Tencoa

Tencoa is en Oort in dat Municipio Santa Bárbara, Departamento Santa Bárbara, Honduras.

Geografie

In’n Oosten von’n Oort liggt de Montaña de Santa Bárbara mit en Höögd von 2.744 m över de See. En Stück in’n Westen flütt de Río Grande de Otoro an’n Oort langs. De söven Kilometer lange Quebrada Maigual münnt bi Tencoa in’n Río Grande de Otoro. De Oort sülvs liggt relativ sied in dat Tencoa-Daal (Valle de Tencoa).

De Naveröörd sünd La Ceibita un Santa Bárbara in’n Noorden, Las Vegas in’n Oosten, Concepción del Sur un Ceguaca in’n Süüdoosten, Arada in’n Süüdwesten, San Vicente Centenario in’n Westen un San Nicolás in’n Noordwesten.

Historie

Tencoa bestünn al in dat 16. Johrhunnert as Oort von de inheemschen Lenca. 1525 hebbt de Spaniers den Oort innahmen. Dat weer een von de Öörd, in de de Spaniers en Klooster grünnt hebbt, üm de Inheemschen to christianiseren. In dat 19. Johrhunnert weer Honduras noch in Partidos indeelt un een von de Partidos hett Partido de Tencoa heten. An’n 25. April 1815 hett de Oort swore Schadens nahmen, as de Río Grande de Otoro över de Övers treden is. De Lüüd ut Tencoa sünd denn na Santa Bárbara ümsiedelt un Tencoa is nu blots noch en lütt Dörp. De Ruinen von’n Oort ut de Koloniaaltied bestaht noch.

Weertschop un Infrastruktur

Verkehr

De Oort liggt an de Ruta Nacional 20 (RN-20), de in’n Noorden na Santa Bárbara un wieder na La Ceibita an de CA-4 föhrt un in’n Süüdoosten över Ceguaca un Concepción del Sur na’n Lago de Yojoa an de CA-5. Von de RN-20 geiht in’n Westen de Ruta Nacional 62 af, de na San Vicente Centenario un San Nicolás löppt.

Literatur

• Raúl Alvarado: Perspectiva histórica del partido de Tencoa y el surgimiento de la ciudad de Santa Bárbara. Trinity Printshop, Tegucigalpa 2011