Avalonia

Vun Wikipedia
Rebeden, in de vondaag de ole Landmass von Avalonia liggt
Avalonia in de Tied von dat Ordovizium, Silur un Devon

Avalonia weer en Lüttkontinent in de Tied von dat Ordovizium.

Geschicht[ännern | Bornkood ännern]

Avalonia hett sik as Vulkanbagen an de Noordkant von Gondwana billt. In de Tied von Proterozoikum un Paläozoikum (so 700 bet 480 Ma vör uns Tied) weer dat Rebeed von Avalonia Deel von Gondwana un leeg süden von’n Äquater. In de eerste Tied von dat Ordovizium (na 480 Ma vör uns Tied) is Avalonia denn dör en Rift von Gondwana afbraken un suttje na Noorden drift, op Baltica un Laurentia to. Twüschen Gondwana un Avalonia hett sik denn de Rheische Ozean billt.

Twüschen Avalonia un Baltica leeg de Tornquist-Ozean un twüschen Avalonia un Laurentia de Iapetus-Ozean. De beiden Ozeans sünd all beid ünner de Kontinentaalplaat von Avalonia ünnerdükert worrn un sünd bilütten lütter worrn bet Avalonia in de Enntied von dat Ordovizium (üm un bi 440 Ma vör uns Tied) mit Baltica tohoopstött is. Dorbi hett sik as Nahtlien de Tornquist-Lien billt.

In de Tied von dat Silur sünd Baltica un Avalonia denn mit Laurentia tohoopstött. Disse ne’e Kontinent warrt denn Laurussia nöömt.

Later in dat Mesozoikum hett sik denn bilütten von Noorden na Süden de Noordatlantik apendaan un Laurussia opsplitt. Dorbi sünd Delen von dat ole Avalonia denn na Noordamerika kamen un annere Delen na Europa.

De ole Landmass von Avalonia finnt sik vondaag an de Oostküst von de USA un Kanada (Noordflorida över Maine, Neebruunswiek, Neeschottland un Neefundland) un in Europa in’n Süden von Irland, in England un Wales, in Noordfrankriek, Belgien, de Nedderlannen, Noorddüütschland un reckt mit en lütt Stück noch bet na Polen rin. Ok in de Karpaten un an beide Sieden von de Straat von Gibraltar sünd dor Resten von to finnen.

Forscheree[ännern | Bornkood ännern]

Den Naam Avalonia hett en Grupp von Forschers üm Christopher Scotese 1979 opbröcht. De Naam kummt af von de Halvinsel Avalon in Neefundland.