Wendsch Dialekt
De Wendsch Dialekt is de Dialekt, de in en groten Deel von dat ole Amt Wenden un de hüdige Gemeen Wenden snackt warrt. De Dialekt is nedderdüütsch, liggt also noorden von de Benrather un Ürdinger Lien, höört aver nich to dat Plattdüütsche. To’n Bispeel hett de Dialekt den fränkischen Plural op -en, -et, -en bi de Verbformen von de Nutied. Deelwies wiest de Dialekt Kennteken de kloor sassisch sünd, an anner Stellen is he ganz mit dat fränkische övereen. Wohrschienlich is de Ümgegend von Wenden fröher sassisch wesen bet Korl de Grote Sassenslächter de Sassen ünnerkregen un in de Gegend Franken ansiedelt hett.
De Dialekt warrt in de beiden Öörd Altenkleusheim un Thieringhausen in de Gemeen Olpe un in de Öörd Altenberg, Altenhof, Altenwenden, Bebbingen, Brün, Büchen, Dörnscheid, Eichertshof, Elben, Gerlingen, Girkhausen, Heid, Hillmicke, Hoffnung, Hünsborn, Huppen, Löffelberg, Möllmicke, Ottfingen, Rothemühle, Rothenborn, Scheiderwald, Schönau, Schwarzbruch, Vahlberg, Wenden, Wendenerhütte un Wilhelmstal in de Gemeen Wenden spraken.