Æon Flux

Vun Wikipedia
Wesseln na: Navigatschoon, Söök
Filmdaten
Originaltitel: Æon Flux
Düütsch Titel: Æon Flux
Produkschoonsland: USA, Düütschland
Johr vun’t Rutkamen: 2005
Läng: ca. 89 Minuten
Originalspraak: Ingelsch
Öllersfreegaav in Düütschland: FSK 12
Filmkru
Speelbaas: Karyn Kusama
Dreihbook: Phil Hay
Matt Manfredi
Produkschoon: David Gale
Gregory Goodman
Gale Anne Hurd
Gary Lucchesi
Musik: Graeme Revell
Kamera: Stuart Dryburgh
Snitt: Jeff Gullo
Peter Honess
Plummy Tucker
Dorstellers

Æon Flux is en US-amerikaansch Science-Fiction-Film vun den Speelbaas Karyn Kusama. De Film is 2005 kuplett in Düütschland dreiht worrn, an Dreihöörd in Berlin, Potsdam un in’t Filmstudio Babelsberg. Hööftdorstellersche is de Oscarpriesdrägersche Charlize Theron.

Inholl[ännern | Bornkood ännern]

De Film speelt 400 Johren in de Tokunft. De gröttste Deel (99%) vun de Minschheit is bi en Süük dood bleven. En Wetenschopler, Goodchild, hett en Middel gegen de Süük funnen un fief Millionen Minschen hebbt överleevt un sik in Bregna ansedelt, in de letzte Stadt, de dat överhaupt noch gifft. All de Rest vun de Eer is wedder en groten Woold worrn. Bregna warrt siet disse Tied vun de Dynastie vun de Goodchilds regeert, en Grupp vun Wetenschoplers. Över de Stadt sweeft en Luftschipp, dat Relicle, as Mahnmal, dat de Minschen nich vergeten doot, wat se överleevt hebbt.

De Stadt gellt offiziell as en perfekte Sellschop. Aver nich allens in de Stadt is goot. De Minschen hebbt Drööm, in de se sik op Saken besinnen köönt, de se nienich maakt hebbt. Af un an verswinnt Lüüd un keeneen weet, woneem se afbleven sünd. Un so gifft dat en Ünnergrundarmee, de Monicans de gegen de Regeren strieden deit. Æon Flux, en junge Fru, is een vun jem. Toeerst maakt se en Anlaag toschann, mit de de Regeren achter de Lüüd rumsnüffelt. An dissen Abend warrt Æon ehr Süster Una vun de Polizei ümbröcht, wieldat de denkt, dat Una een vun de Monicans is. Üm un bi een Jahr mutt Æon töven, bet se dor mit de Regeren för afreken kann. Se kriggt den Opdrag, Trevor Goodchild, den Baas vun de Regeren ümtobringen. Sithandra, mit de se al fröher tosamenarbeidt hett, helpt ehr op den Weg na de Zitadell, aver dat letzte Stück Weg mutt Æon alleen gahn.

Se draapt Trevor as he in en Theatersaal en Feernsehanspraak maakt un höllt em ehr Scheetgewehr för’t Gesicht. He snackt ehr mit den Naam Katherine an un jüst in den Momang hett Æon en Dagdroom, dat se Trevor al kennt un dat he fröher mal ehr Leefsten weer un so kann se nich afdrücken. Se warrt vun de Sekerheitslüüd daalslaan un kummt in’t Kaschott. Se kriegt dat hen, vun dor uttoneihn. Trevor stüert ehr en geheeme Naricht to, dat he sik mit ehr drapen will.

Dorbi kriggt se to weten, wat in Bregna würklich aflopen deit: all de Minschen sünd bloot Klonen vun de vörmaligen Inwahners. As en Folg vun de Süük köönt de Minschen, de överleevt hebbt, keen Kinner mehr kriegen. Dat hebbt de Wetenschoplers aver nüms vertellt. Wenn een Minsch dood blifft, warrt sien DNA in dat Relicle opbewohrt. Wenn de Oppassers vun Bregna en Poor finnt, dat dor goot för tosamenpasst, warrt de DNA kloont un de Fru kriggt wat in’t Eten, dat ehr vörspeelt, dat se in annere Ümstänn is. Wenn se dor denn mit to den Doktor geiht, warrt ehr de Klon inplant.

Ok mit Trevor is nich allens so as Æon dat dacht harr. He versöcht nu al dat sövente Leven lang, en Middel gegen de Unfruchtborkeit to finnen. Aver sien Broder Oren Goodchild meent na all disse Tiet, dat dat egentlich gor nich so slecht is, op disse Oort ewig to leven. Un so versöcht he, to verhinnern, dat Trevör överhaupt so en Middel finnt. He weet ok, dat dat al Minschen gifft, de op natüürliche Oort Kinner kriegen köönt, un de hett he denn jümmers ümbröcht.

Æon verbünnt sik denn mit Trevor un de twee warrt nu vun Oren un sien Lüüd un ok vun de Monicans jaagt. Aver opletzt hebbt se Spood un köönt de Monicans övertügen, woans würklich de bösen Lüüd sünd, un tosamen winnt se gegen Oren un sien Sekerheitslüüd. Denn meent Æon, dat dat Klonen nich wiedergahn kann un dat dat ok gor nich mehr nödig is. Dat gifft ja al en poor Lüüd, de wedder sülvst Kinners kriegen köönt (wenn een se dor nich för ümbringt) un se hett ok de Toversicht, dat Trevor sien Middel, dat Oren toschann maakt harr, wedderfinnt. Un so geiht se op dat Relicle rop, monteert Sprengsätz un bringt den Fleger daal, dorbi sleit de en Bresch in de Stadtmuer. De Minschen sünd wedder free un köönt de Eer nieg opboon.

De Film ennt mit en Kommentar vun Æon, dat dat beter is, bloots eenmal to leven, aver dat würklich un dat een denn Platz maken mutt för de Lüüd, de achter een kummt un de dat villicht beter maakt. Toletzt is een Szeen to sehn, de dat den Film längs al en poor Mal geven hett, blots ditmal kloor un nich so as dör en blinne Glasschiev: dat eerste Mal, dat sik Trevor un Katherine drapen hebbt, in de Tiet vör de Süük. Trevor fraagt ehr: „Seh ik di noch mal wedder“ un se lacht em an, nickköppt sachen un geiht wieder.

Nettlenken[ännern | Bornkood ännern]