Conspiracy Theory

Vun Wikipedia
Filmdaten
Plattdüütsch Titel:
Originaltitel: Conspiracy Theory
Düütsch Titel: Fletcher’s Visionen
Produkschoonsland: USA
Johr vun’t Rutkamen: 1997
Läng: 135 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Richard Donner
Dreihbook: Brian Helgeland
Produkschoon: Jim Van Wyck
Musik: Carter Burwell
Kamera: John Schwartzman
Snitt: Kevin Stitt
Frank J. Urioste
Szenenbild: Paul Sylbert
Kledaasch: Ha Nguyen
Dorstellers

Conspiracy Theory (op platt so veel as „Verswörenstheorie“; dt. Titel Fletcher’s Visionen) is de Titel vun en US-amerikaanschen Thriller un Filmdrama ut dat Johr 1997, bi den Mel Gibson un Julia Roberts de Hööftrullen speelt hebbt. Speelbaas weer Richard Donner. De Produkschoon vun den Film hett ruchweg 75 Millionen US-Dollar köst, produzeert weer he vun Warner Bros.

Inholt[ännern | Bornkood ännern]

Jerry Fletcher is Taxifohrer in New York City. He is övertüügt, dat mit de Sellschop wat fuul is, un kummt jümmer to bi de Staatsafkaatsche Alice sutton an, üm ehr snaaksche Verswörenstheorien to vertellen. Een Dag warrt he vun Dr. Jonas roovt un foltert. Fletcher kann weglopen, nadem he Dr. Jonas düchtig in de Nees beten hett. As he Alice dorvun vertellen will, warrt he in’t Foyer vun’t Bürohuus, woneem se arbeit, fastnahmen. Man bringt em in en Krankenhuus un maakt em mit Handschellen an’t Bett fast.

As Alice in’t Krankenhuus kummt, üm na Fletcher to kieken, sünd al eenige Vertreders vun Reggerensbehörden dor. As Mitarbeiter vun’n FBI is Agent Lowry togegen, wiel Dr. Jonas as Psychiater vun de CIA vörstellt warrt. Alice fallt op, dat Jonas an de Nees besehrt is, so dat se anfangt Fletcher sien Geschicht to glöven.

Mit ehr Help kann Fletcher ut dat Krankenhuus utneihn. He verstickt sik in eher Auto un kann ehr na sien Wahnung bringen, ofschoonst se Agent Lowry verfolgt warrt. In de geheeme Wahnug vun Fletcher sütt Alice en Bild vun ehr, as se op en Peer rieden deit. Ehr warrt kloor, dat Fletcher ehr al vör längere Tiet beobacht hebben mutt, vun wegen dat se dat Rieden al vör eenige Maanden opgeven hett. Intwüschen warrt de Wahnung vun en Sünnerkommando hoochnahmen, man Fletcher hett an allns dacht, un so künnt se weglopen.

Alice versöcht nu, Kuntakt to kriegen mit de Abonnenten vun de Tietschrift, de Fletcher över Verswörenstheorien rutgifft. Se mutt aver faststellen, dat in de letzten Stünnen veer vun fief vun jem an de Siet maakt worrn sünd. De föffte Adress hett en Nasennandrag na’t Huus vun’t Straafgericht in Manhattan. As Alice dor henföhrt, warrt se vun Dr. Jonas affungen.

Se finnt rut, dat Dr. Jonas för de CIA geheeme un illegale Experimenten maakt hett in de Oort vun The Manchurian Candidate. As sik rutstellt, weer Fletcher een vun sien Oppers, de dör Folter un mentale Manipulatschoon to Möördern maakt worrn sünd. De Experimenten sünd aver afbroken worrn, as een dat Verfohren anwennt hett, üm John Hinckley, Jr. dorto to bringen, en Anslag op Ronald Reagan to veröven. Dr. Jonas verteelt Alice dat he nu rutfinnen müsse, wokeen achter den Anslag stahn deit. Dorna seggt he ehr, dat Fletcher vör wenige Maanden Alice ehrn Vadder ümbröcht hett. To’n Bewies bringt he en Foto vun Alice, dat ehern Vadder tohöört hett un in en Sluutfack funnen worrn is, dat Fletcher in en Bank anmiet harr.

Alice un Fletcher draapt sik noch mol wedder. As se tosamen de Farm vun ehrn Vaddern besöökt, weet Fletcher wedder, wat passeert is un gesteiht in, dat he dorop programmeert wesen is, ehrn Vadder dood to maken. He weer vun Dr. Jonas schickt, üm em ümtobringen, hett dat aver nicht doon künnt. Wohrhaftig harr he sik sogor mit em anfrünnt. En annern hett den Moord begahn, de ok vun Jonas schickt worrn weer, un Fletcher weer nich in de Laag wesen, dat to hinnern. Mit sien letzten Atentöög harr de Vaddern em dat Bild vun Alice geven un em opdragen, ehr to schulen. Jonas un sien Lüüd hebbt Fletcher sien Handy verfolgt un künnt em fastnehmen. As ok noch de Baas vun Alice doodschaten warrt, neiht Alice ut.

En konkurreren Behöörd vun de Regeeren, de vun Agent Lowry vertreden warrt, will de Aktivitäten vun Dr. Jonas opdecken un intressert sik ok för Fletcher. Alice markt, dat sik dat dorbi nich üm dat FBI hannelt. As Alice dorop direkt ansnackt, seggt Lowry, dat sien Behöörd „in de Familie vun de Geheemdeensten de Unkel is, över den man nienich snackt“.

Flecther warrt nochmol roovt un wedder in den Flögel vun en Krankenhuus fangensett, de siet Johren nich mehr bruukt warrt un woneem he dormols foltert weer. Alice is in de Laag em to finnen un kann Lowry to Help ropen. Bi en Kamp warrt Fletcher vun Dr. Jonas anschaten. Dorophen schütt Alice Jonas dood. Fletcher warrt mit en Rettungsheevschruver wegbröcht, blifft aver schienbor an sien Sehren dood. Later besöcht Alice sien Graff un leggt dor en Afteken af, dat se vun Fletcher schenkt kregen harr. As se dat Afteken korte Tiet later an de Saadeldeek vun ehr Peerd wedderfinnt, weet se, dat Fletcher an’t Leven is. Sien Dood is blots vörtüüscht worrn, üm ehr un Fletcher as wichtige Tügen vör de Mackers vun Dr. Jonas to schulen, de noch över sünd.

Kritik[ännern | Bornkood ännern]

De Kritken fülln ünnerscheedlich ut. De Film-dienst, Utgaav 22/97, wies sik untofreden mit de Geschicht, de in den Film vertellt warrt, loov aver de Biller[1].

De Kritiker Mick LaSalle hett in’n San Francisco Chronicle vun’n 8. August 1997 schreven, dat de Film na twintig Minuuten sien Spaaß verleren de. He meen ok, dat de Geschicht teemlich mau weer, man dör de Regiearbeit to’n Deel wedder gootmaakt warrt. Dat Speel vun de beiden Hööftdorstellers hett he loovt[2].

An’n 7. November 2011 stell Spiegel online dat Speel vun de beiden Hööftdorstellers rut un beteken den Film as temporieken „Seelentrip“[3].

Utteken[ännern | Bornkood ännern]

De Film is för tosamen fief Filmpriesen vörslahn wesen, und hett veer dorvun wunnen:

Anners wat[ännern | Bornkood ännern]

  • In de Folterszeen warrt de Fletcher mit Lichtblitzen anstrahlt. De Kinobesökers sünd dorüm warnt worrn, vun wegen dat de Stroboskopeffekt in’n Verdacht steiht Epilepsieanfäll utlösen to künnen.
  • De düütsche Titel Fletcher’s Visionen is in disse verkehrten Schrievwies mit dat verkehrte ’s fastleggt worrn. De richtige Schrievwies weer ahn dat Apostroph wesen.
  • In den Film warrt en Geheemprojekt vun de CIA ünner den Naam MK ULTRA anspraken. Dat Projekt geev dat wohrhaftig.

Borns[ännern | Bornkood ännern]

  1. Zitat im Dirk Jasper FilmLexikon
  2. Filmkritik von Mick LaSalle
  3. http://tvprogramm.spiegel.de/detailansicht.php?sendungs_id=23013433

Weblenken[ännern | Bornkood ännern]