Darja Domratschawa

Darja Domratschawa up en nah den Olympiamedaillengewinn 2010 herutgeven wittrussischen Breefmark

Darja „Dasha" Uladsimirauna Domratschawa (wittrussisch Дар’я Уладзіміраўна Домрачава, russisch Да́рья Влади́мировна До́мрачева Darja Wladimirowna Domratschewa; * 3. August 1986 in Minsk), in Startlisten meest ünner de Naam Darya Domracheva angeven, is en wittrussische Biathletin, de 2014 dree olympisch Goldmedaillen wunnen hett.

Karriere

Darja Domratschawa bedrifft siet 1999 Biathlon. De Sportlehrerin, de in Minsk un Njagan leevt geiht för den Biathlon-Club Dinamo Minsk an den Start un wurr vun Nikolai Sacharow traineert. Hör Debüt in’n Weltcup geev se to Anfang vun de Saison 2006/07 in Östersund. Bi hör dart Rennen, en Sprint in Hochfilzen, leep se as Fievte eerstmals ünner de Top 10. All 2005 in Kontiolahti wurr se in’n Sprint un de Verfolgung Juniorenweltmeesterin. In dat folgen Johr muss se sück bi de Verfolgung in Presque Isle blots Magdalena Neuner un de franzöösch Biathletin Marion Blondeau slahn geven un 2007 wunn se in Sprint un Verfolgung jewiels Sülver. In dat Johr 2008 wunn se bi de Biathlon-Weltmeesterschapen mit de Mixedstaffel de Sülvermedaille.

An’n 11. Januar 2009 is se bi dat Massenstartrennen bi de Weltcupverstalten in Oberhof in Führung liggend to dat tweet Leegendscheeten fohren. Se hett denn aber in’t Stahn schaten un harr dordör fiev Fehlschööt, wiel all Kugeln de falsch Schieven, de för dat Stahndscheeten, drapen harrn. Dissen Fehler kunn se eerst bi dat Verlaten vun den Scheetstand bemarken, wiel se as Rechtsschüttin up Bahn 1 stahnd de Konkurrentinnen nich in’n Blick harr. Wiel disse Fehler en mögelk Tietstraaf vun teihn Minüüt bedüüden dee, hett se wenig later upgeven. Dat weer dat eerste Mal, dat so wat en Biathleten in en Massenstartrennen vun den Weltcups passeert weer. Nah dit groot Missgeschick kreeg Domratschawa vööl Trost un Tospröök. Dornah gung dat in hör Leistung aber ok steil bargup. In de folgen Rennen keem se mehrfack nahnanner ünner de best Teihn. Bi den Sprint in Ruhpolding leep se as Darte eerstmals up dat Podest, een Week later wurr se in Antholz sogor Sprint-Tweete.

Meest up den Dag genau een Johr later passeer Domratschawa in Oberhof en ähnlich Missgeschick. Weer in Führung liggend, teel se bi dat darte Scheten vun den Stand een up de Schieven vun Bahn twee, hett aber wiels dat Scheten den Fehler bemarkt un kunn wenigstens een Schööt richtig setten. An’n Enn’ leeg se bi dit Rennen up den negenten Platz.

En groten sportlichen Erfolg kunn Darja Domratschawa bi de Olympisch Winterspelen 2010 in Vancouver fiern, as se in’n Eenzel de Bronzemedaille achter Tora Berger un Jelena Chrustaljowa wunn. De goot Olympiaform bewies Darja Domratschawa ebenfalls mit Rang söss in’n Massenstart un Platz acht in’n Sprint. Bi den eersten Weltcup nah de Winterspelen wunn Domratschawa bi den Sprint in Kontiolahti eerstmals en Weltcup-Rennen un kunn in de ansluten Verfolgung den eersten Platz behollen. Dör en Sieg in dat letzt Massenstartrennen vun de Folgesaison seker se sück den Sieg in de Gesamtwertung vun den Massenstartweltcup.

In de Saison 2011/2012 weer se de starkste Konkurrentin vun de latere Gesamtweltcupsiegerin Magdalena Neuner. Domratschawa kunn mit söss Saisonsiegen woll blots den tweten Platz in de Gesamtwertung beleggen, wunn aber weer den Massenstartweltcup un wunn dorto den Weltcup in de Verfolgung. Ok bi de Weltmeisterschapen in Ruhpolding hemm sück Domratschawa un Neuner in’n Sprint un in de Verfolgung de Duelle um den Sieg leefert. Wunn Domratschawa in’n Sprint de Sülvermedaille achter Neuner, keem se in de Verfolgung up den eersten Platz vör Neuner.

Nah en schleppen Start in de Weltcup-Saison 2012/2013 kunn sück Domratschawa af den Weltcup in Ruhpolding weer an dat Podium herankämpen. Bi de WM 2013 in Nové Město seker se sück mit 9 Sekunden Vörsprung up Tora Berger de Goldmedaille in’n Massenstart. An’ Enn’ vun de Saison lann se as in de Vörsaison weer up den tweten Platz in de Gesamtweltcupwertung.

Bi de Olympisch Spelen in Sotschi wull Domratschawa hör Bestleistung afropen un sück in de Ergevnisse vun Vancouver stiegern. Dat se in en goot Form weer, harr se all mit hör beid Weltcupsiegen in Oberhof nahwiest, wo se in’n Sprint un in de Verfolgung vör de latere Gesamtweltcupsiegerin Kaisa Mäkäräinen winnen kunn. Hör gröttst Triumph bit dorhen sullen aber de olympisch Spelen wurrn. De Platz 9 in dat Sprintrennen weer allerdings tonächst temelk ernüchternd, harr se doch blots een Scheetfehler, keem aber doch 32 Sekunn achter de fehlerfree Kuzmina in dat Teel. Aber in de anslutend Verfolgung hett se all överhaalt un wunn de Olympisch Goldmedaille vör Tora Berger un Teja Gregorin. Die twete Goldmedaille wunn se in dat Eenzelrennen (vör Selina Gasparin un hör Landsfru Nadseja Skardsina). De Massenstart vun Sotschi hett denn hör Hattrick kumplett maakt. Mit 20 Sekunn Vörsprung up de Tschechin Soukalová seker sück Domratschawa hör darte Goldmedaille. In hör Heimatland hett man hör dorna as Weltstar fiert, so wurrn bispeelswies Breefmarken mit hör Kopp un den dree Medaillen druckt.

2013 hett de Biathletin de wittrussischen Punkte bi den Eurovision Song Contest verkünnd. Nah hör Olympiasiege wurr se as eerste Frau överhoopt un as een vun bitlang 11 Titeldräger mit den Titel Held vun Wittrussland uttekent. 2015 folg de Utteeknung as Sportlerin vun dat Sportjohr 2014 in Europa.

Bi de Biathlon-Weltmeesterschapen 2015 in dat finnisch Kontiolahti gung se ahn Medaille nah Huus. De best Chance up en Medaille harr se in’n Massenstart, as se sück up de Teelgeraden de Italienerin Karin Oberhofer um 2,1 s slahn geven muss un up den veerten Platz lann.

In Chanty-Mansijsk 2015 hett se den glieken Fehler as in Oberhof 2009 maakt, wo se in’n Massenstart in Führung liggend bi dat tweet Scheten stahnd schaten hett. In de Verfolgung in Chanty-Mansijsk stell se sück ebenfalls bi dat tweet Scheten up de Scheetmatt. As se sülvst seggt hett, weer hör de Fehler wegen dat luutstarke Publikum upfallen. Se hett sück denn henleggt un wunn de Verfolgung. Mit den afsluten 4. Platz in’n Massenstart wunn se to’n eersten Mal in hör Loopbahn den Gesamtweltcup.

In de Saison 2015/2016 geiht Domratschawa nah en Erkrankung an Pfeifferschen Drüsenfever nich an den Start un legg anslutend wegen en Schwangerschaft en Paus in. In’n Januar 2017 geev se bi den Weltcup in Oberhof hör Comeback un wunn bi de Biathlon-WM 2017 blots veer Maand nah de Gebort vun hör Dochter de Sülvermedaille in de Verfolgung (achter Laura Dahlmeier, aber vör Gabriela Koukalová). In de Gesamtwertung vun den Biathlon-Weltcup 2016/2017 reck se ok wegen twee Podestplätzen immerhen Platz 24.

Privatleven

An’n 16. Juli 2016 hett se den norweegsch Biathleten Ole Einar Bjørndalen heiraadt un kreeg an’n 1. Oktober 2016 in Minsk en Dochter, Xenia Bjørndalen.

Weblenken

Darja Domratschawa. Mehr Biller, Videos oder Audiodateien to’t Thema gifft dat bi Wikimedia Commons.

• Indrag in de Datenbank vun de IBU (engelsch)
• Darja Domratschawa in de Datenbank vun Sportsreference.com (engelsch)
• Porträt bi Biathlon2b.com
• Websteed vun Darja Domratschawa (russisch un engelsch)
• Bildgalerie vun Darya Domracheva