Zenaida Moya

Moya mit Elvin Penner in dat Jahr 2010

Zenaida Victoria Moya (* in Belize-Stadt) is en Politikerin (UDP) ut Belize.

Moya is as Dochter von Erlean un Eugene Moya in Belize-Stadt boren un opwussen. Se weer dor op de Pallotti High School un denn op dat St. John’s College. Se hett an de Gonzaga University in Spokane (USA) studeert un en Bachelor of Science in Business Administration maakt. An de University of Detroit Mercy in Detroit hett se denn noch en Master maakt.

1995 hett Moya anfungen för dat Social Security Board von Belize to arbeiden un is later in dat Ministerium för Weertschopliche Entwicklung wesselt. 2002 is se Registrar för Kooperativen un Spoorkassen worrn.

Bi de Unruhen in Belize 2005 hett se sik gegen de PUP-Regeren von Said Musa un för de UDP-Oppositschoon von Dean Barrow insett.

An’n 23. Oktober 2005 is se von de United Democratic Party (UDP) as Kannedatin för dat Amt as Börgermeestersche von Belize-Stadt nomineert worrn. An’n 1. März 2006 hett se de Wahl wunnen un dat Amt von David Fonseca (PUP) övernahmen. Se is an’n 4. März 2009 för en twete Amtstied wedderwählt worrn. Ehr Gegenkannedaat von de PUP weer Cecil Reneau. Later in dat Johr 2009 is ehr vörhollen worrn, dat se Geller veruntreut harr un de UDP hett ehr ut de Partei rutsmeten. Ehr Amt as Börgermeestersche is unafhängig von de Parteitohörigkeit un dorüm hett se düt Amt bet to de Wahl 2012 behollen. Na de Wahl hett se dat Börgermeesteramt an’n 7. März 2012 an ehren Nafolger Darrell Bradley von de UDP afgeven.

Moya hett an’n 7. Mai 2009 in de Saint Ignatius Church in Belize-Stadt Troy Flowers freet un hett na düsse Tied denn ok den Naam Moya-Flowers dragen. Dat Poor hett in’n September 2009 en Söhn kregen. In’n Juli 2011 hett dat Poor de Schedung inreckt.