Déjà Vu (2006)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Déjà Vu
Düütsch Titel: Déjà Vu – Wettlauf gegen die Zeit
Produkschoonsland: USA, Grootbritannien
Johr vun’t Rutkamen: 2006
Läng: 126 Minuten
Originalspraak: Engelsche Spraak
Öllersfreegaav in Düütschland: FSK 12
Filmkru
Speelbaas: Tony Scott
Dreihbook: Bill Marsilii
Terry Rossio
Produkschoon: Jerry Bruckheimer
Musik: Harry Gregson-William
Kamera: Paul Cameron
Snitt: Jason Hellmann
Chris Lebenzon
Szenenbild: Chris Seagers
Kledaasch: Ellen Mirojnick
Dorstellers

Déjà Vu (op plattdüütsch so veel as „Al mol sehn“; dt. Titel: Déjà Vu – Wettlauf gegen die Zeit) is en US-amerikaanschen Action-Thriller vun den Speelbaas Tony Scott ut dat Johr 2006 mit Denzel Washington in de Hööftrull. De Film is gemeesnom vun Touchstone Pictures un Jerry Bruckheimer Films produzeert worrn un harr an’n 20. November 2006 in New York City Premiere. In Düütschland keem de Film an’n 27. Dezember 2006 in de Kinos.

Inholt[ännern | Bornkood ännern]

Na en Bombenanslag op en Fährschipp in New Orleans warrt de ATF-Agent Doug Carlin beopdragt, den Schauplatz op Bewiesmaterial hen to ünnersöken. Ok as dat FBI mit den Fall betroet warrt, hollt se an Carlin fast, vunwegen dat he sik goot utkennt. In’n Rahmen vun de Ünnersöken warrt en do’e Fro anspöölt, de dull verbrennt is. Dat sütt ut, as weer se een vun de Oppers vun den Anslag, man Carlin finnt rut, dat se al vör den Anslag ümbröcht weer. Liekers glöövt he an een Tosamenhang un maakt se in ehr Wahnung op de Söök na wietere Sporen.

Dat FBI geiht op de Spoor in. Carlin schall in jemehr Quarteer mit en modern Redschopp to’n Överwachen versöken, den richtigen Oort to finnen, vunwegen dat man dormit nipp un nau veer Daag un söss Stunden in de verleden Tiet kieken kann. As sik rutstellt, hannelt sik dat üm en Apparat, dat en lütt Wormlock tügen deit. Dorüm is dat ok nich mööglich, in de Tiet hen un torüch to jumpen. Eerst later stellt Carlin fast, dat dat Wormlock ok in de verleden Tiet wohrnahmen warrn kann, un dat sik sogors lütte Saken in de annere Tiet schicken laat.

Mit Carlin sien Kombinatschoonsvermögen un mit Hülp vun de Maschien finnt se den Däder, den se fastnehmen künnt. He gifft den Anslag to un is stolt op dat, wat he doon hett, vunwegen dat he en politisch Teken setten wull. För dat FBI is de Fall dormit afslaten, man nich för Carlin, de mit Hülp vun den Apparat den Anslag in de verleden Tiet hinnern un vör allen ok Claire – de ehr Liek em op de Spoor bröcht hett – redden will. As de Sporensekerung in Claire ehr Wahnung Fingerafdrücken vun Carlin funnen hett, ofschoonst he bi sien Ünnersöken Hanschen dragen hett, slutt he, dat he vör den Moord al in ehr Wahnung wesen hebben mutt – he de Tietreis also al maakt hett. Also lett he sik op de Gefohr in.

As he na sien Tietreis wedder to sik kummt, liggt he in en Krankenhuus. Vun dor neiht he mit en Krankenwagen un en Pistool vun en Wachmann ut un föhrt na dat Versteek vun den Däder, dat he bi sien Ünnersöken vörher al sehn harr. He kummt jüst rechttietig an, üm den Moord an Claire to hinnern. De Däder is övertüügt, dat se beid in en Gasexplosion ümkamen sünd un maakt sik op’n Weg, de Bombe op de Fähr to bringen. Man, de beiden överleevt. Carlin is aver anschaten worrn, so dat se in Claire ehr Wahnung anhollt, üm de Wunn to versorgen. Un so lett he nu ok de Sporen torüch, de in de tokamen Tiet al lang opdeckt weern. Tosamen föhrt se wieter, üm den Anslag op de Fähr aftowennen. Claire schall de Wachtlüüd Bescheed geven, wenn de Fähr afleggt hett, man de Plaan geiht nich op, vunwegen dat de Däder dat Auto wedderkennt, mit dat se na de Fähr föhrt sünd. Dorüm geiht de Däder torüch an Boord, wat Claire aver sehn deit. Se jumpt in letzte Sekunn ok an Boord.

De Däder kriggt Claire aver in sien Gewalt un stickt er in sien Auto mit de Bomb. He warrt kort later aver vun Carlin opdeckt. Dat kummt to en Scheeteree. Carlin is kloor, dat de Däder för sien Teel lever doodblieven dee, as optogeven. Dorüm gifft he Claire en Teken, dat se op em tostüeren schall. As he aflenkt is, schütt Carlin em doot. De Wachtlüüd an Boord weet aver nich, dat he vun’n ATF is un hollt em nu för en Verbreker. Dordör blifft jem keen Tiet mehr de Bomb to entschärfen, also föhrt se mit dat Auto in’n Mississippi, üm wenigstens de Lüüd op de Fähr to redden. Claire kummt rechttietig rut ut dat Auto, man Carlin blifft bi de Explosion dood.

Claire warrt an Land bröcht un sütt nu, as de Carlin ut de verleden Tiet för de Ünnersöken an den Schauplatz kummt. Ehr warrt kloor, dat in’t Auto de Carlin ut de Tokumst doodbleven is, un dat em dat för korte Tiet tweemol geven hett. So slutt sik de Krink, un de tokamen Tiet, as se wesen is, höört op to existeren. De Carlin ut ehr egen Tiet weet noch nich, wokeen Claire överhaupt is. De beiden föhrt an’t Enn vun Film tosamen in sien Auto weg un Claire söcht sien Vertroen, jüst so, as he dat vörher bi ehr doon hett.

Utteken[ännern | Bornkood ännern]

Déjà Vu is in’t Johr 2007 söss mol för Filmpriesen vörslahn worrn, as to’n Bispeel för den Taurus Award un den Saturn-Pries. Uttekent weer he opletzt blots eenmol, neemlich mit den Gold Reel Award för den Utleher Buena Vista International.

Weblenken[ännern | Bornkood ännern]