Bartelmees-Kark (Imßen)
Von de Bartelmees-Kark is vondaag blots noch de Ossentoorn nableven. Dat weer de Kark von dat Kaspel Imßen. Vondaag hett de Zionkark in Weddewarden disse Rull övernahmen.
Geografie
[ännern | Bornkood ännern]Dat Kaspel Imßen liggt in de Masch von Land Wusten an de Küst von de Noordsee/Butenwerser. To dat Kaspel höört de Öörd Imßen, Dingen, Weddewarden un Weddewarderbüttel. Fröher hebbt dor ok noch de Buurschop Leps un de Hoff Brinkamahoff mit tohöört. Leps is aver in en Stormflood ünnergahn un de Brinkamahoff is afreten worrn, üm Platz för den Bremerhobener Haven to maken.
Historie
[ännern | Bornkood ännern]De Kark is 1218 as romaansche Feldsteen-Kark boot worrn, nadem de vörherige Kark afbraken warrn müss, von wegen dat de Werser ehren Loop mit de Tied ännert hett. Disse Kark weer een von de dree öllsten Karken in Land Wusten. Se is de Hilligen Bartelmees un Thomas wieht. De Toorn keem dor eerst in de Tied üm 1500 to.
1875 is in de Bartelmees-Kark de Blitz inslahn. Dat Kaspel hett denn beslaten, twüschen Dingen un Weddewarden en ne’e Kark to boon. Dat hebbt se denn ok daan un de ne’e Kark, de 1877 trech weer, hett den Naam Zionkark kregen. Dat Dööpbecken un de Klocken hebbt se in de ne’e Kark brocht. Dat Schipp von de ole Kark hebbt se 1895 afreten. Blots de Toorn is as Seeteken stahn bleven. 1897 hebbt se dat Spitzdack rünnerhaalt. Sietdem warrt de Toorn ok as Utkiek-Toorn bruukt.
Dat Gelänn üm de ole Kark warrt aver vondaag noch as Karkhoff för dat Kaspel Imßen bruukt.
De Toorn is ok in dat Wapen von de Oortschop un fröhere Gemeen Imßen weddertofinnen.
Saag
[ännern | Bornkood ännern]En Saag vertellt, dat de Lüüd ut dat Kaspel sik nich enigen kunnen, woneem de Kark stahn schull. Jeder wull de Kark in sien Dörp hebben. Dorüm hebbt se twee Ossen tohoopbunnen un beslaten, dat dor, woneem de Ossen sik dalleggt, de Kark stahn schull. So is dat kamen un dorüm heet de Karkentoorn an’n Diek Ossentoorn.
Pastoorn
[ännern | Bornkood ännern]- 1552–1588: Christian Wolbers
- vör 1615–na 1632: Oswald Gryne
- vör 1663–1669: Joachim Gottschau
- 1670–1680: Theodosius Osterdorff
- 1681–1691: Bernhard Oelrich
- 1692–1693: Georg Andreas Wittkopf
- 1694–1742: Dierk Anton Witte
- 1742–1750: Paul Gottfried Winkelmann
- 1750–1758: Johann Georg Meyer
- 1758–1759: Johann Hinrich Crusius
- 1760–1771: Bove Ibes
- 1772–1779: Johann Hermann Christoph Polemann
- 1780–1790: Johann Friedrich Wesselhöft
- 1791–1807: Johann Hinrich Meeden
- 1808–1841: Johann Hinrich Mattfeld
- 1841–1875: Adolph Georg Friedrich König
- 1876–1900 Albert Heinrich Georg Nicolassen
För de Pastoorn von dat Kaspel Imßen na disse Tied kiek bi Zionkark.
Footnoten
[ännern | Bornkood ännern]
Koordinaten:53° 37′ N, 8° 31′ O