The Flight of the Phoenix (1965)

Vun Wikipedia
Filmdaten
Plattdüütsch Titel:
Originaltitel: The Flight of the Phoenix
Düütsch Titel: Der Flug des Phoenix
Produkschoonsland: USA
Johr vun’t Rutkamen: 1965
Läng: 142 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Robert Aldrich
Dreihbook: Lukas Heller
Produkschoon: Robert Aldrich
Musik: Frank De Vol
Kamera: Joseph F. Biroc
Snitt: Michael Luciano
Kledaasch: Norma Koch
Dorstellers

The Flight of the Phoenix (op platt so veel as „De Flaag vun’n Phoenix“; dt. Titel: Der Flug des Phoenix) is de Titel vun en Speelfilm ut dat Johr 1965. De Film hannelt vun en afstörten Fleger un speelt in de noordafrikaanschen Sahara. De Film baseert op den Roman mit glieken Naam vun Elleston Trevor.

Inholt[ännern | Bornkood ännern]

En Transportfleger (Fairchild C-82 Packet) vun de Öölfirma ARABCO is ünnerwegens vun de nöördlichen Sahara na Bengasi. An Boord sünd blangen de twee Mann vun de Kru twölf Passageren. De Fleger is nich mehr de jüngste, un so fallt dat Radio ut, so dat de Pilot Frank Towns ahn den aktuellen Wederbericht ünnerwegens is un so midden in en Sandstorm rinstüert. Dör den Sand verstoppt de Vergasers vun de beiden Motors, so dat Cpt. Towns keen Wahl blifft, as de Maschien wiet af vun all Flaagrouten rünnertobringen.

Bi den Afstört ritt sik de Ladung los un sleiht twee vun de Passageren doot. En drüdden warrt swoor an’t Been drapen. De, de överleevt hebbt, versöökt mit de Situatschoon ümtogahn un hapt, dat jem bald en helpen kummt. Man de gaue Help blifft ut. Ünner de Lüüd is de düütsche Flegerkonstrukteur Heinrich Dorfmann, de sik torüchtütt, üm Bereken antostellen. He maakt den Vörslag, ut de Deelen vun dat Flegerwrack en ne’en Fleger to boen. Dormit finnt he bi Cpt. Towns aver keen Tospröök, de sik mit Hannen un Föten dorgegen wehrt.

As dat Water to Neeg geiht, beslutt de mitreiste Soldat Cpt. Harris, sik mit sien ünnergeven Soldat Sgt. Watson to Foot op’n Weg to maken. Watson is vun den Infall gor nicht andoon un deit so as harr ne en Sehren. So löpt Cpt. Harris alleen los tohopen mit Carlos, de ok ünner de Passageren weer. Cobb, de ok mitgahn wull, vun Cpt. Harris aver torüchlaten worrn is, as he psychisch keen goten Indruck maken de, löpt jem achteran, ahn dat dat een markt. As dat rutkummt maakt sik ok Towns op’n Weg, üm Cobb to finnen. Man he finnt em blots noch dood vör.

As Towns wedder torüch is, maakt sien Kolleeg Lew em kloor, dat jemehr Laag jümmer slechter warrt, un betüdelt em, dat he doch noch mol över den Plaan vun Dorfmann nadenkt. Nu geiht dat los, dat de Lüüd en ne’en Fleger tosamenschostert, dat op den Naam Phoenix dööpt warrt. In de Twüschentiet bringt sik de swoor besehrte Gabriel sülvst üm. De Bo geiht wieter, man dat köst gresig Möh, mit schiere Knööv ahn veel Warktüüch de sworen Bodeelen uteneen to klamüstern. Ünnerbroken warrt de Bo jümmer wedder vun Striet un Arger üm de Kumpetenz twüschen Towns un Dorfmann, den de Pilot jümmer noch för en Spinner hollt.

En Avend kummt Cpt. Harris mit letzte Knööv wedder torüch na’t Wrack. Watson sütt em, lett em aver in de Dünen liggen. Dorfmann finnt em opletzt. As en Koppel vun Arabers in de Neeg jemehr Lager opslaht, ahn de Verunglückten to sehn, gifft dat bannigen Striet twüschen Harris un Watson, as de verseggt, mit Harris tosamen to’n Vermiddeln mit de Arabers to snacken. Opletzt geiht Dr. Renaud mit Harris mit. An’n nächsten Morgen sünd de Arabers wietertogen, man Renaud un Harris leegt mit dörsneden Görgel in’n Sand. Jem blifft nix över, as sik wieter op den Bo vun’n Fleger to besinnen.

As Towns und Lew sik längere Tiet mit Dorfmann ünnerholen doot, warrt se wies, dat de bi en Firma anstellt weer, dat Modellfleger boet hett. De beiden sünd teemlich daalslahn. Dorfmann versöcht jem to verkloren, dat dat Prinzip datsülve is un dat en Modellfleger keen Ünnerscheed maakt to en richtigen Transportfleger, de sik blots in jemehr Dimensionen ünnerscheedt. Üm keen Panik uttolösen seggt de beiden dorvun nix na. Mit letzte Kraft warrt de Phoenix to Enn boet.

Kort vör’t Enn kummt de woll bekannteste Szeen ut den Film, as Towns versöcht, den Motor mit den Coffman-Starter antosmieten, man he hett dorför blots söven Patronen. Na mehrere Fehlversöken, springt de Maschien opletzt mit de vörletzten Patroon an. De letzten söven Mann maakt sik mit den Fleger op un kamt opletzt in en Oaas an, woneem se in Sekerheit sünd.

Kritik[ännern | Bornkood ännern]

Lexikon vun’n internatschonalen Film: Aldrichs Männerfilm, realistisch im Milieu und weithin auch im Psychologischen, bietet ein Stück abenteuerlicher, spannender Kinounterhaltung.[1]

Evangeelsch Film-Beobachter, Kritik Nr. 126/1966: Der Film entbehrt jeder Wahrscheinlichkeit, Regie und Spiel können aber nicht allzu anspruchsvolle Liebhaber des psychologischen Reißers einigermaßen zufriedenstellen.

Produkschoonsachtergrund[ännern | Bornkood ännern]

Dat Dreihbook is anlehnt an den Roman The Flight of the Phoenix vun Elleston Trevor ut dat Johr 1964. In dat Book is de Person, op de allens tolöpt, de düütsche Ingenieur Dorfmann, en Englänner. De düütsche Part warrt in’n Roman vun en kranken jungen Mann innahmen.

De eersten beiden Oppers, de bi’t Unglück doodblievt (Bill un Tasso), hett de Speelbaas un Produzent vun’n Film, Robert Aldrich, mit sien Swiegersöhn Peter Bravos un sien Söhn William Aldrich besett.

Dreiht worrn is de Film in de Neeg vun Yuma an de Grenz vun de USA na Mexiko. An de glieken Steed sünd later noch annere Filmen dreiht worrn, as to’n Bispeel The Return of the Jedi oder Stargate. De Stuntpilot Paul Mantz is wiel de Dreiharbeiten ümkamen, as de Phoenix afstört is. He weer mit dat Fohrwark gegen en harden Sandbuckel stüert – mööglicherwies en ollen Bo vun en Präriehund – wobi de klapperige Apparat foorts tweibraken is. Mantz is vun den Motor to Dood drückt worrn. In’n Afspann warrt dorop henwiest.

En Remake vun den Stoff is 2004 maakt worrn. Bi den ne’en Film Flight of the Phoenix speel Dennis Quaid de Rull vun den Pilot Frank Towns.

Utteken[ännern | Bornkood ännern]

De Film hett keen Filmpriesen wunnen, man he weer för söss Priesen nomineert. Dorünner weern twee Nomineeren för den Oscar, neemlich in de Kategorien Best Nevendorsteller (för Ian Bannen) un Best Snitt (för Michael Luciano ).

Literatur[ännern | Bornkood ännern]

Borns[ännern | Bornkood ännern]

  1. http://www.filmevona-z.de/filmsuche.cfm?wert=25085&sucheNach=titel

Weblenken[ännern | Bornkood ännern]