No Woman No Cry

Vun Wikipedia
Wesseln na: Navigatschoon, Söök

No Woman No Cry is de Titel vun den Reggae-Musiker Bob Marley, de an'n meisten bekannt wurrn is. Beröhmt wurrn is he vunwegen en Seven-Minuten-Mitsnitt vun en Kunzert, de up dat „Live!“-Album in dat Johr 1975 rutbröcht wurrn is. Al ehr is No Woman No Cry up „Natty Dread“ (1974) rutkamen.

Wat de Text bedüden deit[ännern | Bornkood ännern]

De Titel „No Woman No Cry“ is Jamaika-Kreoolsch. Vundeswegen kann dat vörkamen, dat een den Text ganz verkehrt versteiht, sunnerlich, wenn he „No Woman, No Cry“ schreven warrt. Dat dö in Engelsch soveel bedüden, as "Sunner Froenslüde geiht us dat beter". Man in de Pidgin-Spraak vun Jamaika heet dat an un for sik „No, Woman, Nuh Cry“, wat up Standardengelsch „No, woman, don't cry“ („Nu ween doch nich, Fro“) bedüden deit. Dor hannelt sik dat um en Leed bi, wo en Fro mit trööst weern schall.

No Woman NO Cry is nu en Leed, wat vun Marley siene Leevde to siene Fro Rita singen deit. To de dore Tied konn se al nich mehr weten, of Marley ehr noch richtig leev hebben dö. He hett dor ja al wat mit annere Froenslüde ut Europa harrt. Mit düt Leed woll he klaar maken, se scholl man nich twiefeln, dat he ehr noch leev hebben dö. Bavenhen vertellt dat Leed ok, wie dat in de Ghettos vun Jamaika togüng. Dor weer Marley groot wurrn un nu singt he vun siene Hopnung, dat allens beter weern schall („everything is gonna be alright").

Kompositschoon[ännern | Bornkood ännern]

As bi annere Kompositschonen, is annahmen wurrn, dat Text un Musik vun Vincent Ford (Tata; 1940–2008) herstammen doot. Ford hett in Kingston sien Ghetto Trenchtown en Zoppenköken unnerholen. Mit de Tantiemen, de he för siene Leder kriegen dö, konn he de an'n Leven holen. Man amenne hett Marley dat Leed woll doch sülms schreven.

Up dat Album liggt de Taktslag düütlich höger, as in de famose Live-Verschoon. Bi düsse Live-Verschoon is ok de Toonaart en annere (Cis-Dur), as up dat Album un bi de meisten annern Live-Mitsneed (C-Dur). Bit 2005 is alleen man de Originalverschoon vun Marley up 24 verscheden Langspeelplatten un Samplers rutkamen. Dat Leed hett unbannig dor an mitwarkt, dat de Reggae in Europa so goot ankamen is.

Cover-Verschonen gifft dat vun Charlie Hunter, Rancid, Joan Baez, Jimmy Cliff, Xavier Rudd, Jimmy Buffett, Boney M., ZSK, Hugh Masekela, Patrice, Wizo, NOFX, J.B.O., Sean Kingston un noch veel mehr.

Weblenken[ännern | Bornkood ännern]