Tweeflunken

Vun Wikipedia
Wesseln na: Navigatschoon, Söök
Tweeflunken
Langbeenmuggen paart sik
Systematik
Domään: Eukaryota
ahn Rang: Veelzellers (Metazoa)
Afdeel: Geweevdeerter (Eumetazoa)
Ünnerafdeel: Tweesiedendeerter (Bilateria)
ahn Rang: Ehrdermünner (Protostomia)
Böverstamm: Huututtreckers (Ecdysozoa)
Stamm: Liddfööt (Arthopoda)
Ünnerstamm: Tracheendeerter (Tracheata)
Böverklass: Sessfööt (Hexapoda)
Klass: Insekten (Insecta)
Böverornen: Neeflunken (Neoptera)
Ornen: Tweeflunken (Diptera)
Wetenschoplich Naam
Diptera
Linnaeus, 1758

De Tweeflunken (Diptera) sünd en Ornen mank de Insekten. Dor höört se to de Neeflunken (Neoptera) mit to. Dat gifft mank de Tweeflunken meist 160.000 Aarden ut 226 Familien.[1]Dor leevt bi 9.200 Aarden vun in Middeleuropa. Se könnt twuschen 0,8 un 23 Millimeters lang weern. De gröttste Aart mank de Tweeflunken, de bitherto funnen wurrn is, is Mydas heros mit en Längde over’t Lief vun bi 60 mms. Siene Flunken kann he 100 mms wiet ut’neen spannen.

Sunnerliche Kennteken[ännern | Bornkood ännern]

As de Naam al seggt, hefft Tweeflunken bloß twee Flunken un nich veer, as dat bi de annern Insekten begäng is. Dor hannelt sik dat um de Vorflunken bi, de Achterflunken sünd in den Loop vun de Evolutschoon to so nömmte Halters (Swungkegels) ummuddelt wurrn. De sünd veel körter, as de Flunken un bestaht ut en Steel mit en dicker Enne in Form vun en Küle dor an. De Halters bewegt sik bi’t Flegen un hölpt, den Floog stabil to holen. Ok bi de wecken Heken vun Schildlüse kummt dat vor, datt de Achterflunken torüchboot wurrn sünd, ofschoonst de Schildlüse nich to de Tweeflunken torekent weert, man to de Snavelkävers (Hemiptera). Bi de Weiherflunken (Strepsitera) sünd, annersrum, de Vorflunken ummuddelt to Halters.

De Tweeflunken verscheelt sik bannig. Meist weert se updeelt in de fienen un zorten Muggen (Nematocera) up de eene Siet un de ehrder butten un stevigen Flegen (Brachycera).

De Tweeflunken ehre Systematik[ännern | Bornkood ännern]

Tweeflunken sünd en sunnerlich grote Grupp mank de Deerter, vundeswegen gifft dat in ehre Systematik veel to doon. Vun de Systematik un de Phylogenese her is dor aktuell bannig veel ut to forschen un to besnacken. Normolerwiese weert se updeelt in Muggen un Flegen. Wohrschienlich sünd avers de Muggen gor keen Monophyleetsche Grupp, man faat en Reeg vun allerhand verscheden Lienen tohopen, de liek utseht. Vundeswegen warrt annahmen, de Nematocera weern en Paraphylum, gegen de Brachycera over, de as Monophylum ankeken weert.

Belege[ännern | Bornkood ännern]

  1. Pape T., Blagoderov V. & Mostovski M.B. 2011: Order Diptera Linnaeus, 1758. In : Zhang, Z.-Q. (Ed.) Animal biodiversity: An outline of higher-level classification and survey of taxonomic richness. Zootaxa 3148: 222-229, http://www.mapress.com/zootaxa/2011/f/zt03148p229.pdf

Literatur[ännern | Bornkood ännern]

  • Joachim Haupt, Hiroko Haupt: Fliegen und Mücken. Beobachtung, Lebensweise. Naturbuch, Augsborg 1998, ISBN 3-89440-278-4.
  • Erwin Lindner: Handbuch. Schweizerbart, Stuttgart 1949 (Die Fliegen der paläarktischen Region. Band 1).
  • Harold Oldroyd: The Natural History of Flies. Weidenfeld & Nicolson, London 1964.
  • H. Schumann, R. Bährmann, A. Stark (Rutg.): Checkliste der Dipteren Deutschland. Ampyx, Halle 1999, ISBN 3-932795-01-6.

Weblenken[ännern | Bornkood ännern]

Commons-logo.svg Tweeflunken. Mehr Biller, Videos oder Audiodateien to’t Thema gifft dat bi Wikimedia Commons.