Synthopol

Vun Wikipedia
Zur Navigation springen Zur Suche springen

De Synthopol Chemie Dr. rer. pol. Koch GmbH & Co. KG is en Ünnernehmen in Buxthu, dat Kunstharz för de Lack-, Farven-, Kunststoff- un Kleevstoffindustrie herstellt. Mit üm un bi 190 Lüüd in Lohn un Brood verköfft dat Ünnernehmen so wat 60.000 Tunnen Kunstharz un maakt en Ümsatz von över 100 Millionen Euro.

Historie[ännern | Bornkood ännern]

Dat Ünnernehmen is 1957 von’n Hambörger Koopmann Peter Koch in de Andreas-Meyer-Straat in Billbrook grünnt worrn.

Nadem dat Ünnernehmen an sien olen Standoort gau wussen is, wull Synthopol na Maschen ümtehn. Dor hebbt se 1963 en neet Wark boot. Den Bo hebbt se aver anfungen, ahn dat de Bogenehmigung dör weer. Synthopol hett nadräglich en Bogenehmigung von de Regerung in Lümborg kregen, aver de Gemeen Maschen hett dor ut Angst üm dat Grundwater gegen klaagt un sik dörsett.[1]

An’n 10. Juni 1963 hett dat en swore Explosion in dat Synthopol-Wark in Billbrook geven, bi de twee Arbeiders swoor verletzt worrn sünd.[1]

Nadem dat Ünnernehmen nich na Maschen tehn kunn, sünd se 1966 na Buxthu ümtagen in dat ne’e Gewarvrebeed twüschen Eindörp, Imbeek un Oostmoor, dat twüschen de Nedderelvbahn un de Bundsstraat 73 liggt.

1984 hett Günter Koch dat Ünnernehmen von Peter Koch övernahmen.

An’n 28. Juni 2000 hett dat en swore Explosion op dat Gelänn von de Synthopol-Anlaag in Buxthu geven. Üm dat Füür to löschen weren de Füürwehren ut de ganze Gemeen Buxthu, von de Warksfüürwehr von dat Dow-Wark Stood un von de Beroopsfüürwehr Hamborg anrückt. Dat hett Schadens von 10 Millionen Euro geven.[2] Jüstso groot weer de Produkschoonsutfall.

2012 hett Günter Koch dat Leid över dat Ünnernehmen an den Geschäftsföhrer Henning Ziemer afgeven. Nadem Synthopol dat Navergrundstück köfft hett, dat vörher Malteser Aquavit tohöört harr, is 2014/2015 de Anlaag utboot worrn. Richtfest för de ne’e Hall 16 weer an’n 19. September 2014.[3]

2014/2015 hett de Gemeen von de Ahmadiyya Muslim Jamaat an’n Olen Postweg en Grundstück köfft un wull dor en Moschee för Buxthu boon. Dat dröffen se nich, von wegen dat üm dat Gelänn von Synthopol en Afstand von 235 Meter hollen warrn mutt na alle Gebüüd, in de veel Lüüd in- un utgaht.[4]

Footnoten[ännern | Bornkood ännern]

  1. a b Schon wieder Explosion in einem Fabrikbetrieb, Hamburger Abendblatt an’n 12. Juni 1963
  2. Hoher Sachschaden nach Explosion bei Synthopol, farbeundlack.de an’n 1. August 2000
  3. Synthopol Chemie feiert Richtfest für neues Produktionsgebäude, farbeundlack.de an’n 6. Oktober 2014
  4. Aus für Buxtehuder Moschee, Stader Tageblatt an’n 7. Mai 2015

Weblenken[ännern | Bornkood ännern]


Koordinaten:53° 28′ N, 9° 43′ O