Stargate (Film)

Vun Wikipedia
Wesseln na: Navigatschoon, Söök
Filmdaten
Plattdüütsch Titel:
Originaltitel: Stargate
Düütsch Titel: Stargate
Produkschoonsland: USA
Johr vun’t Rutkamen: 1994
Läng: 121 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Roland Emmerich
Dreihbook: Dean Devlin,
Roland Emmerich
Produkschoon: Metro-Goldwyn-Mayer
Musik: David Arnold
Kamera: Karl Walter Lindenlaub
Snitt: Derek Brechin,
Michael J. Duthie
Dorstellers

Stargate (op Platt so veel as „Steerndoor“) is de Titel vun en US-amerikaanschen Science-Fiction- un Actionfilm ut dat Johr 1994 vun den düütschen Speelbaas Roland Emmerich mit Kurt Russell un James Spader in de Hööftrullen.

In de Geschicht reist en Grupp vun Soldaten un en Archäoloog mit Help vun en antik Door, dat in Ägypten funnen worrn is, dör en Wormlook na en Planet wiet weg. Dor helpt se en Volk in Slaveree, sik vun den verkehrten Gott freetomaken.

De Geschicht in’n Kinofilm warrt in de Feernsehregen Stargate SG-1 un Stargate: Atlantis wieterspunnen. Bito gifft dat ok noch’n Tekentrickreeg ünner den Naam Stargate Infinity.

Inholt[ännern | Bornkood ännern]

De Ägyptoloog Dr. Daniel Jackson warrt vun de Fackwelt för sien Theorie, dat de ägyptischen Pyramiden veel öller sünd, as dat annahmen worrn is, un mööglicherwies vun Butenirdische boot worrn sünd, utlacht. Ahn Arbeitsverdrag sitt he al op de Straat, as dat US-Militär Kuntakt to em opnimmt un üm Help anfraagt. He warr in en Geheemanlaag bröcht, woneem en Artefakt opbewohrt warrt, dat al 1928 in Ägypten funnen worrn is. Dr. Jackson schall de ollen Schriftteken op de Afdeckplatt lesen helpen. As sik dorbi rutstellt, hannelt sik dat bi dat Artefakt üm en so nöömt Stargate, en Portal, wat apenkunnig vun Butenirdische boot worrn is un Reisen to en annert Steerndoor in en annere Galaxie wiet weg mööglich maken deit ahn Tiet dorbi to verleren.

Jackson kann Schriftteken översetten, de bit dorhen as nich to översetten gelln deen un stellt fast, dat sik dat dorbi üm Steernkonstellatschonen hannelt, de dat Teel för dat Steerndoor dorstellt. Mit Help vun disse Adress künnt de Lüüd dat Portal in Gang setten un en Verbinnen herstellen to sien Gegenstück op en Wööstplanet in en annere Galaxie.

Jackson beedt sik an, mit en Militärgrupp dör dat Door to gahn. Anföhrt warrt de Trupp vun Colonel Jack O’Neil, de siet den Unfalldood vun sien Söhn traumatiseert is. As de Trupp ankummt, finnt se na korte Tiet Inheimsche un kriegt rut, dat dit Volk vun den ägyptischen Sünngott Ra ünnerdürckt un in Slaveree hollen warrt. As Daniels rutfinnt, weer dat Ra – en Butenirdischen – de in de Vörtiet dat Weten to’n Bo vun de Pyramiden na de primitiven Ägypters to bringen. He hett jem de Astronomie lehrt un sik denn to’n Goot över jem maakt. Dat Steerndoor hett he bruukt, üm sien Minen mit Slaven vun de Eer to versorgen, bit för ruchweg 2.000 v. Chr. De Minschen op de Eerd gegen em rebelleert hebbt. Se hebbt jemehrn Oppasser doodmaakt un dat Steerndoor in de Wööst vergraavt. Ra is nich wedder torüch op de Eer kamen.

De Besökers vun de Eer warrt vun de Inheimschen opnahmen un frünnt sik gau mit enige jem an. Man, as se na dat Steerndoor torüch gaht, kummt dat to’n een eerst Openannerdrapen mit Ra, wobi de Trupp fangen sett warrt. Jemehr ne’en Frünnen helpt jem uttoneihn, un de Soldaten gaht doran en Revolutschoon antozeteln, dat se den verkehrten Gott störten doot. Wiel Ra mit sien Ruumschipp in de Ümloopbahn to flüchten versöcht, künnt Jackson un O’Neil en Atombomb op sien Schipp teleporteeren un dat Schipp mitsamt Ra tonichten maken.

An’n Enn vun’n Film blifft Dr. Jackson, de sik in de Twüschentiet in Sha’uri, en Deern vun de Inheimschen verkeken hett, op den frömden Planeten un kummt nich wedder mit torüch op de Eer.

Achtergrund[ännern | Bornkood ännern]

De Idee to dissen Film hett Roland Emmerich al mit 23 Johren utklamüstert, as he noch Student weer. De Produkschoonskosten legen bi ruchweg 55 Millionen US-Dollar, wobi dat meiste för de Trickeffekten un de Massenszenen mit deelwies bit to 20.000 Statisten opwännt worrn is. Man, de Film weer düchtig spoodriek un hett weltwiet mehr as 200 Millionen US-Dollar inspeelt. De Feernsehregen weern ok utermatig spoodriek.

Stargate weer butendem de eerste Kinofilm, de en egene Websteed harr. In Opdrag geven woorrn is de vun den Dreihbookschriever un Produzenten Dean Devlin.[1]

Ünnerscheden to de Feernsehreeh[ännern | Bornkood ännern]

In de Feernsehregen gifft dat eenige Ünnerscheden to den Originalfilm, wat den Inholt un de Figuren angeiht. Anners as in’n Film kamt in de Regen ok noch annere Gödder ut de Antike as parasitär leven Butenirdische vör, de de Minschen as Weerten bruukt. Dat sünd nich blots ägyptische Gödder, man ok asiaatsche, afrikaansche un welke ut de neegööstlichen Mythologie. Dorgegen staht in de Reeg de Asgard, de as noordsche Gottheiten un as schulen Oppasser över de Minschen opdukt.

En annern Ünnerscheed is, dat in de Butenirdischen in den Film keen Naam harrn, de in de Reeg Goa’uld nöömt warrt un nu en slangenoordigen Lief kregen hebbt. Gemeensom is blots noch, dat na’t Övernehmen vun den Weertslief jemehr egen Will ünnerdrückt warrt un de Weert den Lief bruukt, üm sülvst leven to künnen.

För Ras Planet warrt in’n Film keen Naam angeven. De Naam Abydos warrt eerst in de Feernsehreeg inföhrt un sien Positschoon ut de Kaliangalaxie in uns Melkstraat verleggt. In de düütschen Synchronisatschoon vun’n Film warrt dat Stargate blots eenmol bi’t Översetten mit dissen Begreep betekent. Dorna warrt in’n Film blots noch vun’t Steerndoor snackt. In de Reeg warrt dat blots Stargate nöömt.

Wietere Ünnerscheden bestaht to’n Bispeel in de Schrievwies vun O’Neil, de in de Reeg mit twee ‚l‘ schreven warrt, in’n Film dorgegen blots mit een. Dat Stargate Center is in’n Film ünner Creek Mountain, in de Reeg dorgegen ünner Cheyenne Mountain, un de Figur vun General West warrt in de Feernsehreeg dör General Hammond uttuuscht.

Kritiken[ännern | Bornkood ännern]

Lexikon vun’n Internatschonalen Film: Ein mit großem technischem Aufwand und staunenswerten Spezialeffekten inszeniertes Science-Fiction-Abenteuer, dessen dünne Geschichte das Interesse aber bald erlahmen läßt.

Filmpriesen[ännern | Bornkood ännern]

Stargate is för tosamen teihn Filmpriesen vörslahn wesen. Wunnen hett he dorvun söss:

Borns[ännern | Bornkood ännern]

  1. Bonus-Material op de DVD ut de Editschoon TV Movie

Weblenken[ännern | Bornkood ännern]

Commons-logo.svg Stargate. Mehr Biller, Videos oder Audiodateien to’t Thema gifft dat bi Wikimedia Commons.