Bullenbrook

Vun Wikipedia
Zur Navigation springen Zur Suche springen

De Bullenbrook is en Rebeed in de Masch von de Elv, dat to de Gemenen Hornborg, Nottensdörp un Buxthu höört. Dat Rebeed in’n Noorden, afdeelt dör de Landwettern un den Sanddamm von de Autobahn 26, liggt in de Gemeen Jörk in Oolland un de Süüdrand von’n Bullenbrook is de Geestkant von de Stoder Geest mit de Dörper Schragenbarg, Nottensdörp un Neeklooster. Op disse Geestkant verlöppt ok de Bahnlien von de Nedderelvbahn. In’n Oosten liggt de Puggenpohl un dat Dörp Dammhusen.

In’n Noordwesten münnt de Landwettern bi Hornborg an de Kreisstraat 36 in de Au. Dor liggt ok dat Schöppwark Bullenbrook. De Bullenbrook warrt as Polderrebeed bruukt, dat bi hogen Pegel Water ut de Au opnimmt. De Wischen in’n Polder liggt op so 0,25 bet 0,75 m över NN. Dat sünd so 650 Hektar, de 3,44 Millionen m³ opnehmen köönt, wenn dat Water bet op 1,09 m över NN opstaut warrt.

De Bullenbrook weer fröher en gemeenfree Rebeed binnen den Landkreis Stood. Dat Land harr de Dörper Nottensdörp un Bliersdörp in Realgemeenschop tohöört. De Bullenbrook is denn aver an’n 1. April 1980 an de Gemenen Hornborg, Nottensdörp un Buxthu opdeelt worrn, de dor angrenzt sünd. Al an’n 1. November 1952 harrn 15,28 Hektar, de dichtbi Hornborg legen hebbt, von’n Bullenbrook an de Gemeen Hornborg wesselt.

In’n Tweten Weltkrieg hebbt von Oktober 1944 af an in’n Bullenbrook Baracken stahn, in de Dwangsarbeiders ut dat KZ Neengamm ünnerbröcht weren, de in Hornborg bi Valvo un in’n Haven Arbeid doon müssen.


Koordinaten:53° 30′ N, 9° 37′ O