Bob Marley
Vun Wikipedia
Robert Nesta Marley [[bɒb ˈmɑː(ɹ)li]] (* 6. Februar 1945 in Nine Miles, Jamaika; † 11. Mai 1981 in Miami, Florida), bekannt as Bob Marley, weer en Singer, Gitarrenspeler un Songschriever ut Jamaika. He hett de Musik vun den Reggae mit up de Welt bröcht un utfunnen. Internatschonal bekannt maakt hett he düsse Musik vun de Midden vun de 1970er Johren af an mit siene Band The Wailers.
Beröhmte Songs vun Marley sünd I Shot The Sheriff, Buffalo Soldier, Stir It Up, No Woman No Cry oder Get Up, Stand Up. Över siene Musik hett he ok de Kunne vun de Rastafari-Bewegung up de ganze Welt utbreedt. För all, de dor tohöörn doot, man ok för Frünnen vun düsse Bewegung un för unbannig veel Swatte in de Drüdde Welt is he bit up düssen Dag en wichtige Figur.
