A Fish Called Wanda

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: A Fish Called Wanda
Düütsch Titel: Ein Fisch namens Wanda
Produkschoonsland: USA
Grootbritannien
Johr vun’t Rutkamen: 1988
Läng: 108 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Charles Crichton
Dreihbook: Charles Crichton
John Cleese
Produkschoon: Michael Chamberg u.a.
Musik: John Du Prez
Kamera: Alan Hume
Snitt: John Jympson
Szenenbild: Roger Murray-Leach
Kledaasch: Hazel Pethig
Dorstellers

A Fish Called Wanda (op Platt so veel as „’N Fisch, de Wanda heet“; dt. Titel: Ein Fisch namens Wanda) is en amerikaansch-britische Krimikummedie vun den Speelbaas Charles Crichton ut dat Johr 1988. In de Geschicht beleevt de veer Hööftfiguren allerhand Verwickeln nadem se en Eddelsteenroof maakt hebbt.

Inholt[ännern | Bornkood ännern]

Veer teemlich ünnerscheedlich Halunken plant en Diamantenroof: George, de kole Anföhrer vun de Bande, de swienplitsche Wanda, de all üm den Finger wickelt, ehr Leefsten Otto, de sik as ehr Broder utgifft un en beten wat eenfach is in’n Kopp un de stöternde Ken, de keen Deert wat andoon kann. De Roof löpt af as plaant, man blots en gnadderige ole Fro, de jümmers blots ehr Hunnen in’n Sinn hett, kriggt jem to Gesicht un is de eenzige Tüügsche.

Na den Roof deelt sik de Grupp op, üm sik dree Daag later an’n Flaghaven wedder to drapen. George geiht op Nummer seker un bringt de Büüt in en geheem Verstek, un wirklich warrt he kott dorna vun Otto un Wanda an de Polizei verraad un kummt in’n Knast. To laat markt de beiden, dat de Diamanten nich mehr dor sünd, woneem se jüm na den Roof lagert hebbt.

Wanda smitt sik dorophen an Archibald Leach ran, den Afkaat vun George, de bi sik in’t Huus mit sien jümmers jammernde Fru un sien verwöhnt Deern ok nix to lachen hett. Archie, hen un weg vun Wandas Anmaken, fallt ok foorts op ehr rin. Otto is vun Wandas Plan nu aver gor nich övertüügt un kann dat op’n Dood nich af, dat se mit den Macker anbänneln deit, snüffelt jüm na maakt meist allen’s twei, as he ut Ieversucht bi jüm rinplatzt.

Ken kriggt in de Twüschentiet vun George den Opdrag, de ole Fro an’ne Siet to maken, de em as eenzig Tüügsche wat anhebben kunn. De annern beiden hett he sowieso al op’n Kieker. Ken kriggt dat twors nich op de Reeg, de Olle sülvst üm de Eck to bringen, man jedet mol kriggt he ut Versehn een vun ehr Hunnen to faat, wat för em as Deertenfründ natürlich en grote Katastrooph is. Aver an’n End schapt he sien Opdrag doch noch, as de Olle dood blifft, nadem Ken ehr’n letzten Hund an de Siet brocht hett.

In de Geschicht geiht na un na düchtig veel scheef, wat sik de enkelten Personen so utdacht harrn, wat to jümmers niege Verwickeln un masse Situatschoonskomik föhrt. An Sluss kriggt Wanda för Gericht George an Moors un sorgt mit ehr Utsaag dorför, dat he insparrt blifft, tohopen mit Archie un de Diamanten brennt se an’n End dör un flegt na Brasilien.

Kritik[ännern | Bornkood ännern]

De Tokiekers un ok de Kritikers hebbt den Film mit grote Freud opnahmen, de in de Kinos en groten Spood wesen is. De Kritiken hebbt veel Betog herstellt to de fröheren Produktschonen vun de Monty Python-Grupp. De Film liggt ok goot in de Traditschoon vun jümmer Filmen – nich toletzt ok, wiel mit John Cleese un Michael Palin twee vun de zentralen Lüüd vun Monty Python an den Film bedeeligt weern. De britsche Humor is apenkünnig ok in de USA goot ankamen, wat ok al dör de Utteken wiest warrt.

Utteken[ännern | Bornkood ännern]

De Film is 1989 mit acht Priesen uttekend worrn un weer bito för wietere 15 Priesen vörslahn. Utteken weern:

Anners wat[ännern | Bornkood ännern]

De Rullennaam vun John Cleese, Archie Leach is as Hommage an den 1986 dood blevenen Schauspeler Cary Grant meent wesen. Man Cary Grant weer blots en Pseudonym, sien richtigen Naam weer Alexander Archibald Leach.

De lieken Lüüd hebbt 1997 tohopen an den Film Fierce Creatures arbeidt. Ok wenn de Film en ganz annere Geschicht vertellt, warrt he doch as Wietergahn vun Wanda ansehn. Dor sünd ok en Reeg vun Andüden op A Fisch Called Wanda in versteken.

Websteed[ännern | Bornkood ännern]