Joachim Gauck dat Sülvern Loorbeerblatt verleeht.[2] De Saison hett se mit den negenten Platz in de Weltcupgesamtwertung un de tweeten Platz in de Sprintwertung afslooten.

In de folgend Saison keem se bi de Nordisch Skiweltmeesterschapen 2015 in Falun in’n Sprint up Platz 17, mit de Staffel up Platz 6 un gemeensam mit Nicole Fessel in’n Teamsprint up den veerten Platz. In de Gesamtwertung van Weltcup beleeg se Platz 9. In’n März 2015 wurr se düütsch Meesterin in dat 30 km klassische Massenstartrennen. In de Saison 2015/16 weer hör best Weltcupeenzelergevnis Platz 6 in’n Sprint in Toblach. An dat Saisonenn’n belegg se den 23. Platz in’n Gesamtweltcup un den 12. Platz in’n Sprintweltcup.

Enn’n März 2019 wurr se bi de düütsch Skilangloopmeesterschapen in Reit im Winkl tosommen mit hör Süster Nadine Herrmann Tweet in’n Teamsprint.[3]

Biathlon[ännern | Bornkood ännern]

Herrmann bi den Weltcup in Oberhof in’n Januar 2018

Enn’n April 2016 geev Herrmann bekannt, dat se to de Saison 2016/17 to’n Biathlon wesseln dee. Siet den 1. Mai 2016 hett se in Ruhpolding för de nee Disziplin traineert.

Hör eerst internatschonal Rennen, den Sprint in‘n Rahmen van den IBU-Cup in dat norweegsch Beitostølen, wunn see. Bi windig Verhältnissen kunn se hör Stärken in’t Loopen good bruuken un reck trotz söss Scheetfehlern den eersten Platz. Twee Daag later stunn se – weer in en Sprint – as Dart weer up dat Podium. In Ridnaun is se blots in de Mixed-Staffel antreeden un reck gemeensam mit Nadine Horchler, Lukas Rombach un Matthias Bischl den 3. Platz.

An’n 9. Dezember 2016 geev se hör de Debüt bi den Sprint in Pokljuka in‘n Biathlon-Weltcup un reck mit twee Scheetfehlern un en goot Loopleistung Platz 18, bi de ansluutend Verfolgung keem se up Platz 21.

Nah den Weltmeesterschaen wurr se – nahdem se tüschendör in’n IBU-Cup insett weer un Miriam Gössner un Franziska Preuß krankheitsbedingt vör de Tiet de Saison afslooten harrn – weer in de Weltcupmannschap upnommen. In Pyeongchang is se nah Platz 25 in‘n Sprint un Platz 33 in de Verfolgung gemeensam mit Nadine Horchler, Maren Hammerschmidt un Franziska Hildebrand in hör eerst Staffelrennen in‘n Weltcup antreeden. Nah en fehlerfree Liggendscheeten muss Herrmann nah dat Stahndscheeten aber een Straafrunn loopen un övergeev mit en minn Rückstand up Slusslöperin Hildebrand, an’n Enn’n wunn de düütsch Mannschap dat Rennen un Denise Herrmann dormit hör eerst Rennen in’n Biathlon-Weltcup. An dat Enn’n van de Saison belegg se in’n Gesamtweltcaup Platz 49.

Hör eersten Eenzelsieg in’n Biathlon-Weltcup kunn Herrmann an’n 1. Dezember 2017 bi dat Sprintrennen in Östersund (vör Justine Braisaz un Julija Dschyma) fiern.[4] Twee Daag later wunn se ok dat doran ansluutend Verfolgungsrennen (vör Braisaz und Marte Olsbu). Dat weern aber hör eenzig Eenzelsiege in disse Saison, ofschons se noch mehrer Top-Teihn-Platzeeren schafft hett. An dat Enn’n van de Saison belegg se in den Gesamtweltcup Platz 12 un in den Verfolgungsweltcup Platz 7. Bi de Olympisch Spelen reck se in de Verfolgung Platz 6 un bleev ahn Medaille.

De Saison 2018/19 fung beddüdend schlechter an as in dat Vörjohr. Eerst bi de veert Statschoon in Oberhof keem se in de Verfolgung mal ünner de best Teihn (nah Platz 36 in’n Sprint). Denn aber stabiliseer sück dat un in Midway keem se in’n Sprint up Platz 2 un wunn ansluutend de Verfolgung (vör Franziska Hildebrand un Kaisa Mäkäräinen). De nächst Statschoon weern denn de Weltmeesterschapen 2019 in Östersund. In de Mixed-Staffel mit Vanessa Hinz, Arnd Peiffer un Benedikt Doll wunn se dorbi mit Sülver de eerste Medaille bi en Groot-Ereignis. In’n Sprint keem se up den 6. Platz, wurr aber in de dorup folgend Verfolgung Weltmeesterin (vör Tiril Eckhoff un Laura Dahlmeier). Mit de Staffel un de Single-Mixed-Staffel wurr se jewiels Veert. In dat Massenstartrennen wunn se aber to’n Afsluss noch de Bronzemedaille (achter Dorothea Wierer un Jekaterina Jurlowa-Percht). In den Gesamtweltcup keem Denise Herrmann an’t Enn’n vun de Saison up den 8. Rang, in den Verfolgungsweltcup up Rang 6 un in’n Massenstartweltcup up Rang 9.

De nee Saison fung recht goot an mit en Platz 6 in’n Sprint van Östersund. Up de tweet Statschoon in Hochfilzen leep dat dorgegen överhoopt nich un in Sprint un Verfolgung keem se blots jewiels up den 41. Platz. De restlich Platzeeren van dat Johr weern dornah immer ünner de best 20, wobi se sogor 3 Weltcupsiege halen kunn. Bi de Weltmeesterschapen 2020 in dat italieensch Antholz reck Herrmann Platz veer mit de Mixed-Staffel un Platz fünf in’n Sprint. Se wunn aber in de Verfolgung de Sülvermedaille (achter Dorothea Wierer, vör Marte Olsbu Røiseland) un mit de Staffel an de Siet van Karolin Horchler, Vanessa Hinz un Franziska Preuß nochmals Sülver.

In den Gesamtweltcup keem se an’t Enn‘ up den darten Platz, den Platz, den se ok in’n Eenzelweltcup recken dee. Dorto keem noch Rang 5 in den Verfolgungsweltcup und Rang 6 in den Massenstartweltcup.

In de Saison 2020/21 fung se glieks mit en tweeten Platz in’t Eenzel in Kontiolahti an, keem in’n Sprint aber blots up Platz 38. De nächst Weekenenn’n, weer in Kontiolahti, gung mit Platz 5 in’n Sprint und Platz 11 in de Verfolgung ok recht goot. In Hochfilzen keem se noch tweemal ünner de best Teihn. Insgesamt leep de Saison aber schleepend. Scheeten weer all mal beter aber vör allem gung dat Loopen, wat eegentlich hör Stärke weer, lang Tiet nicht to goot för hör Ansröök, ahn dat se groot affaallen dee. Se keem allerdings passen to de Weltmeesterschapen in Pokljuka weer in Schwung. In’n Sprint verpass se up Platz 4 man knapp en Medaille, de se denn ok in de Verfolgung (Rang 8) nich halen kunn. In’t Eenzel keem se up Platz 15 un up den Massenstart hett se verzicht. De WM leep för de Düütschen insgesamt nich goot. Een Medaille bi de Mannlüüd un een bi de Fruen, un de wunn Denise Herrmann gemeensam mit Vanessa Hinz, Janina Hettich un Franziska Preuß in de Staffel mit de Sülvermedaille. Nah de Weltmeesterschap keem se in Nové Město in’n Sprint up den 10. Platz un reck in de Verfolgung denn sogor den tweeten Platz (achter Tril Eckhoff), womit se sück in de Gesamtwertung van den Weltcup weer ünner de best Teihn schuuven dee. Ok een Week later, weer in Nové Město, keem Denise Herrmann in’n Sprint nah en fehlerfree Scheeten (eerstmals in de Saison) up den 2. Platz (weer achter Eckhoff, aber vör Dorothea Wierer un Franziska Preuß). Den Platz kunn se in de ansluutend Verfolgung mit Platz 10 aber nich hollen. Nahdem bi de letzte Statschoon in Östersund för hör kien herutragend Ergevnisse mehr tostannen keemen, bleev se an’t Enn’n up den 10. Platz in de Weltcup-Gesamtwertung. In’n Eenzelweltcup keem se up Platz 6 und in Sprint- und Verfolgungsweltcup reck dat jewiels för den negenten Rang.

Utteknungen[ännern | Bornkood ännern]

  • 2014: Sülvern Loorbeerblatt
  • 2014: Ehrenkrüüz van de Bundswehr in Gold (gemeensam mit Eric Frenzel). [5]
  • 2020: Landessportler van dat Johr in Sassen. [6]

Privates[ännern | Bornkood ännern]

Denise Herrmann leevt in Ruhpolding un is mit den ehmaligen Skilanglöper Thomas Wick tosommen. Hör Süster Nadine is ok Skilanglöperin.

Weblinks[ännern | Bornkood ännern]

Commons-logo.svg Denise Herrmann. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen[ännern | Bornkood ännern]

  1. Porträt Denise Herrmann up xc-ski.de, afropen an’n 1. März 2021
  2. Verleihung des Silbernen Lorbeerblattes. Der Bundespräsident, 5. Mai 2014, afropen an’n 15. März 2020.
  3. Ergebnis DM 2019 Teamsprint (PDF) up xc-ski.de, afropen an'n 1. April 2019
  4. Frühere Langläuferin gewinnt Biathlon-Weltcup. FAZ Online (1. Dezember 2017). Afropen an’n 1. Dezember 2017.
  5. Facebook-Präsenz des Landeskommandos Sachsen, afropen an’n 23. Oktober 2014
  6. Sächsische Sportkronen vergeben. Landessportbund Sachsen, afropen an’n 11. Januar 2020.