Rastafari

Vun Wikipedia
Wesseln na: Navigatschoon, Söök
Haile Selassie

Rastafari (plattdüütsche un düütsche Utspraak: [[ˌʁastaˈfaːʁi]], in Jamaika meist [ˌɹastafaˈɹaɪ], faken afkört to Rasta ) is en Twieg mank de Religionen up de Welt, de in de 1930er Johre mank de swarten Inwahners vun Jamaika upkamen is. Hüdigendags gifft dat Rastafari-Anhängers up de ganze Welt. Grundlaag vun den Gloven is dat Christendom. Faken betreckt he sik sunnerlich up dat Ole Testament. Rastafari lehrt, dat de vörmolige Negus Negeste (Kaiser) vun Äthiopien, Haile Selassie, de Messias is.

In Tosamenhang mit de Grünnen vun de Rastafari-Religion steiht Marcus Garvey, de Grünner vun de Back-to-Africa-Bewegung. Garvey harr in de 1920er Johre vorut seggt, in Afrika scholl en mächtigen swatten König kröönt weern. As denn Haile Selassie (de Naam bedutt „De Dreeenigkeit ehre Macht“) an'n 2. November 1930 na en Putsch to'n Kaiser vun Äthiopien kröönt wurrn weer, hefft de Lüde meent, Garvey sien Profetenwoort, dat weer nu wohr wurrn.

Mank de Rastafaris gifft dat verschedene Twiege. En Reeg vun jem hefft sik tohopensloten to so nömmte „Houses“, as Nyahbinghi, Bobo Ashanti oder de Twolf Stämm (Twelve Tribes of Israel, 1968 grünnt vun Vernon Carrington). Hüdigendags hoolt sik bi 24.000 vun de bi 3 Millionen Inwahners vun Jamaika to den Rastafari-Gloven.[1] En vun de ganz bekannten Anhängers vun düssen Gloven is de Reggae-Musiker Bob Marley ween.

Wo dat Woort vun herkummt[ännern | Bornkood ännern]

Flagg vun Äthiopien to Haile Selassie siene Tied

Dat Woort Rastafari kummt vun den Naam her, den de Kaiser vun Äthiopien, Haile Selassie, dragen hett, as he noch nich Kaiser ween is. Dat weer sien Geboortsnaam Ras Tafari Makonnen (Kiek bi Ras).

Wo dat um geiht[ännern | Bornkood ännern]

Wichtigsten Born for de Rastafari-Lüde sund verscheden Afsnitte ut de christliche Bibel, sunnerlich ut Johannes siene Openbarung in dat Nee Testament. Dat gifft ok Rastas, de hoolt allerhand vun de besunnern Böker ut de Äthioopsche Bibel, as dat Book Henoch un dat Jubiläumsbook un noch annere. Ok dat Kebra Negest speelt en Rull. Wenn een den Rastafari-Gloven verstahn will, mutt een sik ok mit en poor Texte vun de eersten Rastas befaten, as t.B. mit The Promised Key vun Leonard P. Howell. De Rastafari sund Minschen, de up Gott sien Heel luren doot. Dor sund se an to kennen: Se seht Haile Selassie as den Messias an, de al wedder up de Eer hendal kamen is un meent, he weer de levennige Gott up'e Eer. Se hoolt rein gor nix vun den Westen siene Kultur un Politik un al de Grundlagen, de dor gellen doot, seht se as Babylon oder as Babylon-System an. Bovenhen stellt se sik up de Achterbeene, dat de Swatten de lieken Rechte kriegt, as de Witten. En annern Grundsatz is, dat se sik dor achter klemmt, na de Heimat Afrika torüch to kehren. Vun dor ut weern ehre Vorwesers ja wegsleept wurrn. Midderwielen is avers de Reis torüch na Afrika umdutt' wurrn in en „spirituelle Reis“. Dor geiht dat denn dor um, en Brugge to boen over den groten Afstand to de Kultur vun ehre Vorvaders un sik mit de Afkumst ut Afrika to befaten un dor ok Frund mit to weern. Liekers is avers en Reeg vun Rastafaris na Afrika fohrt un hett dor egen Gemeenden grünnt un sik dor ansiedelt, so, as in Shashemene in Äthiopien. De wecken Rastafaris wüllt ok mit Haile Selassie sien Gottheit nix mehr to kriegen hebben un sund biträen to de Äthioopsch-Orthodoxe Tewahedo-Kark.

Man bi de meisten Rastas gellt Haile Selassie as Messias, de na Gott sien Woort wedder up'e Eer kamen is. Vunwegen dat Rastas, just so as de meisten Christenlüde overtüügt sund, dat Gott en dreeeinigen Gott is, meent se, Haile Selassie weer Gott vun Aart, as Jesus. Se glöövt, Gott weer dreemol in en minschliche Gestalt up'e Eer kamen: To'n eersten Mol as König Melkisedek, to'n tweeten Mol, as Jesus Christus un to'n drudden un lesten Mol as Haile Selassie I., de de Seven Segels open maakt un dor Harmaggedon mit in Gang bringt. Bi de Rastas warrt Harmaggedon ok Armagideon nömmt.

Teken[ännern | Bornkood ännern]

De Farven vun de Rastafari-Gemeende is Rood, Gold (oder Geel) un Gröön. Dat sund de Farven vun de Flagg vun Äthiopien, man just anners rum. For de Rastas bedüüdt düsse Farven wat: Root steiht for dat Vergeten vun de Slaven ehr Bloot un for den veelen Moord an de wegsleepten Slaven, Gold bedutt den Riekdom, de vun de Slaven (Sufferahs, „Lüde, de lieden mütt“) stahlen wurrn is un GRöön is de Farv vun Äthiopien oder allgemeen Afrika, wat dor up luren deit, dat de wegsleepten Lüde torüch kehren schöllt. Tosätzlich weert de Farven vun de 2. Hälft vun dat 20. Johrhunnert af an as Panafrikaansche Farven bruukt.

Belege[ännern | Bornkood ännern]

  1. [http://www.diplo.de/Jamaika Länderinformationen to Jamaika vun dat Utwärtige Amt, togrepen an'n 30.3.2011