Mairie Wremen

De Mairie Wremen weer in de Franzosentied (1810 bet 1813) een von de veer Mairien, in de de Kanton Dorum indeelt weer. De Seet weer in Wremen. Se harr 1708 Inwahners.

Historie

De Ümgegend von Wremen hett vör de Franzosentied to dat Vaagdiegericht Land Wusten in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.

Binnen Westfalen weer de Mairie Wremen een von de ölven Mairien in’n Kanton Dorum von’n Distrikt Bremervöör, Departement von de Elv- un Wersermünnen. Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Wremen weer nu een von de veer Mairien in’n Kanton Dorum, Distrikt Bremerleh, Departement von de Wersermünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de dree Mairien Wremen, Misselwarden un Dingen (all dree in’n Kanton Dorum) höört harrn.

1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.

Öörd

Dor hebbt düsse Öörd tohöört:

• Königriek Westfalen:

  Wremen, Schottwarden, Hofe, Rintzeln, Smarrn

• Kaiserriek Frankriek:

  Wremen (454 Inwahners), Dingen (233), Imßen (11), Weddewarden (198), Misselwarden (119), Olendiek (88), Bowarden (31), Weddewarderbüttel (4), Engbüttel (28), Flohborg (32), Fockwarden (7), Hammbüttel (6), Heisternest (4), Lütjendörp (22), Middelstreek (16), Misselwarderspecken (10), Halsum/Brinkmannshoff (10), Schaapweg (20), Solthörn (34), Twendamm (38), Veerhusen (22), Wetenweg (8), Hofe (99), Rintzeln (39), Smarrn (72), Schottwarden (57), Hülsen (46)

Vondaag sünd düsse Öörd Deel von de Gemeen Wuster Noordseeküst.