Stone (Film)
| Filmdaten | |
|---|---|
| Plattdüütsch Titel: | — |
| Originaltitel: | Stone |
| Düütsch Titel: | Stone |
| Produkschoonsland: | USA |
| Johr vun’t Rutkamen: | 2010 |
| Läng: | 101 Minuten |
| Originalspraak: | Engelsch |
| Öllersfreegaav in Düütschland: | FSK 16 |
| Filmkru | |
| Speelbaas: | John Curran |
| Dreihbook: | Angus MacLachlan |
| Produkschoon: | Holly Wiersma David Mimran Jordan Schur |
| Musik: | verschedene |
| Kamera: | Maryse Alberti |
| Snitt: | Alexandre de Franceschi |
| Szenenbild: | Tim Grimes |
| Kledaasch: | Victoria Farrell |
| Dorstellers | |
| |
Stone (op platt so veel as „Steen“; dt. Titel: Stone; Feernsehtitel: In der Lüge gefangen) is en Filmdrama ut dat Johr 2010 mit Elementen vun en Thriller. De Hööftrull speel Robert De Niro, Speelbaas weer John Curran. In de US-amerikaanschen Kinos is de Film an’n 8. Oktober 2010 anlopen[1].
Inholt[ännern | Bornkood ännern]
Jack Mabry is en Bewährungshülper. He is mehr as veertig Johren mit sien Fro Madylyn verheiraat, ofschoonst se em in verleden Tieten verlaten wull. Dorvun künn he ehr afbringen, as he drauht hett jemehr Dochter ut en Finster to smieten.
Johrteihnten later steiht Mabry kort för sien Pensioneren. Sien Nafolg is lang al regelt, blots en poor Fäll leegt noch op sien Schrievdisch to’n Afarbeiten. Een dorvun is Gerald Creeson, de vun all Lüüd „Stone“ nöömt warrt. De sitt in’t Gefängnis wegen Brandstiftung un wegen den Dood vun sien Grootöllern, de bi den Brand ümkamen sünd. Vun Anfang an gifft sik Stone aggressiv un swöört jümmerto, dat he dat verdeent haar, free to kamen. Liekers gifft he sik wenig Möh, so to doon, as weer he wohrhaftig al so wiet, dat he rutkamen kann. In’t Gegendeel vertellt he Mabry vun sien sexuellen Fanatsien un sien Fro, mit de he allns maken kann. Vun den bannig christlichen Mabry warrt dat Thema foorts afblockt.
Stone sien Fro Lucetta övernimmt ok ehrn Deel: Se maakt sik an Mabry ran un lett ok nich locker, as Mabry ehr kloor maakt, dat se sik an den Deenstweg hollen mutt.Se kriggt em so wiet rüm, dat he mit ehr Eten geiht, un opletzt warrt he von ehr verföhrt. Mabry kriggt en slecht Geweten dorbi, kann sik aver opletzt nich gegen sien egen Lengen to Wehr setten.
In’t Gefängnis finnt Stone in de Twüschentiet en Book, dat en religiöse Theorie behannelt. Dorbi geiht dat üm Kläng, de dat Dör’nanner, ünner de Stone in’t Gefängnis vör allen to lieden hett, an de Siet schuuvt un as Stimmgavel vun Gott interpreteert warrt. Över Lucetta lett he to disse Theorie ok Mabry sien Fro en Infoblatt tokamnen. Dormit warrt en traagsche Keed vun Begeevnissen utlööst, de opletzt Mabry sien Leven tonichten maken deit: Madylyn, de dat Leven mit Jack nich mehr uthollen deit, brennt jemehr Huus af un geiht na ehr Dochter. He verlütt sien Gloven. Bi sien Afscheed stött he besopen sien Nafolgersche vör’n Kopp un drauht opletzt Stone mit en Scheetwapen.
Kritik[ännern | Bornkood ännern]
Roger Ebert schreev goot över den Film un loov De Niro un Norton, de in Bestform en psycholoogsch Duell twüschen en Bewährungshülper un en vigelienschen Fangenen spelen doot[2].
Produkschoon[ännern | Bornkood ännern]
Dat Dreihbook is egentlich för’t Theater schreven worrn un weer ok eenmol as szeensche Lesung vördragen. MacLachlan hett 2005 ut dat Theaterstück denn aver en Dreihbook maakt. Ünner de Hülp vun de Produzentsche Holly Wiersma is de Film bi Mimran Schur Pictures entwickelt worrn. Stoen is de Dbütfilm vun de Produkschoonssellschop, de 2010 vun de Privatinvesters David Mimram un Jordan Schur köfft worrn is.
De Dreiharbeiten hebbt an’n 15. Mai 2009 in Michigan anfungen. De Szenen in’t Gefängnis weern in’t süüdliche Michigan Correctional Facility in’n Blackman Township dreiht worrn. De Truergottsdeenst weer in de Emmanuel Lutheran Kark vun Ypsilanti opnahmen un jüst so ok eenige Butenopnahmen. De Farmhuusszenen weern an’t histoorsche Mast Farmhuus dreiht, dat an’t Enn vun de Dreiharbeiten afbrennt worrn is.
De Weltpremiere vun den Film weer an’n 10. September 2010 bi dat Toronto International Film Festival. Een Maand later weer de US-amerikaansche Premiere. In Düütschland is Stone toeerst an’n 15. März 2011 op DVD publizeert worrn.
Borns[ännern | Bornkood ännern]
- ↑ Premierendaten op IMDb
- ↑ Stone-Kritik vun Roger Ebert op www.suntimes.com afropen an’n 10. Januar 2013
Weblenken[ännern | Bornkood ännern]
- Offizielle Websteed
- Stone in de Internet Movie Database (engelsch)