Zeven
| Wapen/Flagg | Koort | |
|---|---|---|
 |
|
|
| Basisdaten | ||
| Flach: | 73,9 km² | |
| Inwahners: | 13.110 (31. Dezember 2007) | |
| Inwahnerdicht: | 177,4 Inwahners pro km² | |
| Hööchd: | 24 m över de See | |
| Postleettall: | 27404 | |
| Vörwahl: | 04281 | |
| Geograafsche Laag: | Koordinaten:53° 18′ N, 9° 17′ O53° 18′ N, 9° 17′ O |
|
| Gemeenslötel: | 03 3 57 057 | |
| Öörd in de Gemeen: | 7 | |
| Börgermeester: | Hans-Joachim Jaap (CDU) | |
| Websteed: | www.zeven.de/ | |
Zeven is en Stadt in de Samtgemeen Zeven in’n Landkreis Rodenborg (Wümm) mit ruchweg 13.300 Inwahners. Blangen de Stadt Zeven, woneem ok de Samtgemeenverwalten ehrn Sitt hett, höört to de Verwalten noch söss wietere Oortsdelen.
Inholtsverteken |
[ännern] Geografie
Dat Verwaltensrebeet vun Zeven grenzt in Oosten an de Gemenen Heeßl un Elsdörp an, in’n Süüden an de Gemeen Jeem. In’n Süüdwesten liggt de Samtgemeen Tarms mit de Gemenen Büls un Karktimk, wiel in’n Noordwesten de Samtgemeen Sürsen angrenzt mit de Gemenen Oostereis un Seedörp.
De Stadt Zeven liggt midden in’t Elv-Werser-Dreeeck un ok middenmang de Städer Bremen, Bremerhaven un Hamborg. Rundüm gifft dat veel Loof- un Nadelwoolden, wat de Grund is, worüm sik Zeven ok as De Stadt an’n Woold vörstellt. Dör de Stadt fleet de lütte Stroom Mehde-Au, de ruchweg twee Kilometer in’n Noorden vun de Stadt in de Oost münnt.
[ännern] Geologie
En Översicht över de Geologie un Entstahn vun dat Rebeet vun’n helen Landkreis is in den Artikel Landkreis Rodenborg (Wümm) beschreven un kann dor naleest waarn.
[ännern] Historie
Dat eerste mol is Zeven 986 in en Oorkunn nöömt worrn as „kivinan à Heeslingen“ (Kivinan to Heeßl). Dat weer in de öllste Oorkunn vun’t Klooster Heeßl, dat dichtbi leeg un 1141 na Zeven verleggt worrn is. De Zevener Klooster speel dorna en grote Rull för den Oort. An de Steed mööt aver al lange Tiet Minschen leevt hebben, wat dör mehr as dörtig Bultengräver düütlich warrt.
Wiel de Besetten dör de Sweden na den Dörtigjohrigen Krieg in’t 17. Johrhunnert weer Zeven en Nevenwahnsteed vun de Königsche Christina vun Sweden. Anfang vun’t 18. Johrhunnert is Zeven na Hannover kamen. Zeven is in de Historie bi twee Begeevnissen bedüdent wesen, de dor stattfunnen hebbt. Dat een weer en Konferenz in’n Mai 1694 mit Afsandte vun Bremen un Sweden, wobi över den Stand vun de Stadt un dat Hertogdom Bremen beraden weer. Dat annere weer de Zevener Koventschoon, bi de wiel den Sövenjohrigen Krieg in’n September 1757 en Wapenstillstand twüschen de Föhrers vun de hannoberschen un franzööschen Truppen slaten worrn is. Man, de Wapenstillstand harr an’n Enn keen Bestand, as de britsche König de Acht verseggen de.
Na den Wiener Kongress höör Zeven to’t Königriek Hannober. In’n Opdrag vun hannoberschen König is Carl Friedrich Gauß 1824/25 na Zeven kamen, üm de trigonometrische Landsopnahm vun’t Königriek aftosluten. Vun’n Karktoorn in Zeven ut hett he Meten dörföhrt. Af 1866 höör Zeven den to de preuß’sche Provinz Hannober. De Flecken bleev Sitt vun en Landraatsamt; af 1885 regeer in Zeven en königlich-preuß’sch Landraat.
De Inwahnertall bleev to de Tiet üm un bi hunnert Johr lang fast bi ruchweg 1.200 Lüüd. Sünners vun wegen de ümgahen Cholera un vele Utwannerers na Amerika is de Tall nich wassen. Erst Anfang vun’t 20. Johrhunnert güng dat na baven. 1906 is de Bahnlien vun Zeven na Rodenborg (Wümm) apenmaakt worrn un Zeven kreeg in Form vun Ööllampen en Stratenbelüchten. In’t Johr 1929 kreeg Zeven Verlööfnis, en stäädtsch Verfaten antonehmen, man de Landkreis Zeven weer al korte Tiet later, 1932, oplöst un mit Bremervöör to den ne’en Landkreis Bremervöör tohopenslaten.
Vör den Tweeten Weltkrieg harr Zeven 3.233 Inwahners. Disse Tall weer na’t Enn vun’n Krieg fast dubbelt so groot vun wegen de velen Flüchtlingen, de na Zeven översiedelt sünd. De Stadt weer vun britsche Truppen besett, de sik ok in de Wahnrüüm daallaten hebbt, wat to’n groten Wahnruummangel in de Stadt föhrt hett. In de Johren na’n Krieg stünn dorüm de Utbo vun de Stadt in eerset Steed. In de Johren is Zeven en bedüdsomen regionalen Industriedsteed worrn. De Standoort Zeven-Asp, in’n Süüden vun de Stadt, bargt en Tall vun överregional bekannte Bedrieven. En wieter’t Indrustrierebeet (Noordwestring) is in’n Noorden vun de Stadt ansiedelt worrn.
De Samtgemeen Zeven is 1965 grünnt worrn. In’t Johr 1977 is de Landkreis Bremervöör wedder oplöst un mit Rodenborg tohopenleggt worrn. Siet de Tiet höört Zeven to den Landkreis Rodenborg (Wümm). De Binnenstadt vun de Stadt Zeven is 2001/02 vun Grund op nee anleggt worrn. De Lange Straat, de vördem as Deel vun de B 71 en veel beföhrt Dörgangsstraat weer, is siether as Footgängerzoon ümboot, wiel de Verkehr över en Ümfohrtstraat leit warrt.
[ännern] Politik
[ännern] Oortsdelen
[ännern] Gemeenraat
De Gemeenraat vun Zeven sett sik ut 31 Lüüd tohopen. De letzte Kommunalwahl weer in’n September 2011:
| Partei | 2011 | 2006 | 2001 |
| CDU | 15 | 15 | 14 |
| SPD | 10 | 10 | 10 |
| FDP | 1 | 3 | 2 |
| Bündnis 90/De Grönen | 4 | 2 | 2 |
| WFB | 1 | 1 | 3 |
[ännern] Börgermeester
De Börgermeester warrt vun de CDU stellt. Dat is Hans-Joachim Jaap.
[ännern] Wapen
Dat Wapen hett en pielliek spleten Schild, dat in de rechten Hälft (ut Sicht vun den Schilddräger) dat Wapenteken vunt olle Arzstift Bremen wiest, dat krüüzte Slötelpoor, un in de linken Hälft den Schuulhilligen vun Zeven, den hilligen Veit (Sankt Vitus). Dat krüüzte sülverne Slötelpoor liggt op den root Feld, de Hillige Vitus mit en Hilligenschien steiht in en geel Feld in en Öölketel, driggt rode Kledaasch un hett in de rechten Hand en Palmtwieg un in de linken en Book. Ünner dat Wapenschild höört en Band mit de Inschrift Stadt Zeven.
[ännern] Weertschop un Infrastruktur
Zeven billt en Middelzentrum för de Öörd in de Ümgegend.
[ännern] Verkehr
För den Stratenverkehr is de B 71 an bedüdensten. Se föhrt vun Bremervöör dör Zeven dör na Rodenborg (Wümm). Op’n Weg na Rodenborg föhrt se an de Anslussteed Bockel över de A 1 Hamborg – Bremen. In Zeven lopt ok en Reeg vun Landsstraten tosamen, de in all Himmelsrichten na de neegsten Öörd un ümliggen Gemenen föhrt. Ansluss hett Zeven ok an den Radfeernweg Hamborg-Bremen.
Dör Zeven lopt twee Bahnlienen: De Streck Rodenborg (Wümm) – Zeven – Bremervöör (ehmols de Bahnlien Bremervöör-Walsrood) un de Lien Zeven – Heeßl – Sittens – Töst. Beid warrt blots noch in’n Göderverkehr vun de Iesenbohn- un Verkehrsbedrief Elv-Werser GmbH (EVB) bedreven. De wietere Lien vun Zeven na Wilst schall in tokamen Tiet afboot warrn. In Zeven gifft dat de dree histoorschen Bahnhöff Zeven (Han) an de Bahnlien Rodenborg – Zeven – Bremervöör, as ok Zeven Süüd un Zeven Noord an de Wilst-Zeven-Töster Iesenbahn (WZTE). Zeven Süüd un Zeven (Han) leegt in direkt Naverschap un hebbt ok en Gleisverbinnen.
[ännern] Weertschap
Zeven is in de Region in wichtigen Standoort för Industrie. Mit de Johren hebbt sik enige Bedrieven daallaten, de ddelwies överregional bekannt. To de bekanntesten dorünner tellt de Mapa, de sünners bekannt is för ehr Huushaltshygieen-Produkten as Gummihandschoh un annere Putzmiddel vun de Marke Spontex, Babyartikels vun de Marke NUK un de Kondomen vun de Marken Blausiegel, Fromms un Billy Boy. Wiethen bekannt is aver ok de Zevener Molkeree Nordmilch, de bundswiet mit de Marke Milram mit ehr Produkten op’n Markt is.
Annere bedüdsome Bedrieven sünd de Premium Fleisch AG, de to de Vion-Grupp höört, de Telefonbookverlag nordinformation, de överregional bekannte Warfagentur MouseDesign Medien AG, de Verdriever vun Live- un Bühnenstaffaasch stage-power, de SANOVO Eiprodukte GmbH & Co. as en vun de groten Anbeders vun Eiprodukten un de Lisega AG as Weltmarktföhrer för Rohrleitungshollers.
Op dat Rebeet vun de Medien kummt ut de Stadt Zeven dat öörtlich Daagblatt „Zevener Zeitung“, de to de Nordsee-Zeitung höört.
[ännern] Kultur un Inrichten
Blangen de ümliggen Natur gifft dat ok ni de Stadt Zeven sülst einige Saken, de een sik ankieken kann. Dorto tellt ok een poor Museen un Bowarken, so as:
- dat Museum Klooster Zeven
- dat Königin-Christinen-Huus
- de St.-Viti-Kark
- den Vitus-Brunnen
- dat Füerwehr-Museum
- dat Gauß-Zimmer Zeven
[ännern] Verenen
In de Stadt Zeven, aver ok in de ümliggen Gemenen, gifft dat en grote Utwahl an Sport- un Kulturverenen, in de een sien Freetiet gemeensom mit annere Minschen gestalten kann. Bekannte Sportverenen sünd vör allen de TuS Zeven un de Zevener Tennisclub, annere Verenen sünd de Schüttenvereen, de Rietvereen, de Vereen vun de Bagenschütten un noch enige mehr. Op kulturell Gebeet gifft dat Verenigen as den Posaunenchor, Singverenen, Museums- oder Deertuchtverenen usw.
Siet Oktober 2007 gifft dat in Zeven elk Johr den Groten Pries vun Zeven. Dat is en Loopveranstalten, de blangen en Halfmarathon en 10-km-Loop un siet 2008 ok en 5-km-Jeedeen-Loop ümfaat. Bito gifft dat ok Loopstrecken för Kinner. Afang un Teel sünd elk in de Footgängerzoon vun Zeven.
[ännern] Beropen Lüüd ut Zeven
- Christian Daniel von Finckh, (1766-1813), Wedderstandskämper gegen de napoleoonschen Besetters
- Julius August Christian Uffelmann, (1837-1894), Mediziner un Medizinhistoriker
- Heinz-Günter Bargfrede (* 1942), CDU-Politiker
- Hans-Jürgen Bargfrede (*1959), ehm. Football-Bundsligaspeler bi Werder Bremen, FC St. Pauli un Preußen Münster
- Hans-Heinrich Ehlen (* 1949), CDU-Politiker, neddersass’sch Landweertschapsminister
- Eckart Brandt (* 1950), Pomoloog
- Werner Wölbern (* 1961), Schauspeler
- Doris Fitschen (* 1968), ehm. Football-Natschonalspelersche
- Thomas Lindner (* 1974), Rock-Musiker
- Florence Joy (* 1986), Pop-Singersche
- Philipp Bargfrede (* 1989) Footballspeler bi Werder Bremen
[ännern] Literatur
- Stadt Zeven (Hrsg.): Zeven - Kloster · Flecken · Stadt. Verlag J. F. Zeller, Zeven 1980
- Georg Meyer: Zeven und sein Benedictiner-Nonnenkloster St. Viti. Verlag J. F. Zeller, Zeven 1976
Ahusen | Alfst | Annerlingen | Basdaal | Bootel | Bötersen | Breddörp | Bremervöör | Brookel | Büls | Deins | Eversdörp | Elsdörp | Farm | Fintel | Gnarrenborg | Groot Meckels | Hassendörp | Heemsbünnen | Heeßel | Hellweeg | Helsch | Hemslingen | Hepst | Hipst | Homersen | Horß | Jeem | Kalf | Karktimk | Karkwals | Lauenbrüch | Lengenbossel | Lütt Meckels | Oerel | Oostereis | Reeßen | Rhaar | Rodenborg (Wümm) | Sandbossel | Scheeßl | Seedörp | Sittens | Söttmer | Stemmen | Sürsen | Tarms | Tiss | Vahlde | Vierden | Visselhöövd | Vörwark | Westertimk | Westerwals | Wilst | Woonst | Zeven
