Brinkamahoff

Vun Wikipedia

De Brinkamahoff (hoochdüütsch Brinkamahof) weer en Hoff an dat Över von de Butenwerser, de to dat Kaspel von de Bartelmees-Kark in Imßen höört hett.

Geografie[ännern | Bornkood ännern]

De Hoff leeg in de Masch ganz an’t Süüdenn von Land Wusten un direkt achter’n Diek von de Butenwerser.

De Naveröörd weren Langen un Speckenbüttel in’n Noordoosten, Leh in’n Süüdoosten, Bremerhoben in’n Süden un Weddewarden un Dingen in’n Noordwesten.

Historie[ännern | Bornkood ännern]

De öllste Naam von’n Hoff is Halsum. Aver veel fakener is de Hoff na sien Besitter nöömt worrn. Dat weer toeerst na’n prüüßschen Raad un Resident Johannes Philippus Tilemann genannt Schenck de Schencksche Hoff un denn na de Familie Olbers de Olbersche Hoff.[1] Eerst as Tjark Brinkama den Hoff 1783 von A. F. Olbers köfft hett, hett he na sien ne’en Besitter den Naam Brinkamahoff kregen.[2]

1827 hett de Stadt Bremen in’n Süden von’n Hoff den Havenoort Bremerhoben anleggt.

Von 1867 bet 1872 is en lütt Enn in’n Noordwesten von’n Hoff dat Fort Brinkamahoff I anleggt worrn un 1875 bet 1881 noch en Stück wieder in’n Noorden dat Fort Brinkamahoff II. De beiden Forts schullen tohoop mit de Forts Langenlütjen I un Langenlütjen II op de ollnbörgsche Sied von de Werser de Münn von’n Stroom un den Haven militärsch afsekern.

De Lüchttoorn Brinkamahoff is 1910/1911 in dat Wadd vör’n Hoff boot worrn.

Bi’n Bo von de Noordslüüs 1928 sünd dat Fort Brinkamahoff I un de Brinkamahoff sülvs afreten worrn. Dat Fort Brinkamahoff II hett noch bet 2000 bestahn, as dat för den Bo von dat Container-Terminal Bremerhoben afreten worrn is.

Vondaag is dat Rebeed kumplett Deel von’n Bremerhobener Haven, tellt aver as Stadtbreemsch Överseehavenrebeed Bremerhoben to’n Bremer Stadtdeel Havens.

Verwaltungsgeschicht[ännern | Bornkood ännern]

In de Franzosentied von 1810 bet 1814 hett de Oort to de Mairie Wremen in’n Kanton Dorum höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett bet 1852 to dat Vaagdiegericht Land Wusten tohöört. Von 1852 bet 1885 weer dat in dat Amt Dorum un denn in’n Kreis Leh. An’n 1. April 1927 is de Hoff tohoop mit Weddewarden Deel von Bremerhoben worrn.

Inwahnertall[ännern | Bornkood ännern]

Johr Inwahners
1791-00-001791[3] 1 Füürsteed
1812-00-001812[4] 10
1824-00-001824[5] 1 Füürsteed
1871-12-011. Dezember 1871[6] 15 Lüüd, 1 Huus

Religion[ännern | Bornkood ännern]

De Brinkamahoff weer evangeelsch-luthersch präägt un hett bet 1895 to dat Kaspel von de Bartelmees-Kark Imßen höört un na 1895 von de Zionkark Imßen.

Footnoten[ännern | Bornkood ännern]

  1. Johann Heinrich Pratje: Vermischte historische Sammlungen. Stood 1845, Sied 224
  2. Niederdeutsches Heimatblatt Nr. 769. Männer vom Morgenstern, Januar 2014
  3. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 175
  4. Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 103
  5. Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 90
  6. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 153


Koordinaten:53° 34′ N, 8° 34′ O