Jürgen Schmude

Jürgen Dieter Paul Schmude (* 9. Juni 1936 in Önsterborg, Ostpreußen) is en düütsch Politiker (SPD).

He weer van 1978 bit 1981 Bundsminister för Billen un Wetenschap, van 1981 bi 1982 Bundesjustizminister un 1982 Binnenminister.

Utbillen un Berop

Nah dat Abitur 1955 an dat Gymnasium Adolfinum Moers, hett Schmude en Studium vun de Rechtswetenschap, de Theaterwetenschap un de Ne’ere Germanistik in Chöttingen, Berlin, Bonn un Köln makt, dat he 1961 mit dat eerst Staatsexamen afsluuten dee. 1966 folg dat tweet juristisch Staatsexamen. Siet 1967 weer he as Afkaat in de Sozietät vun Gustav Heinemann tätig. 1968 kreeg he den Doktertitel mit de Arbeit Der Unternehmensbegriff im Gesetz gegen Wettbewerbsbeschränkungen.

Familie

Jürgen Schmude is verheiraadt un hett twee Kinner.

Partei

Schmude hett tonächst en Liddmaatschap in de Gesamtdüütsche Volkspartei (GVP) plaant, is denn aber, as sück de GVP uplööst harr, 1957 in de SPD intreden.

Afordneter

Van 1964 bit 1971 weer he Liddmaat vun den Raat vun de Stadt Moers un af 1969 ok Kreisdagsafordneter.

Van 1969 bit 1994 weer he Liddmaat vun den Düütschen Bundsdag. He wurr immer direkt wählt. Hier weer he van 1977 bit 1978 Vörsitter vun den Arbeitskrink för Buten un Sekerheitspolitik vun de SPD-Bundsdagsfraktschoon. Van 1984 bit 1985 weer he Stellvertreden Vörsitter vun de SPD-Bundsdagsfraktschoon.

Ämter

Apenlich Ämter

Van 1974 bit 1976 weer he in dat Kabinett vun Bundskanzler Helmut Schmidt Parlamentarisch Staatssekretär bi den Binnenminister.

An' 16. Februar 1978 wurr he denn to'n Bundsminister för Billen un Wetenschap beroopen. Dat Amt hull he ok noch nah de Bundsdagswahl 1980. As aber in' Januar 1981 Hans-Jochen Vogel as Regeerend Börgermeester nah Berlin gung, wurr Schmude an' 28. Januar 1981 de sien Nahfolger in dat Amt vun den Bundsjustizminister.

Nah den Bröök vun de sozialliberale Koalitschoon un den Rückträe vun de FDP-Ministers övernehm he af den 17. September 1982 noch för twee Week dat Amt vun den Binnenminister un is denn nah dat för Helmut Kohl spoodriek Misstrooensvotum an’ 1. Oktober 1982 ut de Bundsregeeren utscheeden .

Siet 2005 is he Liddmaat vun den Natschonalen Ethikraat (hüüd: Deutscher Ethikrat).

Karkenämter

Van 1985 bit 2003 harr Schmude dat Amt vun den Präses vun de Synode vun de Evangeelsch Kark in Düütschland (EKD).

Utteknungen

2008: Karl-Barth-Pries, vun de Union Evangelischer Kirchen^[1]
2009: Ehrendokterwürde vun de evangeelsch-Theologisch Fakultät vun de Rheinische Friedrich-Wilhelms-Universität Bonn

Weblenken

Enkeld Nahwiesen

↑ http://www.uek-online.de/pressemitteilungen/pm213_2008_schmude.html, Ehemaliger Bundesminister erhält den Karl-Barth-Preis 2008, Christof Vetter (Pressestäe vun de UEK), Union Evangelischer Kirchen (UEK) van 5. September 2008, afropen an’ 6. März 2010

[1] ttp://www.uek-online.de/pressemitteilungen/pm213_2008_schmude.html, Ehemaliger Bundesminister erhält den Karl-Barth-Preis 2008, Christof Vetter (Pressestäe vun de UEK), Union Evangelischer Kirchen (UEK) van 5. September 2008, afropen an’ 6. März 2010

[1]