Manfred Kanther

Vun Wikipedia

Manfred Kanther (* 26. Mai 1939 in Schweidnitz, Schlesien) is en ehmalger düütsch Politiker (CDU). He weer van 1993 bit 1998 Binnenminister vun de Bundsrepubliek Düütschland.

Leven un Berop[ännern | Bornkood ännern]

Nahdem sien Familie un he ut Schlesien verdreeven wurrn weern, hebbt se in Döringen wahnt. 1957 hett he sien Abitur maakt, is denn aber ut de DDR flücht, wiel he dor kien Hoochschoolstudium maken drüff. 1958 is he mit sien Rechtswetenschaps-Studium anfangen, eerst in Marburg un dornah in Bonn. 1962 hett he dat Eerste Staatsexamen maakt. Nah dat Referendariat in Lünsche folg 1966 da tweete juristisch Staatsexamen. Wiels sien Studium weer he aktiv bi dat Corps Guestphalia et Suevoborussia Marburg, dat he hüüd noch as Old Herr anhörrn seiht. Van 1967 bit 1970 weer he denn Stadtoberrechtsrat vun Plettenberg. Kanther arbeit siet sien Utscheeden ut de Politik as Afkaat in Wiesbaden-Biebrich un leevt in Wiesbaden-Heßloch.

Manfred Kanther is siet mehr as 50 Johr mit sien Fru Barbara verheiraadt un hett söss Kinner.

Partei[ännern | Bornkood ännern]

Siet 1958 is he Liddmaat vun de CDU. Van 1970 bit 1980 weer he Landsgeschäftsführer un van 1980 bit 1987 Generalsekretär vun de CDU Hessen, van 1991 bit Januar 1998 denn Landsvörsitter vun de hessisch CDU. Van 1992 bit November 1998 hörr he buterdem to dat Präsidium vun de CDU Düütschland.

Afordneter[ännern | Bornkood ännern]

Van 1974 bit to'n 12. Juli 1993 weer Kanther Liddmaat vun den Landdag vun Hessen. Hier weer he bit 1987 Parlamentarsch Geschäftsführer vun de CDU-Landdagsfraktschoon. Van 1991 bit 1993 (bit he Bundsminister wurr) weer he deren Vörsitter.

Van 1994 bit to'n 25. Januar 2000 weer Kanther Liddmaat vun den Düütschen Bundsdag.

Kandidatur to'n Ministerpräsidenten vun Hessen[ännern | Bornkood ännern]

In' Wahlkamp för de Landdagswahl in Hessen 1995 hett de CDU up Kanther un klor un prägnant Utseggen sett, harr he sück doh as Bundsminister den Roop vun en konsequenten Konservativen erwurben. Swoorpunktthemen vun den Wahlkamp weern dorum (neben de Schoolpolitik) de „hart“ Themen Kriminalität un Wertschap. De CDU wurr woll starkste Fraktschoon, aber SPD un Grönen kreegen tosommen mehr Stimmen und de CDU bleev in de Oppositschoon. Nee Fraktschonsvörsitter un Oppositschoonsführer wurr Roland Koch.

Apenlich Ämter[ännern | Bornkood ännern]

Van' 5. April 1987 bit to'n 4. April 1991 weer he Hessisch Staatsminister för Finanzen in de vun Ministerpräsident Walter Wallmann führt Landsregeeren. An' 7. Juli 1993 wurr he denn Bundsbinnenminister in de vun Bundskanzler Helmut Kohl führt Bundsregeeren. In sien Tiet as Bundsbinnenminister weer Kanther immer as „Law and Order“-Minister bekannt.

Nah de Bundsdagswahl 1998 is he an' 26. Oktober 1998 ut de Bundsregeeren utscheeden.

Verwicklung in de CDU-Spendenaffäär[ännern | Bornkood ännern]

2000 wurr Kanther in' Tosommenhang mit den Spendenaffäär vun de hessisch CDU beschuldigt, gegen dat Parteispendengesetz verstött to hemm, indem he 1983 als Generalsekretär vun de hessisch CDU Swaartgeld vun 20,8 Millionen DM (10,6 Millionen Euro) stillkens eerst in de Swiez un denn nah Liechtensteenschafft harr.

Kanther hett dorum an' 25. Januar 2000 sien Bundsdagsmandat daalleggt. Sien Nahfolger wurr Helmut Heiderich.

Intüschen is sien Mitverantwortung juristisch bestätigt wurrn. Schuld hett sück Kanther aber ok in den Prozess (2004) nich föhlt; he harr sück nah sien Ansicht ja nich persönlich dat Geld ünnern Nagel reeten, sondern he wull blots sien Partei ünnerstütten.

An' 18. April 2005 wurr Manfred Kanther eerstinstanzlich vun dat Landgericht Wiesbaden to en Freeheitsstraaf vun 18 Maand up Bewährung veroordeelt, wiel sück Kanther de Untreue gemäß § 266 vun dat Straafgesetzbook schuldig maakt harr. De Bundsgerichtshoff hett dat Oordeel vun dat Landgericht Wiesbaden mit Oordeel van’ 18. Oktober 2006 deelwies uphaben un hett dat Verfahren weer an dat Landgericht Wiesbaden torüchwiest. De Bundsgerichtshoff hett seggt, dat dat Landgericht Wiesbaden to Recht annommen hett, dat dat Verschuven vun dat Geld tegenöver de CDU Hessen en Untreue to’n Nahdeel vun den Landsverband Hessen dorstellt, de eerst mit de Rückführung vun dat Geld in dat Johr 2000 afslooten ween weer. Allerdings weer en Veroordellen wegen Mitwarken an falsch Rekenschaftsberichten vun de hessisch CDU rechtlich nich to hollen. Kanther kunn man in dissen Punkt kien vorsätzlich Schädigung vun dat Vermögen vun sien Partei vörsmietne, wiel he woll dat Risiko vun Rückforderungen sehn hett, dessen Realiseeren he aber verhinnern wull. Dissen Sachverhalt kunn aber en Bedreegen (§ 263 StGB) to’n Nahdeel vun de Bundsrepublik Düütschland dorstellen. In der Vörinstanz wurr dat ut straafprozessualen Grünnen nich prüüft.

An’ 25. September 2007 wurr dat Verfohren vör dat Landgericht Wiesbaden weer nee anfungen un Kanther an’ 27. September 2007 wegen Untreue to en Geldstraaf vun 300 Daagsatzen à 180 Euro (tosommen also 54.000 Euro) veroordeelt.[1] Manfred Kanther is somit vörbestraaft.

Ehrungen[ännern | Bornkood ännern]

  • 1996: Groot Verdeenstkrüüz vun de Bundsrepublik Düütschland

Enkeld Nahwiesen[ännern | Bornkood ännern]

  1. stern.de van’ 27. September 2007 (Togreep an’ 14. September 2012)

Weblenken[ännern | Bornkood ännern]