The Untouchables (Film)

Vun Wikipedia
Filmdaten
Plattdüütsch Titel:
Originaltitel: The Untouchables
Düütsch Titel: The Untouchables – Die Unbestechlichen
Produkschoonsland: USA
Johr vun’t Rutkamen: 1987
Läng: 119 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Brian De Palma
Dreihbook: David Mamet
Produkschoon: Art Linson
Raymond Hartwick
Musik: Ennio Morricone
Kamera: Stephen H. Burum
Snitt: Gerald B. Greenberg
Bill Pankow
Szenenbild: William A. Elliott
Hal Gausman
Kledaasch: Marilyn Vance
Dorstellers

The Untouchables (op platt so veel as „De nich Anröögboren“; dt. Titel: The Untouchables – Die Unbestechlichen) is de Titel vun en US-amerikaanschen Kriminalfilm ut dat Johr 1987. De Film, bi den Brian de Palma de Speelbaas weer, hannelt vun de Mafia in Chicago in de 1930er Johren. De Hööftrullen weern mit Kevin Costner, Sean Connery un Andy Garcia besett.

Inholt[ännern | Bornkood ännern]

To de Tiet vun de Prohibitschoon toovt in Chicago en Oort vun Krieg, denn de Staat gegen de Mafie föhrt. In disse Tiet hett de Schattamt-Agent Eliot Ness blots een Teel: Al Capone fastnehmen un em för sien Verbrekens to Verantwortung tehn. Gau tütt he sik vele Feenden to bi sien Arbeit, gegen dat organiseerte Verbreken. Sien eerste Razzia geiht glieks scheef, vunwegen dat de Polizei vun Chicago vun Korrupschoon dörsett is. As em Twivel an den Sinn vun sien Saak kamt, dröpt he den pragmaatschen Polizisten Jim Malone, de op em glieks Indruck schinnt.

Ness will Malone in sien Team holen, to dat in de Twüschentiet ok al de Bookprüfer Oscar Wallace vun’t Schattamt tellt. Eerst lehnt Malone af, man denn nimmt he de Opgaav an un ünnerstütt Ness in sien Doon, as ok he mit de Laag in Chicago nich länger leven will. Nümms künnt se troen, dorüm holt se sik en jungen Polizisten frisch vun de Polizeischooll dorto. Dat is George Stone, de as beste Schütt ut sien Klass gellt. Ok Wallace kriggt en Wapen in de Hand. Jemehr eerste unafhangige Raazia warrt nu to’n Spood.

Jemehrn gröttsten Spood hebbt se mit en Akschoon an de kanaadschen Grenz, as se en vullstännige Ladung Whisky för Capone affangt. Bi de Gelegenheit fallt jem sogor en hoog Liddmaat vun’t Chicago Outfit un en kodeert Kassenbook in de Hannen. Wat jem aver noch fehlt sünd de echten Naams, de achter de Decknaams in dat Book staht.

Üm nich gegen de Gesetten to verstöten, hinnert Ness Malone doran, bi den Insatz Informatschonen ut den Fangenen ruttotageln. Also maakt Malone en dreckigen Trick: he nimmt en doden Gegner un deit so, as wenn he em buten verhören deit un schütt em in’n Kopp, as he keen Antwoort kriggt. De Fangene brickt tosamen un seggt to, as Kroontüüg uttoseggen. Capone kann dorophen anklaagt warrn, dat he den Staat üm de Stüern bescheten hett.

Na en Pressedrapen schall Wallace den Kroontügen in Sekerheit bringen, man beide warrt in’n Lastenfohrstohl vun Capone sien Killer ümbröcht, de sik as Polizist verkleedt hett. Mit dat Blood vun Wallace schrifft de Möörder dat Woort „touchable“ (engelsch: „anröögbor“) an de Wand, üm to wiesen, dat ok se nich seker sünd. Wedder fraagt sik Ness, wat dat allns dat wwert is, tomol ok sien Familie nu bedrauht warrt. Malone aver gifft nich op. He finnt rut, dat de Bookholler vun Capone de Stadt mit’n Tog verlaten schall. As aver ok Malone vun de Mafia doodschaten warrt, swöört he Ness in’t Starven noch mol dorop in, dat he de Saak to Enn bringen mutt. Ness un Stone gaht nu noch mehr verbeten an de Verfolgung ran. In de Vörhall vun’n Bahnhoff kummt dat to en Scheeteree. De Bookholler seggt opletzt vör Gericht gegen Capone ut.

Capone wiest sik aver in go’e Stimmung, as he vör Gericht steiht. Dat kummt dorvun, dat he de twölf Sworenen besteken laten hett. De Naricht, dat dat klappt hett, kriggt Capone wiel de Verhanneln vun sien Macker Frank Nitti. Aver Ness kriggt dat mit un kann em dörsöken laten. Dorbi warrt he dör en Indiz gewohr, dat Nitti de Möörder vun Malone is. He snackt em dorop an. Nitti gaht in den Ogenblick de Nervendör. He schütt den Wachmann daal un neiht ut. Ness verfolgt em un kann em opletzt stellen, wobi Nitti ümkummt.

Ness övertüügt nu den Richter dorvun, dat Capone de Sworenen besteken het, mutt dorbi aver en Trick anwennen. He vertellt, dat ok de Richter sülvst op de Lohnlist vun Capone steiht, de dorophen de Sworenen uttuschen lett. Capone verlütt de Nerven un sien Afkaat plädeert nu op schullig. Capone warrt veroordeelt un mutt ölven JOhr lang in’t Gefängnis. An’t Enn geiht Ness ut Chicago weg un lett Stone mit de Opgaav torüch, wieter gegen dat Verbreken vörtogahn.

Kritik[ännern | Bornkood ännern]

  • Lexikon vun’n internatschonalen Film: Spektakulärer Großstadtwestern, der die tatsächlichen Begebenheiten als eine Folge mythisch überhöhter Kabinettstücke aus der Kinogeschichte darstellt. Opulent ausgestattet und virtuos inszeniert, neigt der Film zum plakativen Schockeffekt, dessen Faszination jedoch nicht hinterfragt wird.[1]

Utteken[ännern | Bornkood ännern]

De Film weer bannig spoodriek. Tosamen weer he 22 mol för grote Filmpriesen vörslahn, dorünner alleen veermol för den Oscar. Uttekent weer de Film opletzt mit ölven Priesen, as:

  • 1987: mit den NBR Award in de Kategorie Best Nevendorsteller för Sean Connery
  • 1988: mit den Oscar in de Kategorie Best Nevendorsteller för Sean Connery
  • 1988: mit den ASCAP Award in de Kategorie Top Box Office Films för Ennio Morricone
  • 1988: mit den BAFTA Film Award in de Kategorie Beste Filmusik för Ennio Morricone
  • 1988: mit den Golden Globe in de Kategorie Best Hööftdorsteller – Drama för Sean Connery
  • 1988: mit den Grammy in de Kategorie Best Album mit Original instrumentale Achtergrundmusik för en Film oder Feernsehn för Ennio Morricone
  • 1988: mit den Blue Ribbon Award in de Kategorie Best frömdsprakig Film för Brian De Palma
  • 1988: mit den KCFCC Award in de Kategorie Best Nevendorsteller för Sean Connery

Anners wat[ännern | Bornkood ännern]

  • De Scheeteree in’n Bahnhoff vun Chicago mit den Kinnerwagen, de de grote Trepp rünnerrullt, is en Hommage an Eisensteins sien Filmklassiker Bronenossez Potjomkin (Броненосец Потёмкин; dt.: Panzerkreuzer Potemkin), in den en Kinnerwagen de Potemkinsche Trepp vun Odessa rünnerrullt.
  • In den Film blifft jeedeen Polizist dood, de bi’t Drinken vun Alkohol wiest warrt un dormit dat Gesett vun de Prohibitschoon breken deit.
  • Al Capone sien Macker Frank Nitti warrt in den Film as en ieskolen Killer dorstellt, ofschoonst he hööchstwohrschienlich sülvst nie en Moord begahn hett. In’n Film kummt Nitti üm, in Wohrheit weer Nitti de Nafolger vun Capone un begüng later Sülvstmoord.
  • Ok Eliot Ness warrt in’n Film verkehrt dorstellt, neemlich as ’n biederen Ehmann un troen Familienvadder. In Wohrheit weer Ness to de Tiet, as de Filkm speelt, woll verheiraat, man Kinner harr he nich.
  • De to’n Deel bannig eleganten Antöög un de Kledaasch vun de Hööftdorstellers weern vun de Moodmaker Georgio Armani.
  • Berader vun den Film weer Al „Wallpaper“ Wolff, de 1986 as eenzige vun de Liddmaten vun de wohren „Untouchables“ noch an’t Leven weer. Bit to disse Tiet harr he sien Liddmaatschop geheem laten – sogor gegenöver sien Familie un Frünnen.

Borns[ännern | Bornkood ännern]

  1. Kritik to’n Film in’t Lexikon vun’n internatschonalen Film; afropen an’n 13. November 2011

Weblenken[ännern | Bornkood ännern]