Bahnverkehr in Belize

Fröhere Bahnbrügg von de Stann Creek Railway, de nu as Stratenbrügg för’n Hummingbird Highway bruukt warrt

Stann Creek Railway

Vaca Falls Railway

Dat gifft vondaag keen Bahnverkehr in Belize mehr. Fröher hebbt in Belize Bahnlienen för de Forst- un Plantaaschenweertschop bestahn, de vondaag aver all wedder afboot sünd. Bahnlienen extra för’n Personenverkehr hett dat in Belize to keen Tied geven.

De Verkehr in Belize löppt vondaag vör allen över de Straat un mit Flegers.

Bahnlienen

De Bahnlienen sünd all Smallspoorbahnen ween.

Stann Creek Railway

De Stann Creek Railway hett von 1908 bet 1937 bestahn un hett de Stadt Dangriga mit’n Oort Middlesex verbunnen. Dat weren üm un bi 40 Kilometer. De Bahn is von de United Fruit Company för’n Transport von Woren boot worrn. Op de fröhere Bahntrass verlöppt nu de Hummingbird Highway. Dat hett Siedenbahnen na verscheden Plantaaschen geven. In de Johren 1930 hett dat för en Tied ok Personenverkehr geven, aver jümmer blots blangenbi to’n Worenverkehr.

Vörgänger von de Stann Creek Railway weer en Bahn, de von Mulis tagen worrn is. Düsse Bahn güng von Dangriga na Melinda un is 1892 von dat British Honduras Syndicate anleggt worrn.

Hill Bank–Gallon Jug

De Bahnlien twüschen Hill Bank an’n New River un Gallon Jug is boot worrn, üm Woren von de Farmen un Plantaaschen von Gallon Jug dör de Sierra de Agua na’n New River to bringen. Von dor sünd se mit Scheep wiedertransporteert worrn.

Vaca Falls Railway

De Vaca Falls Railway (oder Vaca Tramway) bestünn von de Johren 1920 bet 1952 un weer 24 Kilometer lang. Se weer vör allen för’n Transport von Holt dor. Dat Holt is in’n Oorwoold slahn worrn un is mit de Bahn na Noorden an de Vaca-Waterfäll an’n Macal River bröcht worrn. Von dor is dat Holt den Stroom dal flött worrn.

Weblenken

Bahnverkehr in Belize. Mehr Biller, Videos oder Audiodateien to’t Thema gifft dat bi Wikimedia Commons.